امرجیت چندن دی کتاب" دُدھ وچ کانجی  پنجابی دا ستیاناس" شائع ہو گئی اے۔۔۔٭رویل خبر٭

امرجیت چندن دی کتاب" دُدھ وچ کانجی پنجابی دا ستیاناس" شائع ہو گئی اے۔۔۔٭رویل خبر٭

لاہور(نمایندا رویل)پنجابی زبان دی ودھوتری واسطے ہر کھیتر وچ نگھر وادھا ہوندے رہنا چاہیدا اے ۔لسانیات دے حوالے نال پنجابی زبان وچ ڈھیر سارا کم کرن دی لوڑ وی اے جس نال زبان دے ورتارے نوں ودھاوا دِتا جا سکدا اے۔اجہی زبان ورتی جاوے جس نال زبان تے ساہت دی ودھوتری ہووے اوس دی دھرتی تے دھرتی واسیاں نال جُڑئت اٹُٹ ہو جاوے۔" دُدھ وچ کانجی پنجابی دا ستیا ناس " وچ کئی بحثاں چھیڑیاں گئیاں نیں جو پڑھن والیاں واسطے جِتھے اگوائی دیندیاں اوتھے کئی دلچسپ گلاں نوں وی ساہمنے لیاندیاں نیں۔امرجیت چندن دے وچاراں نال پڑھنہار سہمت اسہمت ہو سکدے نیں پر ایہناں گلاں نوں ٹھوس دلیلاں نال خُد ضرور پرکھو تے ویکھو دُدھ وچ کانجی کِنی کُو اے ،ہے وی اے یاں نہیں تے دُدھ نوں شُدھ کِویں رکھیا جا سکدا اے تے پنجابی زبان نوں کِویں سوہنے سلکھنے ڈھنگ نال ورتیا جا سکدا اے جو نویں آون والیاں نوں سیدھ دیوے گا۔ ایس کتاب نوں پڑھن مگروں تہاڈی لکھن وچ ضرور تبدیلی آوے گی تے اوہ تبدیلی مثبت ہووے گی۔ کتاب ترنجن نے اپنی روایت موجب ودھیا ڈھنگ نال " دُدھ وچ کانجی پنجابی دا ستیا ناس" نوں شاہ مُکھی وچ 2025اندر چھاپیا اے ایس کتاب دا لِپی انتر سائرہ نے کیتا اے۔امرجیت چندن دی " دُدھ وچ کانجی پنجابی دا ستیاناس" دا مُل 600 تے کُل صفحے 199 نیں۔ ہُما صفدر نے کتاب دا مُکھ پنا بنایا اے جہدے اُتے شاہ مُکھی تے گُرمکھی رسم الخطاں نوں ورتیا گیا اے ۔ ہر پنجابی لکھن والے،پڑھن والے تے ایس زبان دی ترقی دی آس رکھن والے نوں ایہ کتاب ضرور پڑھنی چاہیدی اے۔