دیپتی ببُوٹا دا شعری پراگا" ٹپیاں دی لے واری" شائع ہو گیا ایس دا لِپی انتر محمد آصف رضا نے کیتا اے۔۔۔۔٭رویل خبر٭

لاہور(نمایندا رویل) چڑھدے پنجابی دے ڈھاہاں انعام جیتو کہانیکارا دیپتی ببُوٹا ہوراں دا شعری پراگا فروری 2025 وچ شاہ مُکھی لِپی وچ چھاپے چڑھ گیا اے۔ایس پراگے اندر وک وکھ وِشیاں تے ٹپے نیں جس نال پنجاب دی رہتل نوں سنبھالا دِتا جانا مقصد سی ایس بارے دیپتی ببوٹا دا کہنا اے" پنجابی رہتل تے ورثے دی جڑھ نوں سنبھالن دی میری ایہ کوشش پنجاب،پنجابی اتے پنجابیت نوں پیار کرن تے ایس نوں دِل وچ وساؤن والیاں دے ہتھ وچ محفوظ اے۔"ایس پنجابی ورثے نال جِنا چر تک موہ پیار نہ ہووے اوہ لفظاں راہیں بیانیا نہیں جا سکدا اے ٗ اوہ اِک ٹپے وچ ایوں اپنے دِل دی گل نوں بیان کردیاں نیں:

رج ورثے نوں پیار دیو

ہتھاں وچ پھڑو قلماں

ماں بولی نوں شنگار دیو

اپنی زبان تے اپنے وسیب نوں اوہناں نے جانیا پچھانیا اے تے اپنی رہتل نوں منوں وسارن لئی اُکا ای تیار نہیں نیں ،پہلا ٹپہ ای لِکھدیاں ہویاں اوہ "پنجابن" بارے انج دسدیاں نیں:

ٹپیاں دی لے واری

کُڑی میں پنجابن ہاں

پواں لکھ اُتے اِک بھاری

تے فیر ایس توں اگلے ٹپے وچ اوہ پنجاب دے گبھرو بارے انج کہندیاں نیں:

ٹپیاں دی لے واری

گبھرو پنجابی نیں

بازی کدی نہیوں ہاری

دیپتی ببُوٹا نے ڈرامے وی لِکھے،کہانیاں وی لِکھیاں تے شاعری وی کیتی۔ اپنی زبان نال موہ نوں اوہناں سبھ توں اگیرے رکھیا اے ۔اوہناں نے ٹپیاں وچ جِتھے رومانوی رنگ نوں بیانیا اے اوتھے اوہ اپنی سوچ اُڈاری نوں وکھ وکھو وِشیاں اُتے لے جا ندے نیں جہدے وچ رشتیاں،سیاستاں،جیون رنگ ،فکراں،دیش بھگتی،پھگن بہاراں دی گل کردیاں کردیاں اپنے ہرمن پیارے وِشے ماں بولی پیار نوں بیان کردے ہویاں کہندے نیں:

لا ایسی کوئی تان ہانیاں

مِٹھڑی پنجابی دا

ودھے جگ اُتے مان ہانیاں

٭

ایسی قلم بنائیں ماہیا

پنجابیاں دا مان ودھے

گیت سُتھرے لکھائیں ماہیا

٭

اِک چرخہ لیائیں ماہیا

تند پاواں ورثے دی

رُوں پینتی دا پِنجائیں ماہیا

٭

جہڑے ماں بولی نال اپنا ناتا توڑ لیندے نیں اوہناں بارے وچار ویکھو:

بُوٹا جڑھ توں ہی پُٹیا اے

سِیر جگ وچوں مُکیا

ماں بولی توں جو ٹُٹیا اے

اوہ ماں بولی نوں لوریاں وچ گونجدا سُنن دے چاہیواں نیں

سُر چھڑیا ربابی دا

لوریاں چ رہوے گُونجدا

گیت مِٹھڑی پنجابی دا

محمد آصف رضا ہوریں دیپتی ببوٹا دے ایس اُدم نوں انج سلاہندے نیں:

"دیپتی ببوٹاہوری چنگی نثر نگار وی نیں،اوہنان ایس حوالے نال کئی انعام وی کھٹے ہن۔اوہ نثر دے نال نال چنگی شاعرہ وی ہن۔ماں بولی دیاں پرانیاں صنفاں نوں جیوندا کرنا وی اپنے ورثے دی سنبھال دے گھیرے وچ آوندا اے،جیکر اسیں ایس توں اویسلے رہے تے وت ہِک ہِک کر کے ساریاں شیواں ساتھوں کھڑاچ ویسن۔"فلیپ

ایس کتاب نوں سانجھا ورثا ، میاں چیمبرز 3ٹیمپل روڈ لاہور،ولوں فروری2025 وچ شائع کیتا گیا ،کُل صفحے 160 تے مُل نہیں لکھیا گیا اے۔