ریاست' ماں اَتے سپین جاندی ڈُبی بیڑی۔۔۔۔٭رویل کالم٭

ویدک دھرم والیاں نے ماتر بھومی دا خیال پیش کیتا اے‘ ایہ ماتر بھومی اپنی لوکائی دی راکھی کردی اے تے اوس دی فلاح بہبود واسطے دِن رات اِک کر دیندی اے ایہ ساریاں سیواواں نہیں سگوں ریاست دا پہلا فرض ہوندا اے جس نوں ریاست ہر صورت وچ پورا کردی اے تے اوہ ریاست اپنی لوکائی تے مہربان رہندی اے۔ایہ کرن نال ریاست طاقتور ہوندی اے اوس نوں مان مِلدا اے تے اوتھوں دی لوکائی اپنی ریاست نال اجہی جُڑ جاندی اے کہ اوہ اپنے دیس تے دستور دے ورودھی ہو ای نہیں سکدے نیں۔پراتن روم ول دھیان مارئیے تاں اوتھے وی "ماتر روما" دا تصور مِلدا اے ریاست مرکزی ماں وانگ ہوندی اے جو دیس واسیاں دی دیکھ ریکھ وچ سبھ توں اگے اگے ہوندی اے۔ فرانس والیاں نے اپنی ریاست نوں ماں ای کہیا اے جو برابری‘ آزادی تے دیکھ ریکھ نوں فرض من چُکی اے۔ ایہو جہیاای خیال سانوں امیر المومنین حضرت عمر بن خطاب ؓ دی آکھی گل توں وی ملدا اے جو دوجے خلیفہ سن تے اپنے عدل وانصاف دی وجھا تاں اسلامی تواریخ وچ وکھری پچھان رکھدے سن اوہناں دا فرمان سی ”دریائے فرات دے کنڈے تے جے کوئی کُتا وی بھُکھا مرگیا تاں اوس دا ذمے دار حکمران ہووے گا“ ایہدے وچوں وی ماں وانگ ذمے داری دا تے اپنے فرضاں دا احساس اُگھڑواں مِلدا اے۔

اوکاڑا وچ سکالرشپ جِتن والے پڑھیاراں نال خطاب کردیاں وزیراعلا پنجاب مریم نواز نے کہیا کہ سانوں ایس دھرتی نال مخلص ہونا چاہیدا اے کیوں جے ایہ دھرتی ساڈی ماں اے۔اوہناں نے ایس دھرتی نال ناتا مضبوط رکھن دی پریرنا دیندیاں دسیاپڑھیاراں نوں بغیر کسے فرق دے وظیفے دِتے گئے نیں‘پڑھیاراں نوں اوہناں دی قابلیت دی وجھا توں ای وظیفے دِتے گئے نیں۔

اِک پڑھیار نے لال پھُلاں دا گجرا وزیراعلا پنجاب مریم نوازنوں پیش کیتاتاں سوانیاں ولوں تاؤڑیاں دی تعداد ودھ گئی۔اپنی گلبات وچ اوہناں دا کہنا سی کہ سانوں نفرتاں دی لوڑ نہیں سگوں اِکمُٹھ ہوون دی لوڑ اے۔ وزیراعلا پنجاب مریم نوازنے اپنی سیاسی جماعت ولوں ترقی واسطے کیتے گئے پراجیکٹس دا وی ذکر کیتا اوہناں دا کہنا سی جہڑے وی قابلِ ذکر پراجیکٹس نیں اوہ ساڈی ای جماعت ولوں نیں۔

اودھر جے دوجے پاسے دے سیاسی حالات ویکھے جاون تاں ساہمنے آندا اے کہ بشریٰ بی بی نوں پنج لکھ جُرمانا تے ست ورھیاں دی قید سزا سُنا دِتی گئی اے جد کہ بشریٰ بی بی دے گھر والے نوں وی عدالت نے مجرم ثابت ہوون دا حکم سنایا اے۔ایس فیصلے مگروں القادر یونیورسٹی نوں سرکاری تحویل وچ لے لیا گیا اے۔

ایہ تاں سن کجھ سیاسی گلاں جو ریاست دے ماں ہوون توں مگروں کھلیاں اکھاں نال ایدھر وی ویکھن دی لوڑ اے لیپ ٹاپ ونڈے گئے‘ جیلاں نوں بھریا گیا پر بھکھے نوں کیہ روٹی لبھی یاں بے روزگاراں دی گنتری گھٹنا شروع ہو گئی ایہ تاں بنیادی مسئلیاں دی کان نیں جہناں نال ایہ سبھ ودھدا ای جا رہیا اے۔ماواں تاں اپنی اولاد نوں ڈُبدیاں نہیں ویکھ سکدی اے۔ساڈے دیس واسی تاں ہر دو مہینیاں مگروں بدیس جاندیاں جاندیاں ڈُب رہے نیں کیوں جے اوہ مالی اوکڑاں نال جھوجھدے بے بس ہوئے پئے نیں۔

وزیر اعلا پنجاب ولوں لیپ ٹاپ ونڈے جا رہے نیں کھوج کرن لئی پریرنا دِتی جا رہی اے پر اجہے وسائل کیوں نہیں پیدا کیتے جا رہے نیں جس نال ریاست اپنی رعایا واسطے فلاح بہبود دا پربندھ کر سکے۔ریاست نوں تاں کجھ سیاسی آگوواں دے حوالے نہیں کیتا جا سکدا اے۔ریاست نوں ضرور اپنی لوکائی نوں محفوظ رکھنا چاہیدا اے جے اوہ اپنے لوکاں نوں اپنا وفادار بنانا چاہندے نی تاں اوہناں نوں ماں دے کردار نوں اپنانا ہووے گا ماں دی ہوند وی تاں اپنے بالاں نال ای ہوندی اے۔ریاست نوں روزگار دے وسیلیاں نوں ودھاون ول وی دھیان دینا چاہیدا اے ایسے معاشی حالات پیدا کیتے جاون جس نال اوہ اپنے دیس وچ رہن نوں ای ترجیح دیون۔بھکھے ڈِھڈاں نال لیپ ٹاپ تے کیہ کھوج ہووے گی۔سیاسی قیدیاں نوں ہور قید کرن نال عام بندے نوں کیہ فائدا اپڑے گا؟

سپین واسطے جاندی بیڑی وچ چُتالھی بندے پاکستانی سن جد کہ چھے بندے کسے ہور دیساں وچوں سن اوہ وی تاں ایسے ای ریاست وچوں نس کے جا رہے سن جہناں نوں قبولیا نہیں گیا ہونا یاں اوہ اپنے بنیادی حقاں واسطے ترسدے رہے سن۔ایہ چتالھی بندے کیوں بدیس ہنڈاون لئی اینے اتاولے ہوئے پئے سن اوہناں دے جیون وچ اوکڑاں اینیاں ودھ گئیاں ہوون گِیاں کہ اوہ ایہناں اوکڑاں نوں دُور کرن واسطے ریاست ماں نوں وی چھڈن لئی تیار ہوئے پئے سن۔ماں نوں کیوں نہیں ایہ دِسدا پیا کیہ ریاست اپنے سارے فرضاں نوں پوری کردی پئی اے ایس طرحاں دے سوالاں دے جواب نوں سمندر دیاں چھلاں دے حوالے کر دِتا گیا اے۔

ایہ حقیقت نوں مننا وی پینا اے کہ بے روزگاری ودھ رہی اے تے ایہدے نال عام انسان دا جینا اوکھا ہو گیا اے۔صرف جیوندے رہن دے ای لالے پے گئے نیں ……بد امنی نوں روکنا وی ضروری اے تاں جو دیس واسیاں نوں ہر پاسے امن تے سُکھ نال رہن لئی ماحول سازگار بن جاوے جے ایہناں پاسے کوئی دھیان نہ دِتا گیا تاں بیڑیاں ڈُبدیاں رہن گئیاں حالے گل پچانوے چھیانوے فیصد تک اپڑ چکی اے نہیں تاں سو فیصدی ای پاکستانی ہوون وچ دیر نہیں لگنی اے۔ریاست‘ ماں ہوندی اے تے ماں نوں اپنے بالاں نوں ڈُبنوں بچانا ای بچانا ہوندا اے۔

بیڑیاں ڈُب رہیاں نیں۔

ریاست اِک ماں وانگر ہوندی اے تے جس ماں دے بال رُڑھدے رہن گے دیسوں بدیس جاندے رہن گے اوہدا مستقبل کیہ ہووے گا؟؟

٭٭٭٭٭