عاشق رسولؐ تے پنجابی سیوک جناب اقبال زخمی۔۔۔۔٭رویل کالم٭

عاشق رسول تے پنجابی سیوک جناب اقبال زخمی ہوراں دیاں لِکھیاں نعتاں دا پراگا”نعتاں جان مدینے“ اوہناں دے سپتر پروفیسر ڈاکٹر ارشد اقبال ارشد نے مرتب کیتا اے۔ایہ پراگا ربیع الاول وچ ساہمنے لیاندا گیا۔ ایہ اوہی ای مہینا اے جس بارے سارے مکاتیب فکر دا مننا اے کہ ایس بابرکت مہینے وچ سوہنے نبی پاک ﷺ ایس دُنیا وچ تشریف لیائے۔ایس مہینے نوں بڑی عقیدت تے احترام نال منایا جاندا اے۔اقبال زخمی جی ہوریں نبی پاک ﷺ نال جہڑی عقیدت رکھدے سن اوس دی گواہی اوہناں دے اَکھر اَکھر وچوں وی جھلکارے ماردی پئی اے تے ایہی عقیدت،محبت تے احترام دا جذبا سانوں پروفیسر ڈاکٹر ارشد اقبال ارشد ہوراں کول وی ملدا اے جہناں نے نعت لِکھن،پڑھن پڑھان تے لِکھوان دے کم نوں سانبھیا اے تے آہر نال اگانْہ وی ٹوریا ہویا اے جہدے نال آپ دے والد دی روح ضرور راضی ہوندی ہووے گی۔

عشق مصطفی ؐ توں بغیر نعت لکھنا کسے طرحاں وی ممکن نہیں ہوندا اے۔

شریف انجم آپ نوں انج خراج تحسین پیش کردے نیں:

ذکر سرکار دا سینے نوں روشن کر گیا زخمی

وسیلے نعت دے یارو یقینا تر گیا زخمی

کرم ہویا نمانے تے اُساری سوچ دی ندلی

شگوفے نعت دے مہکے کیاری سوچ دی بدلی

حجازی جام جو لبھے خماری سوچ بدلی

حیاتی نوں ملی معراج کاسہ بھر گیا زخمی

وسیلے نعت دے یارو یقینا تر گیا زخمی

نعت کہن داجنون تے جذبا اوہناں دی اَدبی حیاتی وچ اُگھڑواں وکھالی دیندا اے جدوں جنوری 1983وچ ”لکھاری“ دا مُڈھ رکھیا تے دوجے ای شمارے نوں نعت نمبر دی صورت وچ ساہمنے لیاندا سی جہدے وچ وڈے وڈے نعت گو شاعراں نوں شامل کیتا گیا ایہ نویں لکھن والیاں واسطے اِک پریرنا وی سی کہ اوہ عشق رسول ﷺ نوں سمجھن وی تے اپنیاں لکھتاں وچ وی لیاون۔اقبال زخمی ہوراں نے اپنی حیاتی وچ ”لکھاری“ دے بھرویں نعت نمبرشائع کیتے جہدے وچ نعتاں لکھوان دے نال نالپنجابی زبان اندر نعت دے حوالے نال لیکھ وی لکھوائے جس نال چنگا چوکھا مواد پڑھنہاراں واسطے بھالیا گیا تے اوس نوں اِک تھاں اِکٹھا کر چھاپیا گیا۔

حضور پاک ؐ نوں ویکھن دی تانگھ اے جہدے وچ تڑپ وی ملدی اے

٭کدوں مُکن گیاں خورے جُدائیاں یا رسول اللہ ﷺ

میں آساں حاضری لئی فیر لائیاں یا رسول اللہ ﷺ

٭ نہ جھلی جاندی میتھوں جدائی یا رسول اللہ ﷺ

دہائی اے دہائی اے دہائی یا رسول اللہ ﷺ

٭

عاشق رسول دے دِل گھائل نین ہجر وچ روندے رہندے نیں اوہناں دیاں نیندراں اُڈ جاندیاں نیں تے دِنیں راتیں ہنجوواں دا ہار پروندیاں اوہ مدینے دیاں گلیاں نوں ای ذہن تے دِل وچ وسائے رکھدے نیں۔اجہے عاشقاں دی نظر وچ حُوراں دی حرص نہیں سگوں طیبہ دے نظارے ہوندے نیں۔

اقبال زخمی جی اپنے محبوب کولوں رحمت تے شفقت دے طلبگار نیں:

تری رحمت تری شفقت تری اُلفت دا طالب ہاں

کرم دی اِک نظر ہووے خدارا یا رسول اللہ ﷺ

انسان جس ہستی نال عشق کردا اے تے اوس دیاں صفتاں بیان کرنا اپنے جیون دا مقصد بنا لیندا اے تے جے ہستی اوہ ہووے جس دا ثانی پورے جگ وچ نہ ہووے تے رَبّ سوہنے نے وی اوس دیاں صفتاں بیانیاں ہووں تاں وڈیائی بیان کرنا وی ثواب بن جاندا اے ایسے لئی تاں اقبال زخمی جی وی اوس ہستی دی وڈیائی نوں وی بیان کردے ہوئے کہندے نیں:

تہاڈے در توں کھاندے نیں زمانے دے گدا آقا

تُساں شاہواں دی وِگڑی بنائی یا رسول اللہ ﷺ

اک ہور تھاں تے ویکھو:

محمد ﷺ دا دربار‘ دربار عالی

گدا تے گدا بادشہ وی سوالی

مدینے جاون دی تانگھ ہر عاشق رسول دی منزل ہوندی اے تے ایسے ای محبت نوں اِک نعت گو کِویں وسار سکدا اے ایہ موضوع وی اقبال زخمی ہوراں کول تھاں تھاں ملدا اے۔

سدّ کول غریباں نوں

نہ رول غریباں نوں

کد واری آؤنی اے

کجھ بول غریباں نوں

تے مدینے جا کے اوہ کُلی پا کے وی رہن لئی تیار ہو جاندے نیں:

فیر اِک وار جاں مدینے

کُلی پا کے رہاں مدینے

نعت دے پچھے جے محبت دا جذبا نہیں ہووے گا تاں نعت کہی ای نہیں جا سکدی اے۔رسول پاک ﷺ نوں محبت کرن والیاں دی اوہناں تے جاناں نثار کرن والیاں دی اک لمی فہرست نون جدوں اقبال زخمی ویکھدے نیں تاں آپؐ دے ساہمنے اپنی عاجزی تے انکساری نوں انج دسدے نیں:

کراں مان کاہدا مرے کیہ اے پَلّے

نہ جذبے اویسی‘ نہ جذبے بلالی

حضرت بلالؓ تے حضرت اویس ؓ دا رسول پاک نال عشق نوں بیان کردیاں ہویاں اوہ اپنے جذبیاں نوں اوہناں وڈیاں ہستیاں جِنا تے اوہناں دی قدر ومنزلت دے ساہمنے اپنے آپ نوں کمتر بیان کردے ہوئے مدینے دے والی نوں اپنی عرضوئی سُناندے نیں۔

آپ دیاں نعتاں توں ایہ جانیا جا سکدا اے کہ غریباں دے لجپال‘ ہمدرد تے رحمتہ للعالمین دی یاد وچ رہن نوں اوہ اپنے جیوندا مقصد من چُکے نیں۔

اَٹھے پہر تساڈی یاد وچ گُمیا رہواں

انج آوے ڈھنگ جینے دا تے میں بچاں

ارشد اقبال ارشد ہوراں پنجابی اَدب دی سیوا نوں سچے ڈھنگ نال نِبھان دا جتن کردے رہندے نیں‘ آپ دا مرتب کیتا نعتاں داایہ پراگا ادارا پنجابی لکھاریاں جیا موسیٰ، شاہدرا لاہور ولوں سوہنے ڈھنگ نال چھاپیا گیا ٹائٹل دی مورت کاری اسجد اقبال اسجد نے کیتی اے کُل صفحے128تے ہدیہ صرف تِن سو روپے اے۔