لال مرچ کھاون دے فائدے یاں نقصان بُہتے نیں ۔۔۔۔۔۔۔۔۔ رُوم وچ نویں کھوج کیہ کہندی اے؟ ـــــ رویل

دَوری وچ لال مرچاں کُٹنا تے فیرایہدے وچ تھوم تے ادرک نوں کُٹ کےرلانا پنجابیاں نے مڈھ توں ای سکھیا ہویا سی تے اجے وی پنڈاں تھاواں وچ ایس دی ورتوں کیتی جاندی اے۔ایہ اجہیا مشرت بن جاندا سی جو سالن پکان لگیا وی ورتیا جاندا سی تے جدوں گھر وچ ہانڈی نہ بنی ہوئی ہووے تے روٹی نال ایس دی ورتوں کیتی جاندی سی ،گھیو دی روٹی نال ایس نوں بڑے شوق نال کھادا جاندا ہور تے ہور لسی دے وچ ایس نوں گھول کے روٹی بھیوں بھیوں کے وی کھادی جا سکدی سی انج ایہ عام ورتوں دی شے نوں ویکھدیاں ویکھدیاں شہریاں نے چکی دی پسی دُھوڑ مرچاں نال وٹا لیا تے لوک کئی طرحاں دیاں ملاوٹاں کھاون لگ پئے ۔

ڈاکٹر ماریا لورا بونا نے اک کھوج کیتی اے جس نال مرچاں کھا کے دل دے دورے توں بچیا جا سکدا اے تے نالے فالج توں وی دُور رہیا جا سکدا اے۔اوہناں نے اپنی کھوج راہیں ایہ ثابت کیتا کہ مرچاں کھاون والیاں نوں دل دے دورے دا خطرا 44 فی صد گھٹ ہوندا اے ۔ایس کھوج وچ لگ بھگ 22 ہزار لوکاں تے تجربا کیتا گیا سی جہدے وچ ہر عمر دے لوکاں نوں رکھیا گیا۔

یورپ والے لمے چراں توں پھوکیاں شیواں کھا رہے نیں ایسے طرحاں چینیاں نے وی ساری حیاتی مرچاں دا سواد نہین چکھیا ہونا اے ہن ایس کھوج توں بعد اوہناں نے وی مرچاں کھاون ول دھیان دینا شروع کر دتا اے۔مرچاں وچ کیپسی سین ناں دا اک مشرت ہوندا اے جہڑا ودھیا کولیسٹرول گھٹاون واسطے بہت فائدے مند ہوندا اے۔ایس طرحاں دل دے روگیاں نوں مرچاں ضرور کھانیاں چاہیدیاں نیں ۔کھوجکار نے اپنی کھوج وچ ایہ وی دسیا اے کہ مرچاں نوں اپنی خوراک وچ حدوں ودھ نہیں ورتنا چاہیدا اے تاں جو کدھرے ایہ نہ ہوئے کہ ہور خطرات ودھ جاون۔