ہُشیار سِنگھ……اِک ودھیا پنجابی فِلم۔۔۔۔٭رویل کالم٭

کُجھ فِلماں ہوندیاں نیں جو تہانوں لمے چِراں تیکر یاد رہندیاں نیں ایہ اوہ فِلماں ہوندیاں نیں جہناں نال تُسیں بڑے جذباتی ہو کے جُڑ جاندے او، جہدے کئی کارن ہو سکدے نیں ایہ کارن اوس فلم دی موسیقی،کہانی،ہیرو یاں ہیروئن دی بہت ودھیا اداکاری تے تہاڈی اپنی پسند نا پسند جو اوہناں وچوں تہاڈا اپنا آپ جھلکارے مارن لگ جاندا اے۔ پچھلیاں کجھ دہاکیاں توں پنجابی فلم نے لہندے پنجاب وچ تاں اپنے جھنڈے گڈے رکھے سن پر ہُن ایس نوں زوال آیا ں وی دو تِن دہاکے تاں ہوون والے ای ہونے نیں۔چڑھدے پنجاب وچ پنجابی فلم دا مطلب ہوندا سی صرف مزاح ای مزاح،سالے سالے کہہ کے گل کرنا تے فیر وچ وچ گالھاں دا تڑکا جہیا لانا جس نال پنجابی فلم نوں صرف ہاسے والی ای کوئی انوکھی شے بنا دِتا گیا سی۔پنجابی فلم دا ناں لیندیاں ای ہاسے وچ گل پے جاندی سی ایس نوں ویکھدیاں ویکھدیاں جدوں ہندی فلم وچ کوئی بے وقوف کردار پانا ہوندا جو غیر حاضر دماغ رکھدا اے،چُٹکلے سُناندا اے تاں اودوں اوس دے موہوں پنجابی بُلوا کے اوہنوں ہاسے ٹھٹھے دی زبان بنا کے پیش کیتا جاندا تے لوکی پنجابیاں نوں ایسے ای غیر حاضر دماغ والے تے احمق ای منن لگے سن جہناں نوں کوئی لتھی چڑھی نہیں ہوندی۔ پنجابی موسیقی دی گل کرئیے تاں اوس توں بغیر کوئی وی وڈی ہِندی تے اجکل تیلگو یاں ملیالم فِلم ہِٹ ای نہیں ہو سکدی…… خیر گل ہور رہی سی پنجابی فلم دی لہندے پنجاب وچ تاں پنجابی زبان نوں جِنے مسئلے نیں اُنجے دے مسئلیاں نال فلم انڈسٹری وی شکار ہو چُکی اے پر پچھلے کُجھ ورھیاں توں چڑھدے پنجاب وچ اجہیاں فلماں بن رہیاں نیں جہناں نے پنجابی سینیما دا مہاندرا ای بدل کے رکھ دِتا ہویا اے ایہناں کول اجہیا جاندار مواد ہوندا اے جو ویکھنہاراں نوں اپنے نال جوڑ لیندا اے۔ایہدے وچ بڑے جاندار موضوعات اُتے فلماں بنائیاں جا رہیاں نیں اوہ بھاویں برصغیر دی ونڈ بارے فلم ہووے یاں پنجاب بارے تواریخی گل ہووے اوس اُتے سوہنیاں فلماں بن رہیاں نیں تے پنجابی فلم ویکھن والیاں نوں ہُن ایہ وی پک ہو گیا اے کہ فلم والیاں کول صرف ہاسے ٹھٹھے دی گل نہیں اے۔ہور تے ہور چڑھدے تے لہندے پنجاب دے اداکاراں دی سانجھ نال نویں موضوعات تے فلم بن رہی اے جس وچ پوری دُنیا وچ کھِلرے پنجابیاں دی گل ہو رہی اے تے اوس نوں اینی جذباتی پییشکش دِتی جاندی اے کہ لوک حدوں ودھ پنجابی سینیما نوں پسند کرن لگے ہن۔کوئی اِک ڈیڈھ مہینے پہلاں ”ہُشیار سنگھ“ فلم دا ٹریلر ویکھیا …… ویسے ایہ گل وی چیتے رکھن والی گل اے کہ ایہ ٹریلر ستیندر سرتاج ہوراں دی فلم ”شاعر“ ویکھن توں بعد ویکھیا گیا اوہناں دی گائیکی دے چاہیوان تاں لہندے پنجاب وچ ہے ای سن ایس فلم مگروں اوہناں دی اداکاری دے دلدادا وی ہو گئے۔اسیں وی اوہناں دے دلدادا ہوون دی وجھا توں ای جدوں ہُشیارسنگھ ناں دے کردار اُتے فلم دے حوالے نال ویکھیا تاں ایس دی اُڈیک رہن لگی۔خیر ایتھے سینمے وچ تاں ایہ فلم نہ لگ سکی پر سانوں کسے نہ کسے طرحاں ایس نوں حاصل تاں کرنا سی فیر بازاراں وچ بیٹھے اوہناں ”جگاڑو“ فلم والیاں کولوں ایہ یو ایس بی وچ کُل وِیہ روپے دے کے حاصل کیتی گئی تاں عید دیاں چھٹیاں وچ ایس نوں ویکھن بارے پروگرام رکھیا گیا۔ستیندر سرتاج نوں ویکھنا تے اوس دی گائیکی نوں سُنن نال عید دیاں خُشیاں دُگنا ای تاں ہونیاں سن…… ایہ فلم ای شروع کئی سوالاں توں ہو جاندی اے جو فلم ویکھن والیاں واسطے دلچسپی دا کارن ہوندی اے۔

ساری فلم وچ سنجیدگی وی نہیں چھائی ہوئی اے سگوں ہلکے پھلکے انداز نال ایس نوں اگانہ نوں ٹوریا گیا اے جو فلم ویکھنہاراں نوں اَکھ وی جھپکن نہیں دیندی اے۔ہُشیار سنگھ دا کردار تاں ہے ای شروع توں کِیل لین والا پر باقی کرداراں نے وی فلم نوں ہور جاندار کرن وچ اپنا وڈا کردار ادا کیتا اے۔غلط انگریزی لفظاں دا اُچارن کرن والی میڈم تاں اینی سوہنی اداکاری کر رہی ہوندی اے کہ اوس دے اُچار ن نوں ٹھیک کراندیان کراندیاں ہُشیار سنگھ وی اوسے دا ای ہو کے رہ جاندا اے۔ایتھے ایہ وی دسنا ضروری اے کہ ایہ رومانوی پکھ جیون وچ سُچج پُنے نال آیا اے کوئی وادھو دا مواد نہیں اے تے سوانی دے کردار نوں کسے طرحاں وی شو پیس دے طور تے نہیں ورتیا گیا اے۔ہُشیارسنگھ دے کردار دوالے گھمدی ایس کہانی نوں اودوں ہور سنگین انداز نال پیش کیتا جاندا اے جدوں سکول دا اِک ملازم بولدا اے

”ماسٹر جی سارا سسٹم ای ڈھا کے بناون والا اے“

اِک ہور وڈا کردار اے ”تھانا سنگھ“ دا ایہ اجہیا کردار اے جو ہر لمحے شراب وچ دُھت اے ڈائریکٹر نے ایس نوں اینا جاندار وکھایا اے کہ ساہت نال جُڑیا بندا سمجھ جاندا اے کہ ایہدے پِچھے کجھ نہ کجھ ضرور لُکیا ہویا اے اوہ حاضری رجسٹر دے نال ای شراب دی بوتل لکو کے گھٹ گھٹ جیون نوں جی رہیا اے تے اوہدے اندر جہڑا درد اے اوہ فلم دے اِک اِک سین نوں ویکھدیاں محسوس کرن دی لوڑ وی پیندی اے اوہ اپنی اُنگل تے انگوٹھے نال ذرا کُو وِتھ بنا کے ہُشیارسنگھ نوں ہمیش ایہی نصیحت کر رہیا ہوندا اے

”سسٹم وچ آ جاؤ تے چنگا رہو گے“

”سسٹم وچ آ جاؤ تے چنگا رہو گے“

ہُشیارسنگھ تاں سسٹم دے ای تاں خلاف اے اوہ اُنگل چُکدا اے۔ سوال کرن لئی،سوال دا جواب لبھن لئی لوکائی نوں سوال سکھان لئی ایہ پریرنا دیون لئی کہ سِکھن لئی سوال کِنا ضروری اے۔ ساڈے سماج وچ جہڑیاں گلاں توں مناہی اے اوہ سوال ای تاں ہے جس دی لوڑ وی اے تے ایس سبھ توں اہم کم نوں سبھ توں غیر ضروری مِتھیا گیا اے تے سوال کرن والے نوں پاگل بنا دِتا گیا اے۔

”کوئی وی ایتھے سسٹم نوں بدلن دی کوشش کرے گا تے اوہنوں بدل دِتا جاوے گا“

”چُپ چاپ نوکری کری جاؤ“

ہُشیار سِنگھ سوال کردا اے جدوں اوہ ودیارتھی سی اوس ویلے وی تے جدوں اوہ اُستاد(ادھیاپک) بن جاندا اے اودوں وی اوہ سسٹم واسطے اِک وڈا سوال بن جاندا اے تے سسٹم اوس نوں کراہے پاون لئی ڈاک تے ڈاک گھلی جا رہیا اے۔ایس نوں ویکھدیاں تاں نشانکاری وی ہو جاندی اے کہ پنجاب بھاویں چڑھدا ہووے یاں لہندا تعلیم دے محکمیاں وچ حالات اِکو جہے ای نیں تے اُستاداں کوں پڑھاون توں وکھ باقی ہر کم لیا جاندا اے جس نال نویں نسل دے ودھیا مستقبل دا کوئی تعلق نہیں ہوندا ستاد کدی ڈینگی مچھراں نوں لبھدا پیا اے،کدھرے پولیو دے قطرے پیاون واسطے کُولر چُکی پھردا اے تے کدھرے مردم شماری تے کرب ناک الیکشن ڈیوٹی…… تے انج دے انیکاں کماں وچ اُستاد نوں اینا اُلجھاؤ کہ اوہ تھانا سنگھ بن کے بغاوت ای کر جاوے یاں کسے ہور دیس ول نوں مونہ کر جاوے۔سائنس پڑھاون والا اُستاد بابیاں دے پِچھے اے تے اوس کول کتاب دی کھوج دی گل ای کوئی نہیں رہ گئی……”ایتھے خوبصورتی وی تاں گناہ اے“

ہُشیار سِنگھ نوں کئی اوکڑاں دا ساہمنا کرنا پیندا اے اوہ سکول وچ اُستاد تاں بن گیا اوس نال کیہ واپردی اے اوس دا رومانوی پکھ کِنا کُو کامیاب ہوندا اے ایس نوں تُسیں ویکھو تے چس مانو جے میں ساری کہانی ای تہانوں دس دِتی تاں تُسیں ایس توں کُجھ لبھ نہیں سکنا ایس لئی ودھیا فلم نوں ضرور ویکھو۔

ایس پنجابی فلم ”ہُشیار سِنگھ“ نوں دِل تے دماغ دیاں اکھاں کھول کے ویکھنا ایہدے وچ پِنڈ اِک پِنڈ نہیں اے پورا پنجاب سگوں ساری دُنیا دے واسی نیں جو ’سہولتاں‘ بھال رہے نیں۔ان پڑھ سرپنچ اِک نہیں اے ایہ تہانوں آل دوالے وی اپنی حیثیت توں وکھ مان مرتبہ لیندے کرداراں نوں وی ساہمنے لیاوے گا،پرنسپل جو سرکاری نوکری تاں کردا اے پر اوس نوں بُہتی وفاداری اپنے ”کاروبار“ نال اے،بدیسوں آئے لوک کِویں ہر پنجابی نوں پیسیاں نال تولدے نیں اوہ وی مِلے گا تے سبھ توں اُچچی گل ستیندر سرتاج دی مدھ بھری واج تے اوس دی شاعری۔۔اوہ پنجابی دے ہر اکھر نوں ٹھیک اُچاردا اے اوس نوں فجول تے فضول وچ فرق بڑی چنگا طرحاں پتا اے۔

ایہ فلم ویکھو گے تاں تہاڈیاں سوچاں نوں وی کھنبھ لگ جاون گے۔۔۔۔۔۔۔۔۔

٭٭٭٭٭