سورج بارے دلچسپ گلاں۔۔۔۔آفاق سومرو/ترجما:صوبیہ اسلام۔۔۔۔٭رویل ٭

سورج کائنات دی سبھ توں حیرت انگیز تے گنجھلک تخلیقات وچوں اک اے۔تہاڈے لئی کجھ منفرد تے دلچسپ جانکاری دیندا ہاں جو عام طور تے گھٹ ای کدھرے ملدیاں نیں:

1. سورج دی اَواز

سورج مستقل طورتے "گُنگنا" رہیا اے، پر ایس اَواز نوں خلا وچ سننا ممکن نہیں کیوجے اوتھے کوئی ذریعہ (medium) نہیں اے جو اَواز نوں منتقل کرے۔ ناسا نے سورج دی سطح تے موجود پلازمے دیاں حرکتاں نوں ڈیٹا وچ تبدیل کرکے اوہدی اَواز تخلیق کیتی اے، جو گھٹ فریکوئنسی دی اک گہری اَواز اے۔

2. سورج دے دِل دا دباؤ

سورج دے مرکز وچ دباؤ 340 بلین گنا ودھ اے۔ زمین دےسمندر دے دباؤ توں ایہ دباؤ اینا ودھ اےکہ ہائیڈروجن دے ایٹمز آپس وچ رل کے ہیلیئم وچ تبدیل ہو جاندے نیں تے ایہ عمل سانوں روشنی تے توانائی دیندا اے۔

3. فوٹون دا سفر

اک فوٹون (روشنی دا ذرا) جدوں سورج دے مرکز وچ پیدا ہوندا اے تے اوہنوں سورج دی سطح تیک اپڑن وچ تقریبن 1 لکھ ورھے لگدے نیں، ایہ ایس پاروں اے کہ فوٹون سورج دے اندرونی حصیاں وچ کئی واری جذب تے اِک وار فیر خارج ہوندا اے، جہدے توں ایہدا پینڈا انتہائی سست ہوجاندا اے۔

4. سورج دی سطح دا رنگ

بھاویں اسیں سورج نوں پِیلا ویکھنے آں پر حقیقت وچ سورج دا اصل رنگ چٹا اے، زمین دی فضا سورج دی لو نوں کھلاردی اے جہدے پاروں اوہ زرد وکھالی دیندا اے۔

5. سورج دے مقناطیسی طوفان

سورج دے مقناطیسی طوفان، جہنوں "سولر فلیئرز" آکھدے ہاں ، اینے طاقتور ہوندے نیں کہ جے اوہناں دی توانائی نوں زمین اتے استعمال کیتا جاوے تے اک فلیئر پوری دنیا نوں ہزاراں ورھیاں تیکر بجلی فراہم کرسکدا اے۔

6. سورج دا وزن

سورج دا بھارلگ بھگ 1.989 × 10³⁰ کلوگرام اے، جو زمین دے بھار توں 330,000 گنا ودھ اے۔ایہ اینا بھاری اے کہ ایہ پورے سولر سسٹم دے ماس دا 99.86% حصا اے۔

7. سورج دا مستقبل

سورج لگ بھگ 4.6 بلین سال پرانا اے تے ایہ مزید 5 بلین ورھیاں تیکرجیوندا رہوے گا۔ پر آخر کار ایہ اپنے اندر موجود ایندھن ختم کر دیوے گا تے اک "ریڈ جائنٹ" وچ تبدیل ہوجاوے گا، جہدے بعد ایہ اک "وائٹ ڈوارف" بن جائے گا۔

8. سورج دوالے حرکت کرن والیاں شیواں

صرف سیارے ای نہیں، سگوں ہزاراں سیارچیاں (asteroids)، دمدار ستارے (comets) تے خلائی ملبا وی سورج دوالے گھمدا اے۔ سورج دوالے ایہ ساریاں شیواں دا کشش ثقل راہیں بنھے ہونا سانوں ایہدی طاقت دا اندازہ دیندا اے۔

9. سورج دے دھبے

سورج دے دھبے (sunspots) اوہ علاقے نیں جیہڑے نسبتا ٹھنڈے ہوندے نیں، ایہ دھبے سورج دی سطح اتے مقناطیسی سرگرمی دے نتیجے وچ ظاہر ہوندے نیں تے زمین دے موسم اتے اثر انداز ہوسکدے نیں۔

10. سورج دی روشنی دا ویلا

سورج دی لونوں زمین تیکر اپڑن وچ لگ بھگ 8 منٹ تے 20سیکنڈ لگدے نیں، ایہدا مطلب اے کہ جدوں اسیں سورج نوں ویکھدے ہاں تے اسیں اوہنوں ماضی وچ ویکھ رہے ہوندے ہاں۔

سورج دی تخلیق دے حیرت انگیزپکھاں بارے معلومات رب سوہنے دی تخلیق دی عظمت نوں بیان کردیاں نیں۔

٭٭٭٭٭