"ویاہ دی اگلی سویر ووہٹی دی ہلاکت ،سسرالیاں خلاف کیس  درج کیوں ہویا؟ـــــــــــــــــــــــــــــــــــــــــــرویل نیوز

لاہور(نمائندا رویل )دو دن پہلاں فوت ہون والی نویں ویاہی دُلھن سویرا دے بھرا دی مدعیت وچ خاوند تے سوہریاں خلاف مقدما درج کر لیا گیا اے۔ دُلھن دے بھرا دی مدعیت وچ درج مقدمے وچ آکھیا گیا اے کہ 32ورھیاں دی سویرا تے وسیم دا ویاہ 28دسمبر نوں ہویا سی۔ ایف آئی آر وچ سویرا دے بھرا ولوں آکھیا گیا اے کہ جدوں 29دسمبر نوں اسیں بھین لئی ناشتا لے کے گئے تے اوتھے ایمبولینس کھولتی سی ،سانوں دسیا گیا کہ سویرا دی حالت خراب اے جدوں کہ لاڑا وی بے ہوش اے۔ جدوں اسیں نیڑیوں ویکھیا تے میری بھین دا ساہ نہیں چل رہیا سی۔ بعدوں ہسپتال لیجایا گیا جتھے ڈاکٹراں نے بھین دی موت دی تصدیق کردے ہوئے دسیا کہ اوہدے جُسے اُتے تشدد دے نشان وی نیں۔سویرا دے بھرا دا آکھنا اے کہ اوہدی بھین دے خاوند نے اپنے گھر والیاں نال رلکے میری بھین نوں ناحق قتل کیتا جدوں کہ پولیس نے خدشا ظاہر کیتا اے کہ شاید دُلھن دی موت زہریلی شے کھان نال ہوئی اے۔ پر ایس بارے تحقیقات جاری نیں۔