وارتا لاپ۔۔۔۔۔٭رویل کالم٭

وارتا لاپ۔۔۔۔۔٭رویل کالم٭

تنویر اعظم

روندرصحرا دی ایس کتاب نوں پڑھ کے اک انقلابی جوش پیدا ہوندا اے۔ شاعر نے حکومت تے کھل کے گل بات کیتی اے جہیڑی کہ ایس دور وچ ہر بندا نہیں کر سکدا۔ شاعر نے نظماں وچ عشق دی گل نہیں کیتی سگوں اپنڑے دیس لئی بیانیا اے۔ ایس کتاب دیاں نظماں توں سانوں ایہ سبق ملدا اے کہ سانوں اپنے دیس لئی اپنے حصے دا کم کرنا چاہیدا اے اک نا اک دیہاڑے اسیں ضرور اپنے مقصد وچ کامیاب ہوواں گے۔

شاعر نے کتاب وچ لفظ تھوڑے اوکھے ورتے ہن تے شعر وی نکے ہن جہناں نوں سمجھنا تھوڑا اوکھا اے۔ کجھ لفظ انج دے وی نیں جہنا دا مطلب دو طرحاں ہوندا اے۔

ایس کتاب وچوں مینوں جہڑی نظم چنگی لگی اے اوہ اے "ساڈا تاں کجھ وی ونڈیا نہیں" ایہ نظم کتاب دے صفحہ نمبر 92 تے ہے۔

روندرصحرا ایس نظم وچ لہندے تے چڑھدے پنجاب دے لوکاں دی گل کردے نیں اوہ لکھدے نیں کہ آ جا آپاں انج ملیے جیویں کدی وچھڑے ای نہیں ساں ایس باڈر دے ایدھر اودھر بہہ کہ اک دوجے نوں کیوں گھور گھور کے ویہندے ہاں۔ ساڈا تاں کجھ وی ونڈیا نہیں ساڈے بابے وی اک ساڈا رب وی اک فیر ونڈ کاہدی کجھ ونڈا ہے نیں پر سانجھا بوہتیاں نیں ۔ اسیں پنجاب دے واسی آں ۔ انج پتا تہانوں وی اے تے سانوں وی اے کہ ساڈے حکمران اک دوجے نال ملدے ملوندے نیں پر ساڈے وچ اوہناں وکھرویں پا دتے نیں۔ ساڈے سپنے مٹی وچ دب دتے نیں۔ ہن غصیاں، گلیاں، روسیاں، شکویاں نوں دور کر کے آپس وچ میلے۔ اسیں اک پنجاب دے واسی سی پر سازش کر کے سانوں اک دوجے توں وکھ کر دتا اک لیہندا پنجاب تے اک چڑھدا پنجاب بنا دتا۔

روندرصحرا دی کتاب وار تالاپ (پنج کتابی چون) پہلی وار فروری 2024ء وچ چھاپے چڑھی اے۔ ایس دا مل 500 روپے اے ۔ ایس دے 192 صفے نیں۔ ایس وچ 64 نظماں نیں۔

٭٭٭٭٭