پنجاب کابینا تے تعلیمی نظام

وزیر اعلا عثمان بزدار دی صدارت ہیٹھ صوبائی کابینا دے اجلاس وچ سکولز ایجوکیشن پنجاب دی اسیسمنٹ پالیسی فریم ورک 2019 دی منظوری دتی گئی جہدے مطابق پنجاب وچ پنجویں تے اٹھویں جماعت دے امتحان مرحلے وار ختم کرن دا فیصلا کیتا گیا‘ ایس توں وکھ پنجاب اندر پہلی توں پنجویں کلاس تیکر اردو نوں تعلیم مادھیم بناون تے انگریزی نوں بطور مضمون پڑھاون دی منظوری وی دِتی گئی۔تعلیم دا کھیتر نہ صرف حساس ہوندا اے سگوں ایہدے اُتے ای کسے قوم دی ترقی تے مستقبل دا آدھار ہوندا اے۔ بدقسمتی نال پاکستان اندر ایسے کھیتر نوں ای لاپرواہی دا شکار رکھیا گیا۔ سماج اندر استاد دی قدر تے عزت توں ای ایہدا اندازا ہو جاندا اے۔ ہر آون والی حکومت‘ بھاویں اوہ جمہوری سی یاں آمرانا‘ اوہنے تعلیم دے سدھار دا ناں لیا تے تعلیم نوں ای تباہ کرن وچ اپنی توفیق مطابق حِصّا پایا۔ اجوکی حکومت دے اقدام وی ایسے روایت دا تسلسل تے اِکتارتا نیں۔

تعلیم بارے پالیسیاں بنانا کابینا دا کم ای نہیں۔ کابینا وچ سیاسی سیانے ہو سکدے نیں پر تعلیمی سیانے نہیں۔ایہ کم تعلیم دے ماہراں دے کرن دا اے کہ اوہ کتاباں تے تعلیم مادھیم بارے فیصلے کرن۔ کابینا دے سیانے‘ پرایمری تے مڈل دے امتحان ختم کرن بارے فیصلے کرن لئی ایس پاروں اتھارٹی نہیں رکھدے کہ ایہ کم اوہناں دے کرن والا ای نہیں۔ دنیا بھر وچ تعلیمی نظام اندر کیہ اجوکیاں تبدیلیاں آ رہیاں نیں تے تعلیم دا نظام کویں چلایا جا رہیا اے‘ ساڈی کابینا دے سیانے ایہدے توں انجان نیں کیوں جے کتاب نال اوہناں دا دُور پار دا تعلق وی نہیں۔

ذریعا تعلیم بارے فیصلا کرنا وی کابینا دا نہیں‘ تعلیم دے سیانیاں دا کم اے۔ دیس اندر اردو دی جگالی ایس انداز نال کیتی گئی اے کہ پوری قوم ای ہپناٹایز ہو چکی اے۔ جتھے تعلیم دی گل ہوندی اے‘ اردو ساہمنے آ جاندی اے۔ شہباز شریف دے دور وچ اک بہتر فیصلا ہویا سی کہ تعلیم مادھیم انگریزی بنا دتا جاوے۔ دیس اندر کھُنبِیاں وانگ اُگدے انگریزی میڈیم سکولاں دے مقابلے اُتے ایہ اک چنگا فیصلا سی جس پاروں سرکاری سکولاں وچ پڑھیاراں دی گنتی اک واری فیر ودھن لگ پئی۔ لوک جے اردو میڈیم نہیں پڑھنا چاہندے تے اپنے بالاں نوں انگریزی میڈیم پڑھانا چاہندے نیں تاں حکومت نوں ایہدے وچ مداخلت دا کیہ حق اے؟ کابینا دے اجوکے فیصلے پاروں اک واری فیر سرکاری سکول ویران ہو جاون گے۔

کابینا دے سیانیاں دی سیانپ دا اندازا ایس گل توں وی لایا جا سکدا اے کہ دنیا بھر دے مَنّے پر مَنےّ اصول یعنی مادری زبان وچ مُڈھلی تعلیم بارے اوہناں نے غور کرن دی زحمت ای گوارا نہیں کیتی۔ دیس اندر اج ہر شعبے وچ نالایقاں دی جہڑی بھرمار ہو رہی اے‘ اوہدا بنیادی کارن پچھلیاں کابیناواں دے اجہے فیصلے ای تاں نیں۔

(شکریے نال روز وار لوکائی ،اداریا 26 دسمبر 2019)