اورینٹل کالج پنجاب یونیورسٹی لاہور وچ ادارہ پنجابی سُلیکھ تے رہتل سار ولوں پروفیسرڈاکٹر شہباز ملک ہوراں دی یاد وچ ہرکھ اکٹھ۔۔۔٭رویل خبر٭

اورینٹل کالج پنجاب یونیورسٹی لاہور وچ ادارہ پنجابی سُلیکھ تے رہتل سار ولوں پروفیسر ڈاکٹر شہباز ملک ہوراں دی یاد وچ ہرکھ اکٹھ۔۔۔٭رویل خبر٭

پروفیسر ڈاکٹر شہباز ملک دی یاد اندر ہرکھ اکٹھ وچ اُچیچے پروہنے جناب مدثر اقبال بٹ سن،صدارت پرنسپل اورینٹل کالج پروفیسر ڈاکٹر نبیلہ رحمان ہوراں نے کیتی‘ڈائریکٹر دیال سنگھ ریسرچ سنٹر پروفیسر ڈاکٹر عبدالرزاق شاہد ہوراں خصوصی رلت کیتی٭

رپورٹ (لاہور توں اُچیچا نمائندا رویل)پنجاب یونیورسٹی لاہور دے پروفیسر ایمریطس تے سابق صدر شعبہ پنجابی پروفیسر ڈاکٹر شہباز ملک ہوراں دے چلانا کر جاون مگروں اورینٹل کالج وچ ہرکھ اکٹھ دا پربندھ پنجابی ادبی مجلس‘ ادارہ پنجابی سُلیکھ تے رہتل سار ولوں کیتا گیا جہدے وچ اپنیاں یاداں سانجھیاں کردیاں ہویاں سبھ توں پہلاں پروفیسر ڈاکٹر نبیلہ رحمان ہوراں نے ایس اکٹھ بارے تے ڈاکٹر شہباز ملک دی شخصیت دے حوالے نال اُچیچی گلبات کیتی اوہناں دا کہنا سی کہ اوہ با اُصول انسان تے بہترین اُستاد سن جہناں نے پنجابی زبان و ادب وچ انملا وادھا کیتا تے نویں آون والیاں واسطے زبان دی ترقی واسطے نویاں راہواں بنائیاں۔اوہناں دا مزید کہنا سی کہ آپ نے ساری حیاتی جو کم کیتا اوہ وڈے وڈے ادارے وی نہ کرسکے تے اوہناں نے جس شعبے دی نینہہ رکھی سی اوس نوں ہُن ادارہ دا روپ دے دتا گیا اے جہدے وچ پروفیسر ڈاکٹر ظہیر شفیق ہوراں دا وی وڈا حصہ اے۔پروفیسر ڈاکٹر شہباز ملک ہوراں نے 1979وچ اک کھوج پرکھ دا رسالہ شروع کیتا جہدے وچ معیاری لیکھ چھاپے جانا آپ دیاں ای کاوشاں دا سِٹہ سی۔ایس کھوج وچ چڑھدے پنجاب وچوں وڈے وڈے ناواں دیاں لکھتاں نوں گُرمکھی توں شاہ مُکھی وچ کر کے شایع کیتا جاندا سی تے ایس دے معیار دے بارے گل کردیاں ہویاں آپ دا کہنا سی کہ پروفیسر ڈاکٹر شہباز ملک ہوراں دے دَور وچ ایس نوں اِک معیاری رسالہ وجوں جانیا جاندا سی جس نوں اج وی برقرار رکھن دا جتن کیتا جا رہیا اے۔پروفیسر ڈاکٹر شہباز ملک ہوراں نے ”کھوج“ نوں باقاعدہ چھاپیا تے ایس دے معیار نوں وی قائم رکھیا۔پروفیسر ڈاکٹر شہباز ملک ہوراں نے جہڑا ”پنجابی کتابیات“ دا کم کیتا اے اوس نوں کدے وی وساریانہیں جا سکدا اے ایہ پنجابی زبان و ادب نوں اوہ دین اے جس دی دین کوئی وی نہیں دے سکدا اے۔

پروفیسر ڈاکٹر نبیلہ رحمان ہوراں توں مگروں گلبات کردیاں پروفیسر ڈاکٹر سعادت علی ثاقب ہوراں نے اوس ویلے دیاں یاداں سانجھیاں کیتیاں جد اوہ ہاسٹل وارڈن وی سن تے اوہناں دا ورتارا پڑھیاراں نال اِک شفیق باپ ورگا سی۔کلاس وچ ڈاکٹر شہباز ملک ہوریں مکمل تیاری نال تشریف لیاندے تے ایس دے نال نال اوہ اپنی کھوج پرکھ نوں وی معیاری رکھن وچ اپنا کردار ادا کردے سن۔

پروفیسر ڈاکٹر ظہیر شفیق ہوراں نے بطور شاگر د اپنے اُستاد نال بیتیاں یاداں نوں بیانیاں تے کہیا کہ ڈاکٹر شہباز ملک ہوریں اپنی ذات وچ آپ اِک ادارہ سن اوہناں نے پاکستان دے حوالے تے اسلام دے حوالے نال اپنے نظریات اُتے کدی وی سمجھوتا نہیں کیتا سی۔ پروفیسر ڈاکٹر نوید شہزاد ہوراں نے پروفیسر ڈاکٹر شہباز ملک ہوراں دے حوالے نال گلبات کردیاں اوہناں دا کہنا سی کہ اوہ باقاعدہ تاں اوہناں دے شاگرد نہیں پر اوہناں دے شاگرد پروفیسر ڈاکٹر عصمت اللہ زاہد کولوں اگوائی حاصل کردے رہے اوہناں دے با اُصول تے نظریاتی ہوون نوں سراہیا۔

ڈائریکٹر دیال سنگھ ریسرچ سنٹر پروفیسر ڈاکٹر عبدا لرزاق ہوراں دا کہنا سی کہ حاضرین وچوں اوہناں نے سبھ توں ودھ ویلا ڈاکٹر شہباز ملک ہوراں نال گزاریا سی اوہناں دیاں کتاباں آون والیاں واسطے چانن کھلاردیاں رہن گِیاں خاص طور تے اوہناں دی کتاب ”ساڈے اکھان“ اجہی کتاب اے جہدے وچ کرڑ ی محنت لائی گئی سی اوہناں دا ہور فرمانا سی کہ ایہی کتاب وچ اوہناں دی ڈھیر محنت نوں نہیں بھُلایا جا سکدا اے۔

پروفیسر ڈاکٹر شہباز ملک ہوراں دے بارے گلبات کردیاں ایڈیٹر روزوار ”بھلیکھا“ جناب مدثر اقبال بٹ ہوراں دا کہنا سی کہ آپ نے اپنے ودھیا نظریات نوں کدے وی نہیں چھڈیا تے اوہ اپنی سوچ دے واحد انسان سن جو ہور نہیں ہو سکدا اے اوہناں دے اپنے دیس بارے حُب الوطنی دے جذبیاں نوں جِنی وی قدر دی نگاہ نال ویکھیا جاوے گھٹ اے۔پنجابی ادب دی تواریخ جدوں وی لکھی جاوے گی آپ دا ناں سنہری حرفاں وچ آوے گا۔ایس توں مگروں فاتحہ خوانی واسطے پروفیسر ڈاکٹر عرفان الحق ہوراں نوں سَدّیا گیا جہناں نے پروفیسر ڈاکٹر شہباز ملک ہوراں دی مغفرت واسطے دُعا کروائی تے ایس ہرکھ اِکٹھ دا اختتام پروفیسر ڈاکٹر شہباز ملک ہوراں دیاں اگلیاں منزلاں دی اَسانی دیاں دعاواں نال مُک گیا۔

٭٭٭٭٭