سیف علی اعوان دا دوجا پنجابی ناول"اوکھا پندھ"چھپ گیا اے۔۔۔۔٭رویل خبر٭

لاہور(نمائندارویل)سیف علی اعوان دادوجا ناول ”اوکھا پندھ“2023وچ چھپ کے پڑھنہاراں تیکر اَپڑ چُکیا اے ایس توں پہلاں لکھاری دیاں پنجابی زبان وچ دو کتاباں آ چُکیاں نیں اِک ناول ”سانجھ“ جو بیتے ورھے چھاپیا گیا تے اِک کالماں دی کتاب ”سچیاں گلاں“ وی چھپ چُکی اے۔فلیپ تے طالب حسین کوثری دا تبصرا وی ویکھو:

"اوہناں دیاں لکھتاں وچ بڑی جان ہوندی اے۔جہڑے موضوع نوں چھیڑدے نیں اوہدا ہر انگ بھرواں بیان کردے نیں۔میں اودوں حیران ہو گیا واں جدوں اوہناں نے مینوں اپنے لکھے ناول دا مسودہ تبصرے واسطے دتا۔میں پڑھیا تے اوہناں دے ایس جذبے نوں سلام کردیاں ہویاں جلدی چھاپن دی صلاح دتی۔ ایس ناول وچ اوہناں نے لہندے تے چڑھدے پنجاب دے واسیاں نون اوہناں دے اپنے جذبات دے مطابق پنجابی بولی دے پلیٹ فارم تے اِک کرن دی کوشش کیتی اے۔ "

دیباچے وچ اپنے ولوں کجھ اَکھر لکھدیاں ہویاں ناول نگار دا کہنا اے کہ اوہناں نے چڑھدے تے لہندے پنجاب دے کرداراں نوں ایس ناول وچ بیانیا اے تے لنگھے ویلے نوں پچھتاون والے کرداراں دی کردار نگاری کیتی اے۔

ایس کتاب نوں حُسن ِاَدب فیصل آباد ولوں چھاپیا گیا اے کُل صفحے 146تے مُل 600روپے اے۔

٭٭٭٭٭