کتاب تبصرا

کتاب: کہانی سنان والا دل

ترجما کار: رِشم جمیل پال

چھپن ورھا: 2023

چھاپنہار: پنجابی مرکز لاہور

رِشم جمیل پال دا ترجمایا ہویا کہانی پراگا اے۔ایہ کہانی پراگا پنجابی مرکز لاہور ولوں 2023 وچ پہلی وار چھاپے چڑھیا۔ ایس کتاب دے کل صفحے اک سو بارھاں نیں۔ایس کتاب وچ شامل ساریاں کہانیاں بدیسی نیں۔ہر کہانی توں پہلاں، جو ترجمائی گئی اے اوس دے لکھاری بارے جانکاری وی دتی گئی اے۔کل کہانیاں دی تعداد 14 اے۔ ست لکھاریاں دیاں وکھ وکھ دو دو کہانیاں ایس پراگے وچ شامل نیں۔جو لکھاری ایس وچ ذکر کیتے گئے نیں اوہناں دے ناں کجھ ایس ترتیب نال نیں:

یوسف ادریس ۔

1. کنگلا۔

2۔ سائیں لوک۔

اوراسیو کیروگا ۔

1. پراں والا سرھانا۔

2. پتر۔

سمر سٹ مام۔

1. وعدہ

2.کیڑی تے گھا دا ٹڈا۔

ڈورتھی پارکر

1. فون کال ۔

2. نیو یارک توں ڈیٹرائٹ۔

ولیم سرویاں

1. آجڑی دی دھی۔

2. ماڑے دبڑے۔

ایڈ گرا یلن پو

1.کہانی سنان والا دل۔

2. کالی بلی۔

پوسونگ لنگ۔

1.شہزادی للی۔

2.بولدے آنے۔

ایس کتاب دی اک خوبصورتی آ وی اے کہ ایس وچ ہر لکھاری دی تصویر نوں وی پرنٹ کیتا گیا اے ۔جتھے سانوں مختلف دیساں تے شہراں دے لکھاریاں نوں جاننے دا موقعا ملدا اے نال ای چہریاں توں واقفیت وی حاصل ہوندی اے۔ کتاب دا انتساب رشم نے اپنی والدہ عطیہ جمیل پال دے ناں کیتا اے۔

"کہانی سنان وا دل "

جو ایس کتاب دا ناں اے ایہ ایسے کتاب وچ موجود لکھاری " ایڈ گرا یلن پو" دی کہانی " The tell_ tale heart" اے انج لگدا جیویں ایسے توں متاثر ہو کے رشم دا دل سانوں کہانی سناون تے کیتا ۔

کسے وی زبان دی ترقی اوس ویلے ای ممکن اے جدوں دوجیاں زباناں دے ادب نوں اپنی زبان دے ادب دی طرحاں آدر دتی جاوے۔

ہر زبان نوں اوہو مانتا دتی جاوے جو اسیں آپدے لئی تصور کردے آں۔

کہانی دا آغاز تے روز ازل توں ای ہو گیا سی تے خورے ابد تیکر جاری رہنا اے۔

ہر زبان دا لکھاری آپنے آلے دوالے دے حالاتاں تے روزمرہ پیش آن والے واقعات نوں الیکدا اے ۔

کوئی اندرلے جذبیاں نوں شاعری راہیں تے کوئی نثر راہیں سامنے لیاندا اے۔کہانی نثر دا اک سوہنا تے من کھچواں روپ اے ۔ سادے اج دے کہانی کار نت نویں پہلواں نوں سامنے لیان دا جتن پئے کردے نیں۔میری جاچے " کہانی نوں جے پوری ایمانداری نال لکھیا جاوے تے اس دی جھولی اینی وسیع اے کہ حیاتی دے سارے پکھ اس دے کلاوے وچ آ جاندے نیں"

کہانی دے مختلف موضوعات ہوندے نیں تے ہر موضوع اک وکھرا تاثر دیندا اے۔

اپنے دیس دے نال نال دوجے دیساں بارے تے اپنے ادب دے نال نال دوجی زبان دے ادب بارے اودوں دی جانکاری حاصل ہو سکدی اے جدوں دوجے ادب نوں اسیں ترجما کر کے اپنی زبان راہیں ساہمنے لیاواں دے۔رِشم دا ایہ ترجمایا کہانی پراگا ایسے ای دی اک کڑی اے۔ ایس راہیں سانوں بدیسی کہانیاں تے کہانیکاراں بارے معلومات ملدی اے۔

ایس کتاب دیاں کہانیاں بارے گل کریے تے اس وچ ہر کہانی اک مکمل اکائی اے۔

ہر کردار سانوں آپنے آلے دوالے دا کردار نظر آندا اے۔

جیویں ایس کتاب دی پہلی کہانی دا کردار "عبدو" جو کہ ایسا انسان اے کہ ساری عمر محنت کردا اے تے اخیر عمرے ٹکر پورا کرنے دے لئ اوہ اپنا خون وی دیندا اے تے فیر وی اک دن بے وس ہو جاندا اے تے لوک اوس لئی بس دعا کردے نیں جہڑی خالی ڈِھڈ نہیں بھردی۔

انج دے کئ عبدو اسیں ہر روز آپنے چار چوفیرے ویکھدے آں۔

انسان دے کئی روپ نیں اک بندا اک ویلے وچ چنگا اے تے دوجے ویلے وچ اوہو بندا شیطان دا روپ وٹا لیندا اے جیویں کہانی " کالی بلی" دا کردار جو اندر دے بے وس نفس نوں قابو نہیں کر پاندا پہلاں جنوراں تے اخیر آپنی ای بیوی نوں مار مکاندا اے۔

رشم دی چُنی ہر کہانی دا موضوع آپنے ناں دی طرحاں وکھرا اے۔مجموعی پکھوں ایہ کتاب اک چنگی کاوش اے جو آن والے ویلے تے پڑھیاراں دے لئی فائدےمند ثابت ہووے دی ۔

٭٭٭٭٭