دین تے مر مٹنا۔۔۔۔۔٭رویل کالم٭

دین تے مر مٹنا۔۔۔۔۔٭رویل کالم٭

نمرہ رفیق

پچھلے دناں وچ لاہور شہر دے اچھرہ بازار دے وچ اک سوانی دے نال جہڑا واقعہ پیش آیااوس دی وجھا کیہ اے ۔ایس بارے میں گل کرنا چاہندی آ ں ۔ بازار دے وچ اک سوانی جہدے لیڑے ایہو جہے پائے ہوئے سن جس اُتے ,,حلوہ ,, اکھر دی بنتر سی ۔حلوہ دا معنی ہوندا اے سوہنی شے ،مِٹھی شے،دل نوں بھا جاون والی شے ۔اے اکھر کجھ انج لکھیا ہویا سی جویں عربی لکھی جاندی اے پر جدوں ساڈے لوکاں نے ویکھیا تے اوہناں نے سمجھیا کہ ایہدے تے قرآن پاک دیاں آ یتاں لکھیاں ہویاں نیں تے ایس سوانی نے اے لیڑے پا کے توہین کیتی اے ۔جس وجھا توں اوہناں لوکاں نے اوس سوانی ماریا تے ڈھیر ظلم کیتا ، اوہ بڑی اوکڑ نال اِک دُکان وچ پناہ لین تے مجبور ہو گئی جے عین موقعے تے پُلس اوتھے نہ آ ندی تے اوہناں بے عقل لوکاں نے ایس سوانی دی جان لے لینی سی ۔ایتھے لوڑ ایس گل دی اے کہ ساڈے معاشرے دے وچ لوک دین دے ناں تے مر مٹن نوں تیار رہندے نے پر دین تے عمل کرن والا کوئی نہیں ۔دین دی راہ تے چلن والا کوئی نہیں ۔جہڑے لوک اس واقعے دے وچ شریک سن جِنا ایس سوانی دے نال ظلم کیتا اوہ بھاویں کدے آ پ نماز نہ پڑھدے ہون کدے مسجد دا مونہ نہ ویکھیا ہوے .ہو سکدا اے کہ رمضان وچ وی نماز،روزے دے نیڑے نہ جاندے ہون پر جدوں واری آ ئی غلط صحیح دی تے اودوں سبھ توں پہلے اوہ سن ۔جہناں نوں ایہ وی نہیں پتا کہ سوانی نوں مارنا اسلام دے وچ تے جائز نہیں ۔پر اوہناں نوں اس گل دی کوئی سوچ نہیں سی بس ایہ ای سی کہ اس سوانی نے قرآن دیاں آ یتاں والے لیڑے کیوں پاے نیں۔ایتھوں ساڈے معاشرے دے وکھ وکھ پکھ نکلدے نیں ۔

پہلی گل ایہ چیتے وچ رکھو کہ ساڈی جو سوچ اے جو بے عقلی تے جاہلیت اے اسیں اوہنوں اسلام دے نال جوڑ دیندے آں ۔اسیں پرکھدے نہیں کسے گل نوں سمجھنا نہیں بس اپنی سوچ دے مطابق سِٹا کڈھ لواں گے ۔دوجا اے کہ عربی زبان مقدس زبان اے زبان تےویسے کوئی وی بھیڑی نہیں ۔ اس زبان وچ قرآن پاک لکھیا ہویا اے اس لئ اینوں پاک سمجھدے آ ں تے عزت کردے آ ں۔پر ایہدا مطلب اے تاں نہیں کہ کدھرے وی عربی لکھی ہووے گی اسیں ایہ ای سمجھیے کہ اے قرآن پاک دی آ یت لکھی ہوئی اے ۔ساڈے معاشرے دی ایہ ای گھاٹ اے کہ اسیں قرآن پاک نوں بس اندھا دھند پڑھدے آ ں نہ کہ اسیں ایہ کوشش کرئیے کہ اسیں قرآن پاک نوں ترجما تفسیر نال پڑھیے تے ایہنوں سمجھیے ۔اس دے وچ ساڈے پڑھاؤں والے علماء تے مولوی نے جو اوہناں دی بے نیتی تے نے دھیانی اے۔ کسے فلاسفر نے لکھیا اے تے میرا مننا وی اے ای ہے کہ ساڈے کول دین دے ناں تے نیکی واسطے دیون لئی کجھ نہیں پر لین واسطے اسیں ہمیش تیار رہندے آ ں بھاویں اوہ کسے دی جان ہی کیوں نہ ہوے اک دوجے نوں مارن تے تل جاندے نے ۔لوکاں دی جو چھوٹی سوچ اے اوہناں دی جہڑی جاہلیت اے اوندی وجھا دین توں دوری اے بظاہر اوہ پکے مسلمان ہوندے نے ۔تے تیجی گل اے کہ اس وچ غلطی کجھ سوانی دی وی اے اونوں اے پتا ہونا چاہیدا سی اے ساڈے کلچر دے وچ نہیں ساڈے معاشرے دی سوچ اینی وڈی نہیں کہ اوہ اس بھریوے نوں سمجھن ۔جہڑی شے جتھے جچدی ہوے اوتھے اوہنوں ورتیا جاوے ۔جیویں کہ پنجابی اکھان وی اے کہ کھائیے من بھاندا تے ہنڈائیے جگ بھاندا ۔اک پکھ اے وی نکلدا اے کہ کی ساڈے کول ہون لکھت لئی لیڑے ہی رہ گئے سن کہ اسیں ہون اوناں تے بنتر لئی اوناں دی سجاوٹ لئی اکھراں نوں ورتاں گے ۔کئی کپڑیاں تے اقبال دیاں غزلاں تے نظماں لکھیاں نظر آ ندیاں نے کدھرے کجھ تے کدھرے کجھ۔اے ساڈے سماج دی سوچ اے ۔اگر ایس گل دی اصلاح نہ لِتی گئی قرآن پاک دے سمجھن لئی سکھن لئی کوئی قدم نہ چکیا گیا تے اس طرح دے کئ ہور واقعے ویکھن نوں سنن نوں لبھن گے ۔اس توں اے گل ساہمنے آ ندے اے کہ ساڈے سماج دے وچ ساڈے رہتل دے وچ حالے تک اوہ شعور اوہ عقل نہیں جو ہونا چاہی دا اے ۔جو اک تہذیب یافتا قوم دے وچ ہونیا چاہی دیاں نے ۔سانوں لوڑ اس گل دی اے کہ اس معاشرے دی سوچ نوں بدلیا جاوے ۔اس وچوں غلط سوچ نوں کڈھیا جاوے ۔ایہناں نوں زباناں دی بنیادی جانکاری دِتی جاوے۔

٭٭٭٭٭