سلطان کھاروی ہوراں دا شعری پراگا"نعت عبادت"۔۔۔۔٭رویل کالم٭

سلطان کھاروی ہوراں دا شعری پراگا"نعت عبادت"۔۔۔۔٭رویل کالم٭

کرامت مُغلkramat Mughal/

نعت لکھن والے شاعر کول جے عشق ِ رسول دا وصف نہیں اے تاں اوہ حق ای ادا نہیں کرسکدا اے سلطان کھاروی ہوراں کول عشق دا جذبا بڑا نرول اے تے اوس دا حق وی اپنیاں لِکھیاں نعتاں وچ اَدا کردے نیں۔" نعت عبادت " اندر نعتاں وچ رسول پاک ؐ دے جیون بارے بھرویں جانکاری مِلدی اے جس توں ایہ گل تاں پکْی اے کہ آپ نے سیرت پاک دا گُوڑھا مطالعا کیتا ہویا اے کدھرے اوہ "شیر خدا ،حیدر صفدر، سلمان،بلال بوذر، "ورگیاں ہستیاں نوں وی عشق دے جذبے نال جوڑدے نیں۔ایسے لئی تاں اوہ رسول پاک ؐ دے جیون دے وکھ وکھ رنگاں نوں نعتاں وچ ڈھالدے ہویاں اپنی محبت دا ثبوت دیندے نیں نال نال اوہ اپنے جیون دے دُکھاں نو ں وی نال نال بیان کردے نیں تے اوہناں دے واسطے دُعا وی کررہے نیں۔ اپنی درد کہانی نوں سُناون لئی

بندا کیوں نہ درد کہانی تینوں پیا سُناوے

تیرے دَر فریادی پکھُو وی زخمایا ہویا

رب تعالیٰ نے وی آپ ؐ دی وڈیائی نوں بیانیا اے جس بارے سلطان کھاروی لِکھدے نیں:

تیرے لئی اوہ کھیڈ کے بیٹھا کھیڈ جہاناں والی

ساڈے لئی جس دھرتی دا ایہ فرش وچھایا ہویا

سلطان کھاروی ہوریں رسول پاک ؐ دی وڈیائی نوں بیان کردے اپنیاں جذبیاں نوں اُلیکدے نیں:

اِکو اِک مثال اے لوکو میرے پاک نبی ؐ دی

دو جہاناں واسطے اوہنوں ربّ سلطان بنایا

آپ کول اجتماعی دُکھ نوں بیان کردیاں ہویاں پاک نبی ؐ اگے عرضوئیاں وی نیں:

چار کُوٹاں مَل کے تے موت وادھے پے گئی

گھٹ گئے نیں جین دے امکان کملی والیا ؐ

اج دا عذاب اے فیر ماضی وانگراں

رَت نہاؤندی پئی اے ساہ دی سان کملی والیا ؐ

اجوکے حالات نوں بیان کردیاں ہویاں رسول پاک ؐ دی تعریف وی کرنا تے سمے دی اوس فوٹو نوں وی واہ دینا جدوں سچ نوں وٹے مارن والیاں دی تعداد ودھ رہی اے ،سلطان کھاروی ہوریں انج بیان کردے نیں:

بال پِچھے پے گئے، پتھر پئے مارن سچ نوں

ہین فر طائف جہے حالات کملی والیاؐ

شاعر نے جو تلمیح ورتی اے اوہدے وچ طائف دےاوہ حالات جدوں اوتھے سچ نوں منن لئی کوئی تیار نہیں سی تے اوہناں رب دے سچے رسول پاک ؐ نوں طائف توں دُور کرن لئی اوباش مُنڈیاں نوں پتھر مارن تے لا دِتا سی پر رحمت للعالمین نے اوہناں دے حق لئی دعا ای کیتی تے اجہے اخلاق دا مظاہرا کیتا جس تے انسانیت قیامت تک صدقے ای جاندی رہوے گی۔

کملی والیاں توں عرضوئی کردیاں ہویاں شاعر اپنی اکھ دی برسات دا وی حوالا دیندے نیں ۔اوہ کہندے نیں کہ ماڑیاں کول کملی والے دی ذات توں وکھ ہور کوئی وسیلا وی نہیں اے تے ماڑا بندا کدے وی ایس وسیلے نوں اکھوں پروکھے نہیں ہوون دیندا اے کیوں جے عاشق رسول واسطے ایہی آسرا ای سبھ توں وڈا ہوندا اے۔کھاروی ہوری تاں زندگی گزارن نوں وی سنت دی وجھا توں ای بیان کردے کہندے نیں:

میں تری سُنت سمجھ کے ای گزاری جا رہیاں

زندگی خالق دی ایہ سوغات کملی والیا ؐ

حضور پاک ؐ ہوراں نے لوکائی نوں سِدھے راہ پایا تے بے امنی نوں مُکا کے امن دی نینہ رکھی۔

رستا اے سوہنے ربّ دا ٹُردا تہاڈے پَیر توں

بے شک زمانا پرکھ لَے ٗ صدیاں رہوے پڑچولدا

سلطان کھاروی ہوراں نے نعت دی روایت نوں نبھاندیاں ہویاں روایتی نعت دے موضوع دا وی حق ادا کیتا اے جِویں عشق ِ نبوی وچ ہجر دی واٹ نوں مُکاون دی آس،مدینے وچ بندگی دی سدھر،مقدراں نال مدینے جاون دی اُڈیک،روضہ حضورویکھن دی تانگھ،مدینہ منورہ ویکھن دی تانگھ تاں ہر مومن دی ہوندی اے لگ بھگ ہر نعت گو شاعر نے مدینے شریف جاون دی سدھر نوں موضوع بنا اے اے، سلطان کھاروی ایوں دسدے ہن:

میرے توں جے شہر مدینے پھیرا پا نہیں ہونا

دِل تے بھار رہوے گا میرا مرن روا نہیں ہونا

روایت دے نال نال سلطان کھاروی ہوراں نے نویکلے پن نوں وی مُکھ رکھیا ہویا اے:

عربی ریگستاناں اندر بَلیاں ہوئیاں اَگّاں تے

پیار وفا دا پانی پا کے ٹھنڈا کر تندور گیا

سلطان کھاروی ہوراں نے" گھڑولی بھرن دی آس"،"نُور دی آمد"،"ہدیا"،"سدّا"،نعتیہ" تے "بشارت" ورگیاں سرناویاں ہیٹھ اپنے موہ بھرے جذبیاں نوں بیان کیتا اے۔نعت لِکھن والا اپنے پورے جتن لا کے عشق دا حق ادا کرنا چاہندا اے پر فیر وی اوس نوں احساس رہندا اے اے کہ حضور پاک ؐ ورگی وڈیائی جاون والی ہستی دی صفت دا حق ادا ای نہیں ہو سکدا اے ایسے نوں ای شاعر دسدے نیں:

لفظاں دے وچ گُنھے کوئی بھاویں چن ستارے

آقا ؐ تیری صفت ثنا دا حق ادا نہیں ہونا

ایہ حسان تےرومی جامی لکھدے لکھدے بیتے

میرے کولوں نعتاں والا قرض چُکا نہیں ہونا

یاں فیر اوہ کہندے نیں:

میں تیری ثنا نوں ادا کر نہیں سکدا

کہ جیون میرا کیہ اے ایویں حباب اے

جس دی صفت سوہنے رب تعالیٰ نے کیتی ہوئے اوس دی صفت انسانی عقل کِویں کر سکدی اے ایسے نوں سلطان کھاروی وی انج کہندے نیں:

تیری صفت ثنا دا ساتھوں حق ادا کیہ ہونا

تینوں تے ہے ذات خدا دی نے وڈیایا ہویا

ایہ نعتاں دا مجموعا پنجابی مرکز لاہور ولوں سوہنے ڈھنگ نال سو گرام چِٹے کاغذ تے چھاپیا گیا اے ،کُل صفحے 128 تے مُل پنج سو روپے اے پہلی وار ایہ کتاب اکتوبر 2025 وچ شائع ہوئی اے۔

٭٭٭٭٭