مظہر ترمذی ہوراں دا شعری پراگا"اِسم ہوا وچ"۔۔۔۔٭رویل کالم٭

مظہر ترمذی ہوراں دا شعری پراگا"اِسم ہوا وچ"۔۔۔۔٭رویل کالم٭

کرامت مُغل/kramat Mughal

مظہر ترمذی ہوری پنجابی زبان دے جانے پچھانے شاعر نیں جو اپنے نویکلے موضوع تے بیانن ڈھنگ پاروں وکھری پچھان رکھدے نیں۔ ایہ شعری پراگا سُفنیاں دے دوالے گھُمدا اے،شاعر نے اجہے جگ دا سُفنا تکیا اے جہدے وچ انھیرا مُک رہیا اے تے چانن ای چانن ہو گیا اے۔ سُفنے آپ دا من پسند موضوع اے لگ بھگ دس اجہیاں نظماں نیں جس وچ سُفنے نیں میں ہُن دیس نہیں آنا ،پٹاری،ایہ تُوں نہیں،اِک شام، اج کل،وارنے،خُشبو ورگیاں نظماں وچ سُفنے نوں موضوع بنایا گیا اے۔ساڈے ایس شاعر نے ہر وار سُفنے دے موضوع نوں وکھرے ڈھنگ نال بیانن دا چارا کیتا اے جو پڑھنہاراں نوں ودھیا لگن گے۔زبیر احمد ہوراں دے بقول اوہ سُفنے کنج کسفنے ہوئے اوس دی گل کردیاں وی آس دا پلّا نہیں چھڈدے نیں جس کر کے ایہ سُفنے وی کسے عام انسان دے سُفنے نہیں جاپدے نیں۔

مظہر ترمذی ہوراں کول کدے کدار اجہیا ویلا وی آ جاندا اے کہ اکھاں وچوں ڈُلھے سُفنے یاداں بن جاندے نیں جہناں نوں سانبھنا اوکھا ہو جاندا اے اتے اوہ ایس نوں " اج کل " ورگی نظم وچ سانبھ دیندے نیں۔زبیر احمد نے دیباچے وچ مظہر ترمذی دی شاعری بارے ایوں اُلیکیا اے:" ایہ آپ ہُدری،آپ مُہاری تے اپنا آپ سرجنہار اے۔" اِک ہور تھاں زبیر احمد ایویں وچاردے نیں۔

" مظہر نوں سچی گل کرن دا کوئی جھورا نہیں اے،اوہنے اَج دے جگ نوں اُلیکیا اے تے بندے نال جو ہوئی اوس دی گل کردا اے تے سُفنے کنج کُسفنے ہوئے اوس دی گل کردیاں آس دا پلہ نہیں چھڈدا۔"

ایس پراگے دیاں نظماں وچ ناسٹیلجیا تے سُفنے اینے کُو بیان ہوئے نیں کہ پڑھنہار وی کسے سُفنے وچ ای جین لگدا اے تے ایہی اوہ سُفنیاں دی دُنیا اے جو شاعر وسا رہیا اے تے پڑھن والے نوں وی نال ای لے ٹُردا اے۔اوہ پڑھن والے نوں لفظاں دی جگالی وچ نہیں پھساندے سگوں اوس دے انتر من دی گل نوں بیان کردیاں اوس اُتے واپردیاں وکھاون لگ جاندے نیں تے ' ڈگدا ڈھیندا اپنی ذات دے ٹوئیاں اندر' جیوندا واسی پتھر ورگے انھیرے دی قید توں چھُٹ جاندا اے۔

مظہر ترمذی ہوراں دے نیڑے'ایویں خُش ہو جانا ہی تاں خُشی اے'۔سجن پیارے دی تصویر تک کے سجن نوں یاد کردے لوکاں دی کتھا وی نظماں وچ وار وار ملدی اے اے۔اِک ہور نظم اندرجُتی دی مدح وچ بالپن دے اندر عید توں پہلاں دی باپو ولوں لیاندی نویں جُتی نوں نال سُواون والے دے جذبے نوں بیانیا اے جو اپنے چاہواں نوں لکو نہیں سکیا تے ایسے ای نظم وچ کئی پرتاں نوں کھولدے ہوئے شاعر نے اخیر اُتے جُتی دے اپورے ہوون نال دھرتی دے ڈول جاون نوں وی بیان کر دِتا اے۔جہڑی جُتی رول دیندی اے اوہ پیریں پوری نہیں ہوندی اے جو اجہے فیصلے ہوندے نیں جہناں نوں مننا اوکھا اے اوس اُتے عمل درآمد کرنا ہور اوکھا ہو چُکیا ہوندا اے۔مظہر ترمذی ہوراں دا کہنا اے:

شاعری انج وی ہو سکدی اے

جیویں کوئی تُسیں شہر وساؤ

ون سوّنے کوٹھے پاؤ

بس یاداں دا آون جاون ہوئے

اوہناں دا وچارنا ایہ وی اے کہ شاعر دا کوئی دیس نہیں ہوندا سگوں اوہ تاں ایہناں حدبندیاں توں اُتانہ ہو کے سوچے تاں اِی اوہ کُجھ نواں تے ودھیا ساہمنے لیاندا اے۔نظم ' سوچ کویلڑی' وچ ویکھنے آں:

' اِک ہتھ دِل دوجے ہتھ دُنیا

سوچ کویلڑی رُت البیلڑی

ہولی ہولی مچ سائیاں'

ایس طرحاں اوہ ' کاں کھاندے مونہ تکدیاں چِڑیاں ' وچ علامتی انداز نال تگڑیاں تے ماڑیاں دی گل کردیاں سوچن دی پریرنا دیندے نیں۔انجے ای چڑیلاں داویاہ،جِناں دی جنج تے اِک مِک دِسدے سبھ شیطان دی گل کردیاں ہوئے سیاسی حوالے وی دے جاندے نیں۔سُفنے ورگے وِچھڑے پیاریاں دی گل کردیاں ہویاں جیون دے کومل رنگ نوں وی ساہمنے لیاندے نیں۔

'جُتی گھِس گئی عشق تیرے دی

پَیریں ہور نہ آنی'

ایسے طرحاں نظم ' اِک بول " اندر ایہ وی ویکھو:

' جیہڑے بول نوں ساڈی جیبھ ترسدی اے

اِک واری اوہ بول'

نظم 'تیری یاد' وچوں ویکھو:

میری روح نوں ہچکی جہی لگ جاندی اے

اس پنجر دی پِیڑ نہیں مُکدی

کیویں بُجھاواں اندر بلدی لاٹ جدائیاں والی

اپنے ہون دا رَولا مُکے تاں کُجھ سوچاں

نظم ' دریا ویکھن آئیوں' وچ اِک مِصرعے نال ای قبضا مافیا نوں نشانا بنایا اے جہناں دی وجھا توں دریاواں دی تھاں تے نویاں نویاں سوسائٹیاں بناون نال ہڑ نال لوکائی دی بربادی ہو رہی اے۔"دریا ویچ بنائیاں کوٹھیاں"ایہ ای اوہ لوک وی نیں جو واہی بیجی والی تھاواں نوں وی بےکار بناون وچ اپنا منفی کردار ادا کر رہے نیںٗ تیجی دُنیا دے واسیاں نوں ایہو جہیا مسئلیاں نال بھِڑدیاں وکھایا جانا ودھیا اے۔

پراگے دیاں نظماں نوں پڑھدیاں وار وار احساس ہوندا اے کہ شاعر ہوراں دے کول کسے دی تانگھ اے جیوں اَج وی کسے دی اُڈیک وچ راہواں تک رہے لوکی ہوندے نیں اپنی نظم " نہ ہوندے تے " وچ لِکھدے نیں:

کیہدیاں راہواں تکدا ہاں میں

جیہڑے چھڈ گئے یاد وی نہیں ہُن آوندے

جیویں کوئی آواز کسے اُجڑے رستے توں آئی سی

ایہ شعری پراگا،کتاب ترنجن لاہور ولوں 2025 وچ شائع ہویا جس دے کُل صفحے120 تے مُل 500 روپے اے۔