kraamaat@gmail.com
+ +92 333-430-6384


رنگ۔۔۔۔٭رویل لیکھ٭


ثمرہ اقبال June 10, 2023


رنگ۔۔۔۔٭رویل لیکھ٭

ثمرہ اقبال

رنگ (colour) انسانی بصیرت دی ویکھن تے سمجھن دی اک خصوصیت اے۔جہدے وچ اوہ مختلف زاویاں یعنی نیلا، پیلا تے ساوے دی تمیز کردا اے۔انسانی اَکھ رنگ نوں اودوں محسوس کردی اے جدوں اوہدی اکھ وچ مختلف حصیاں نوں وصول کرن والیاں شیواں تے روشنی پیندی اے۔ یعنی ہر اک پکھ اک وکھرا رنگ ویکھدا اے۔

رنگ مختلف شیواں دی حالت ،شدت ، ایہناں دا ہلکا پن عمر تے ساخت دے بارے دس پاندے نیں۔ انسانی اکھ 380 تو لے کے 740 نینو میٹر طول موج دے درمیان ویکھ سکدی اے۔ہر رنگ توں اک وکھرا کم لیا جاندا اے تے ایہ انسانی دماغ ای دی ورتوں اے۔

گرم رنگ:

سرخ، پیلا تے کیسری سکون تے گرمی توں لے کےدشمی تے غصے تک دے مختلف جذبیاں نوں جنم دے سکدے نیں۔

ٹھنڈے رنگ:

جویں سبز، نیلا تے جامنی رنگ اکثر پر سکون تے اداسی جذبات نو وی جنم دیندے نیں۔

رنگاں دے کجھ ناں

شنگرفی۔

ملاگیری۔

عنابی۔

کپاسی۔

کبودی۔

شتری۔

زمردی۔

پیازی۔

قرمزی ۔

کاہی۔

کاکریزی۔

اگرائی

کاسنی۔

تقرئی۔

قناویزی۔

موتیا۔

نیلوفری ۔

دھانی۔

شربتی۔

فالسی۔

جامنی۔

چمپئ۔

تربوزی۔

مٹیالا۔

گیسروا۔

مونگیا۔

شہتوتی۔

ترنجی۔

انگوری۔

کشمشی۔

فاختی۔

پستی۔

شفتالوی وغیرہ ۔

ایہ گل وی یاد رکھن والی اے جے ہر رنگ دا شیڈ وکھرا ہوندا اے تے اس دا ورتارا وی مختلف ہوندا اے۔

رنگ دا اصل: فارسی

(اسم مذکر)

لُون دے سفوف جو مختلف رنگاں دے ہوندے نیں۔

ہولی دا تہوار۔

لکڑی ، لوہا یا ں کندھ وغیرہ تے رنگ کرن دا مسالہ،روغن، پالش وغیرہ ۔

چہرے دی کیفیت یا اتار چڑھاؤ جہڑے جذباتی دباؤ نال ظاہر ہوندے نیں۔

حسن، دلکشی ، رنگین ، بہار، رونق، جوبن۔

ایہناں رنگاں دے معنی ہر روح نال مختلف نیں۔ یعنی شاعری وچ ہر رنگ توں وکھرا معنی مراد لیا جاندا اے۔ایتھوں تیکر کہ صوفی شعراء نے اس توں وکھرا مطلب لیا اے تے اوسے ای رنگ دا معنی جدید شاعر نیں الگ لیا اے۔نثر لکھن والا اس رنگ دا معنی ہور لیندا اے۔

اک وکھری شے علم نفسیات اے جس دے ماہر ہر رنگ دا اک نواں مطلب لیندے نیں۔

مثال وجوں پیلا رنگ:

اس دا اک نفسیاتی پہلو ایہ اے جو ایہ رنگ حرارت ، توانائی ، روشنی تے تخلیقی صلاحیتاں دے متعلق اے۔ایہنوں اکثر حوصلا افزائی تے زندگی بخشن والا رنگ منیا جاندا اے۔ایہ اس رنگ دے مثبت پہلو نیں۔

اس دے کجھ منفی پہلو وی نفسیات دی روح نال موجود نیں:

بھاویں ایہ رنگ خشگوار اے فیر وی اس بارے مطالعہ کیتیاں ایہ گل پتا لگدی اے جے ایہ جذبات نوں ابھاردا اے۔ مایوسی تے غصے دی علامت وی اے۔

تحقیق توں ایہ گل ثابت ہوندی اے کہ پیلیاں دیواراں والے کمریاں وچ بال چوکھا روندے نیں۔

آکسفورڈ وچ" یلولباس دا دن" جیہڑا بیداری دے دن دے طور تے 2011 وچ شروع ہویا۔ اس دی سر پرستی " بائیسکل سواری مسیسیپی" نے کیتی۔ جو غیر منافع بخش تنظیم اے۔ جو ریاست وچ سائیکل نوں فروغ دیندی اے۔

رنگ ہر ثقافت وچ وکھری پہچان رکھدے نیں۔تے ہر کلچر وچ اس دا وکھرا مطلب لیا جاندا اے۔

جاپان وچ پیلے رنگ دا مطلب ہمت تے شرافت اے ۔

اسلام وچ پیلے رنگ دا مطلب دانشمندی اے۔

ہندومت وچ، کرشنا دی اولیت نو عام طور تے پیلے رنگ وچ وکھایا جاندا اے۔

پیلا تے زعفران وی اوہ رنگ نیں جو سادھو یا ہندوستان وچ گھمن والے مقدس مرد پاندے نیں۔

مشرق وسطیٰ دے بہت سارے ممالک وچ پیلا رنگ خوشحالی دی علامت اے۔

بہت ساریاں یورپی یونیورسٹیاں وچ، فیکلٹی آف فزیکل سائنس دے ممبر پیلا رنگ پاندے نیں جے ایہ تحقیق دی نمائندگی کردا اے۔

ایہ پیلے رنگ دی تھوڑی جہی معلومات اے تے ایسے طرحاں ہر رنگ ہر تھاں ہر لحاظ نال وکھریواں رکھدا اے۔

کجھ خاص رنگ سانوں دھنک وچ نظر آندے نیں۔ اس نوں کجھ لوک خُشی دی علامت آکھدے نیں۔کجھ لوک اس توں اداس ہو جاندے نیں۔ اس دی وجھا ایہ وی ہو سکدی اے جے اندر دی دنیا آباد ہووے تے شیشے تے پین والا دھپ دا لشکارا وی "دھنک " لگدا اے۔تے جے دل دی دنیا ویران ہووے فیر پھلاں، باغاں تے رنگاں دا نظارا بے معنی لگدا اے۔

سیانے آکھدے نیں کہ مینہ توں بعد آسمان تے ست رنگ نظر آن تے اوہ ہور بارش دی علامت ہوندی اے۔تاں فیر آ گل ای ہوئی جے تے کسے نوں مینہ دی لوڑ اے تے اوہ ایہ سارے رنگ ویکھ کے خُش ہو جاوے گا، تے جے کسے نو اس دی لوڑ نہیں ایہ سارے رنگ اس واسطے اداسی تے مایوس دا سبب بن جان گے۔

کالا رنگ اک ایسا رنگ اے جس وچ رل سارے رنگ اپنا آپ گوا لیندے نیں تے ایسے وچ رل خوش ہو جاندے نیں۔

تے صوفی شاعر بابا فرید الدین مسعود گنج شکر اس رنگ والے نوں کسے کارے دا نہیں سمجھدے۔اک پاسے کالا رنگ اوہ اے جس وچ سبھ رنگ سما جاندے نیں تے اک پاسے مسئلا دل کالے دا اے جے ایہ کالا ہو جاوے تے اس تے کوئی رنگ وی نہیں چڑھدا۔

ایہو کالا رنگ اے جو اک شاعر نو اپنی محبوبہ دے گورے جُسےتے کن وانگ دسدا اے تے اس دی محبوبہ ہیرا بن جاندی اے۔

ہر رنگ دی کتھا وکھری اے۔کجھ رنگ خوشی دی علامت نیں جیویں رتا، ساوا ایہو رنگ فقیر پاوے گا تے اوہ صوفی اکھوندا اے۔ ایہو رنگ اک الڑ مٹیار پاوے تے اوہ جوانی تے حسن دی علامت اے۔ جے ایہ رنگ اک بازارو عورت پاوے تے اوہ مقدراں والی گنی جاوے گی تے جے ایہو رنگ اک رنڈی پاوے تے اوہ منحوس تے مقدراں ماری منی جاوے گی۔

رنگ تاں نہیں بدلے ساڈے سوچن دے زاویے بدل گئے نیں۔رنگ تاں سارے ای سوہنے نیں بس ساڈا گمان ہر اک واسطے وکھرا اے۔

جو اسیں سوچ لیندے آں رنگ سانوں اوسے وچ ای رنگ دیندے نیں۔

رنگ ، رنگن تے رنگ دین دا عمل اے۔جو اوسے طرحاں ڈھال دیندا اے جو کوئی بننا چاہندا اے۔کیوں جے لال رنگ محبت توں خطرے دی علامت اودوں ای بن دا اے جیس ویلے اسیں محبت دے محل نوں خون دی ندی وچ وگانا چاہندے آں ۔۔۔

٭٭٭٭٭٭