نواں سال تے پرانے خیال ______ رویل کالم

کُجھ سیانیاں دا آکھنا اے کہ بیتے ویلے نوں یاد کر کے ویلا ضایع کرن یاں دل نوں بس خش کرن والی گل ہوندی اے۔ پرکُجھ سیانے آکھدے نیں کہ ایہناں دوویں گلاں نوں ساہمنے رکھدے ہوئے بیتے ویلے کولوں سکھنا بہت ضروری اے۔ایہ ساریاں گلاں اپنی تھاں ٹھیک نیں پر اک گل جو بہت اہم اے اوہ ایہ کہ بیتیاسال ہوئے یاں پل چنگا لنگھیاہوئے تے آن والے نوں ہور چنگا لنگھان دا جتن کرنا چاہیدا۔ جے کُجھ کوتاہیاں ہوئیاں ہون تے اوہناں نوں آؤندے ویلے وچ دور کرنا بہت ضروری اے۔

اج جدوں پچھلا سال ساڈے توں بیت گیا تے نواں سال چڑھ گیا اے۔ایس موقعے اُتے خشیاں دے نال نال بہت سارے غم وی نال نیں۔2019 کئی پیاریاں نوں میرے توں دور کر گیا۔جہناں وچ میرے تائے دا جوان پُتر دو بالاں دا پیو ندیم دی موت دا صدما میں نہیں بُھل سکدا۔ ندیم جہنوں ویکھ کے لوک،ویکھدے ای رہ جاندے سن، اوہ شینہ جوان کوئی 6فٹ لما قد،لمی چوڑی چھاتی،بس دِناں وچ ای شوگر کھا گئی۔شوگر کیہ کھانا سی غربت کھاگئی۔شوگر نال پہلاں اک لت کٹی فیر دوجی تے فیر زہر پورے جسم وچ کھلر گیا تے اِنج ہونی ہوکے رہی۔اوہ آپ تے چلا گیا پر پچھلیاں نوں سوگ وچ ڈوب گیا۔اوہ ندیم جہنوں ویکھ کے اِنج لگدا سی ایہنے سدا ای ایسراں ای زندا رہنا اے، اوہ اکھاں اگوں گھڑیاں پلاں وچ اوہلے ہوگیا۔اِنج ای بہت سارے لوک ساڈے آل دوال دے سن ایس جگ توں ٹُر گئے۔پر ایہدے نال نال بہت ساریاں خشیاں دیاں خبراں وی آؤندیاں رہیاں،وڈی خالا دے مُنڈے دا ویاہ ہویا،ایہ ویاہ ایس لئی خاص سی کہ ایہدے وچ ساریاں رشتے داراں بھنگڑے پائے،خشیاں منائیاں،پر ایس موقعے اُتے نہیں سی تے وڈی خالا نہیں سی،اوہنوں یاد کر کے کئی وار ساریاں دیاں اکھاں بھجدیاں رہیاں۔

اِنج ای اک ہور خشی جو ساڈے ویڑھے آئی اوہ میرے توں وڈی بھین دے گھر دھی دا آنا،رب سوہنے اوہنوں دھی دِتی پر اوہنے اپنے جیٹھ نوں وڈے دل جگرے نال دے دتی،کیوں جے اوہدے جیٹھ گھر اولاد نہیں سی،بھین نے بڑی ہمت وکھائی،چن نالوں وی سوہنی دھی آپ اپنے ہتھاں نال اپنی جٹھانی دی جھولی وچ پاکے اوہدی جھولی مامتا ورگے احساس نال بھر دِتی تے اج اوہ دھی رانی دیسوں پردیس (بحرین) جاکے موجاں مان رہی۔

ایس توں وکھ بیتے سال بہت سارے بیلی بنے،بہت سارے ویلا نہ ہون کارن وکھ ہوئے اتے وکھ ہون والے اینے وی دور نہیں ہوئے کہ اوہناں نوں اواز نہ ماری جا سکے،پر بیلیاں نوں ویلا دینا پیندا اے،خورے ایس عمرے ای میں ایس عمل وچ اینا ناکام کیو رہیا واں، پر ہُن نویں سال وچ ایس کمی نوں دور کرن دا جتن کراں گا۔اک گل ہے کہ میرے دور وسن والے بیلی جدوں وی بھاویں اوہ سال بعد ای کیوں نہ ملن اِنج ای لگدا اے کہ جویں اسیں نال ای ہونے آں، اسیں دور ہوئے ای نہیں اک دوجے کولوں۔ایہدی وجھا مینوں وی پتا نہیں پر ایہ سچی گل اے۔

ایس توں وکھ بیتے سال دی اہم وڈی خشی ایہ سی کہ میرے ایم۔فل دا کورس ورک مُک گیا تے ہُن تحقیقی کم جاری اے جو میں نویں سال وچ کر لواں گا۔۔۔ایم۔ فل دی ڈگری بارے کُجھ سال پہلاں تیکر سوچیا وی نہیں سی اوہ ہُن چالو ورھے ہو جائیگا۔ کورس ورک مُکن نال لاہوروں فیصل آباد جان دا سلسلا وی مُک گیاپر ایہدے اُتے خشی وی اے تے دُکھ وی، میں فیصل آباد شہر پھرنا چاہندا ساں پر پھرن دا ویہل ای نہیں ہوندا سی، دفتری کم توں ای ویہل نہیں ملدا سی تے پھرنا ٹُرنا کیہ سی۔ پر فیر وی جتھوں تیکر ہو سکیا،ایس کم وچ ودھ چڑھ کے حصا پایا۔

ایس توں وکھ بیتے ورھے بہت سارے شہروں باہر دے سفر وی کیتے جہناں وچ شیخوپورا(مزار وارث شاہ،ہرن مینار)اسلام آباد، مری،خانسپور،ایوبیا، کرتارپور،پنڈی،قصور (بلھے شاہ دے دربار)۔ایسے طرحاں بہت ساریاں نویاں کتاباں پڑھن داوی موقعا ملیا۔ پر نویں سال وچ ہور بہت کُجھ پڑھن دی پلاننگ کیتی گئی اے۔ایہدے نال نال ایہ وی آس اے کہ اسیں چالو ورھے سِر اُتے سہرا سجاواں گے۔کیوں جے سانوں ایہ سُن کے بہت ای دُکھ ہویا کہ ساڈے سکولی بیلی جو میرے نال اٹھویں توں دسویں تیکر پڑھدے سن یاں پڑھدیاں سن ساریاں دا ویاہ ہوگیا تے ایس گل اُتے تے بہت حیرانی ہوئی کہ اوہناں وچوں کسے دے چار، کسے دے تن، تے کئیاں دے دد،دو تے کسے دا اک بال اے۔ ایہ انکشاف دسمبر 2019وچ ای دسویں جماعت دے سکول فیلو دے ویاہ اُتے ہویا۔

ایہدے نال نال جے بیتے ورھے ملکی حالات دی گل کرئیے تے اوہ اُنجے ای رہے،جویں دے شروع توں ٹُرے آ رہے نیں۔ لوکائی لئی کوئی خاص تبدلی تے نہیں آئی پر آس اے کہ ایس ملک دی لوکائی دی حالت بدلے گی۔ لوکائی پچھلے کئی دہاکیاں توں تبدیلی دی آس اُتے جی رہی اے، کسے مسیحا دی تلاش وچ اے کہ اوہ آئے تے اوہناں دی حالت سدھارے پر اوہ پتا نہیں کتھے رہی گیا اے۔ سُن کے دُکھ وی ہوندا اے کہ ساڈے آل دوالے کیہ ہو رہیا اے؟بالاں نال زیادتی،قبراں وچوں لاشاں کڈھ کے اوہناں دی بے حرمتی ورگے واقعات آئے دن ساڈے ساہمنے آ رہے نیں۔آخر اسیں کہڑے پاسے ٹُر پئے آں؟

گل اینی اے کہ سال کِنا وی نواں کیوں نہ ہوئے ماڑے لئی اودوں تیکر نواں نہیں ہو سکدا جدوں تیکر اوہدی حالت نہیں بدلے گی۔آس اے کہ ایس ملک دے حالات چھیتی بدلن گے۔ آس دا دیوا لوکائی دے دل اندر بلدا پیا اے جو بُجھن والا نہیں اے۔