کہانی کار نال ملاقات۔۔۔۔٭رویل کالم٭

کہانی کار نال ملاقات۔۔۔۔٭رویل کالم٭

نِمرہ رفیق

جمعرات دے دیہاڑے 30 نومبر2023 دی سویر نوں ادارہ پنجابی سلیکھ تے رہتل سار ،جامعہ پنجاب لاہور وچ اک مَنی پرمَنی تے تعریف دے قابل ہستی مدثر بشیر ہوری تشریف لیائے ۔مدثر بشیر ہوری پورے 9 وجے اورینٹل کالج پہنچ گئے سن ۔ادارہ پنجابی سلیکھ تے رہتل سار دے پڑھیار اوہناں دے اُڈیک وچ بیٹھے سن۔پڑھیاراں نے تے پروفیسر کرامت مغل ہوراں نے اوہناں نوں بڑے ادب دے نال پنجابی ادبی مجلس دے وچ جی آ یاں نوں آ کھیا۔ شکیل احمد تے مظہر حسین نے آون والے پروہنے لِکھاری نوں پھُل پیش کیتے۔

سارے پڑھیار خُش سن کہ اک کہانی کار تے ناول نگار جنے پنجابی ادب دے لئی کم کیتا تے اک وڈا انعام جِتیا اوناں نال ملن دا تے گل وات کرن دا موقع ملیا۔پروفیسر کرامت مغل ہوراں نے مدثر بشیر ہوراں دا تعارف کروایا ۔فیر اوہناں دے مونہوں اوہناں دی حیاتی بارے جانن دا موقع ملیا۔اوہناں نے دسیا کہ اوہ لاہور دے ای واسی نیں تے اوناں نوں لاہور دے نال بڑی محبت اے تے لاہور دے نال اوناں دا گُوڑھا رشتا اے۔مدثر بشیر ہوراں نے پنجابی دے نال سنبندھ دے بارے دسیا تے ساڈے علم دے وچ وادھا کیتا۔مدثر بشیرہوراں دامزید آ کھنا اے سی کہ اوہ شروع توں پنجابی ادب دے نال سنبندھ نہیں سن رکھدے سگوں اوہناں نے اپنی گیارھویں کلاس توں پنجابی ادب دا کم کرنا شروع کیتا سی ۔اوہناں نوں پنجابی لکھنی وی نہیں آ ندی سی ۔اوہناں نے دسیا کہ پنجابی ادب دے وچ مہارت حاصل کرن وچ نجم حسین ہوراں دا بڑا ہتھ اے ۔اوناں نے نجم حسین تے اپنے بارے وچ بہتیاں گلاں واتاں دسیاں ۔پنجابی ادب دے پڑھیاراں نے مدثر بشیر ہوراں توں ادب دے حوالے نال سوال کیتے تے مدثر بشیر نے بڑے سوہنے انداز وچ سوالاں دے جواب دتے تے پڑھیاراں دے علم وچ وادھاکر دتا۔

مدثر بشیر ہوراں نے پڑھیاراں نوں اپنی ماں بولی دے نال جُڑن دی نصیحت کیتی ۔اوہناں دا کہنا اے سی کہ اپنے وچاراں نوں اپنی ماں بولی دے وچ لکھو تے اپنی ماں بولی دا مان ودھان۔پڑھیار بڑے چاہ دے نال اوہناں دیاں گلاں واتاں سن رہے سن تے اوہناں توں ادب دی سیکھ لے رہے سن،ایسے طرحاں ای ادبی اجلاس چلد ی رہی مدثر بشیر ہوراں نے پنجابی ادب دے پڑھیاراں نوں کئی نصیحتاں وی کیتیاں ۔

مدثر بشیر ہوراں نے پنجابی ادب تے بہتا کم کیتا اے ۔اوہ اک ناول نگار تے کھوج کار تے کہانی کار نے اوناں نے کئی لکھتاں لکھیاں نیں ۔جہناں وچوں اونہاں دیاں دو سودھیاں کتاباں دے ناں( نشاہی پھل تے آ کھیا قاضی نے )ایس توں وکھ ناول جہڑے اوہناں نے لکھے سن اوناں دے ناں ( سمے ،کون،تے ریکھ )نیں۔ ناول "کون" نوں پنجابی ساہت دا سبھ توں وڈا انعام ڈھاہاں وی مل چُکیا تے ایہ ناول گرمکھی وچ وی چھپ چُکیا اے۔ ایسے ناول نوں چڑھدے تے لہندے پنجاب وچ ڈھیر مانتا ملی اے۔

کہانیاں دیاں لکھتاں وچوں (نین پران ،بابا جی چا چا جی ،کاں واہگے بارڈر تے چھتی چوبارہ )نیں۔کھوجکاری دیاں کتاباں دے ناں(لہور دی وار،اتہاسک لہور،لہور دی وار مسیتاں ،دھرتی تے ہیرے نال جڑتی تے اتہاسک لہور دی دوجی جلد )نے اوہناں دی شاعری دی لکھت (چک نمبر 6)اے۔تے (سجن میلہ،شہر پتو کی سر زمین ) اوہناں دے سفر نامے نے ۔ایہناں لکھتاں توں پتا لگدا اے کہ اوہناں نے پنجابی ادب واسطے بہتا جتن کیتا اے۔جیویں کہ مدثر بشیر ہوراں نے دسیا سی اوہناں نوں لاہور دے نال بڑی محبت اے تے اوہناں دیاں لاہور دے ناں دیاں لکھتاں توں پتا لگدا اے کہ لاہورنوں بڑی ڈونگھیائی نال ویکھیا اے۔ایہو جہے ادیب جے کسے بولی دے وچ وسدے ہون تے اوس بولی دی کئی ورھے زندگی ودھ جاندی اے۔جیویں کہ اک انھیرے گھپ کوٹھے وچ اک چراغ دے بلن نال بڑا آ سرا ہو جاندا اے اوسے طرحاں ای ایہناں لکھاریاں دیاں لکھتاں دا آ سرا ماں بولی نوں ہوندا اے ۔

٭٭٭٭٭