کاشانہ سینٹر وچ افشاں لطیف دے لائے گئے الزام بے بنیاد قرار،صوبائی وزیر وی بچ گیا ــــ رویل نیوز

لاہور(رویل نیوز)کاشانہ سینٹروچ بالاں نال زیادتی دا الزام بے بنیاد نکلیا۔ تفصیل دے مطابق کُجھ دن پہلاں کاشانہ ہوم دی سپرنٹندنٹ افشاں لطیف نوں جدوں اوہناں دے عہدے توں ہٹایا گیا تے اوہناں نے کُجھ حکومتی وزیراں اُتے الزام لائے۔ افشاں لطیف نوں کاشانہ توں بے دخل کرن لئی پنجاب پولیس دی مدد لئی گئی ،ایس موقعے اُتے اوہناں نوں کُجھ دیر تھانے وچ رکھیا گیا۔ افشاں لطیف نے الزام لایا سی کہ میرے اُتے گھٹ عمر بالڑیاں دے ویاہ کروان لئی دباء پایا جاندا اے۔ سرکاری ادارے سوشل ویلفیئر اینڈ بیت المال دی سابق سپرنٹنڈنٹ افشاں لطیف نے سابق وزیر اجمل چیما اُتے الزام لایا سی کہ اوہ بالاں دے زبردستی ویاہ کرواندے نیں۔ پر ہن وزیر اعلا انسپکشن ٹیم نے رپورٹ وزیر اعلا عثمان بزدار نو ں پیش کر دتی اے۔ رپورٹ وچ کاشانہ ہاؤسنگ سکینڈل وچ ملوث سابق صوبائی وزیر اجمل چیمہ نوں کلیئر قرار دے دتا گیا اے۔رپورٹ وچ آکھیا گیا اے کہ افشاں لطیف ولوں لائے جان والے الزام بے بنیاد نیں۔کسے وی بالڑی نال زیادتی یاں بالڑیاں نوں کیتے گھلن دے ثبوت نہیں لبھے۔