حیدر جاوید سید دی کتاب"پورا سچ" تے اِک جھات

میں ایس کتاب نوں جدوں پہلی وار ویکھیا تے انج لگا جِویں یں ایہ کوئی اسلامی کتاب اے ۔ ایس دے ہر مضمون دی ہیڈنگ وی کجھ ایسے طرحاں دی لگدی اے ۔ سانوں ہر زبان دے ادب دیاں کتاباں پڑھن دی لوڑ اے تاں جے اسیں ویسچ جان سکیے۔حیدر جاوید سید ہوراں دا شمار وڈے صحافیاں وچ ہوندا اے۔ایس کتاب دا انداز بیاں کسے فلم یا ں کہانی دی طرحاں اے اکھاں دی سکرین اگے اِکتوں بعد دوجا موضوع سوہنے تے سلکھنے انداز اندر آندا اے۔ہر مضمون ماضی، حال تے مسقبل دے حالات اتے پورا اتردا نظر آوندا اے۔

حیدر جاوید سید نے اسلامی معاشرے دے علمبرداراں دیاں مثالاں کھول کے ساہمنے رکھیاں نیں کہ کس طرحاں نبی کریم صلی اللہ علیہ وسلم تے اہناں توں بعد خلفائے راشدین نے ریاست نوں انصاف نال مالا مال کیتا۔ تے نال ای نال اجوکے سمے دی حکومت بارے وچار سانجھے کیتے نیں۔

ایہ کتاب 1999 اندر شائع ہوئی اوس ویلے دے حالات کیہ سن جدوں نظر دُہرائیے تے اج وی اپنے چفیرے ایہو نفسا نفسی دا عالم نظر آندا اے۔بہت سارے علماء ، صحابہ ، تے ولیاں دے قول و فعل دا ذکر ایس کتاب وچ ملدا اے۔

ٹائٹل پیج تے حضرت علی ابن ابی طالب ، حسین بن علی، اویس قرنی ، منصور حلاج ، ابن عربی ، حجر بن کندی، حضرت نفس ذکیہ، امام ابو حنیفہ ، حضرت جنید بغدادی ، سید عبد القادر جیلانی ، شاہ لطیف ، سامی، بلھے شاہ، شاہ حسین ، سچل سرمست ، سرمد، مست توکلی ، بابا فرید ، مولوی لطف علی، حضرت مخدوم سید جلال دین ، سرخ بخاری، شاہ شمس تبریز رحمان بابا، تے نام لکھے ملدے نیں تے ایہناں سب دی زندگیاں تے آپنے دور اندر بیتے حالاتاں دا زکر وی ایس کتاب وچ ملدا اے ۔

ہر دور دے حالات تے اوس سمے چلن والیاں تحریکاں تے اوہناں دے مقصد نوں وی بیان کیتا گیا اے ۔ ہر مضمون ایک وکھرا تاثر پڑھن والے تے چھڈ جاندا اے۔ کتاب حیدر جاوید سید ہوراں دی اے۔ ایس کتاب نوں اوہناں آپنے شہید والد سید محمود انور بخاری دے ناں کیتا اے۔ایہ کتاب فکشن ہاؤس 18 مزنگ روڈ لاہور ولوں 1999 وچ شائع ہوئی۔کتاب وچ موجود مضامین دی تعداد 68 اے تے کُل صفحے263 نیں۔