پیاز معنے گنڈھا

پیاز معنے گنڈھا۔۔۔اک بال ”پیاسا کوا“ کہانی سُنا رہیا سی۔”ایک پیاسا کوا تھا۔۔۔وہ اِیدھر اِیدھر اُڈا۔۔۔پانی نہیں ملا۔۔۔اوہ کہتا کیا کروں۔۔۔ایک باغ میں گھڑا نظر آیا۔۔۔(ایتھے بال سسکی لیندا اے)پانی نیچے سی۔۔۔اوہنے کہیا میں کیا کروں۔۔۔کنکریاں کیریاں وچ۔۔۔۔سٹیاں وچ۔۔۔پانی پی کے اُڈ گیا۔۔۔۔جدوں بال نے ایہ کہانی سنا لئی تاں اوہنوں لگا جیوں اوہدی جِند کڑکی توں نکل آئی ہووے۔ ویکھن والے تے سنن والیاں دے چہرے تے ہاسا لیاون واسطے ایہ سبھ کیتا جاندا اے۔مینوں ایہ کہانی اک وٹس ایپ گروپ وچ سنن لئی ملی تے ایس کہانی نوں سُن کے تے اوس بال دے چہرے تے کھلردے خوف نے مینوں اندروں جنجھوڑ دتا۔۔۔۔چڑیاں دی موت تے گوارا دا ہاسا،والا اکھاں اج سمجھ آیا۔جے اسیں اپنی زبان دی تھاں کسے ہور زبان وچ تعلیم دے رہے آں تے ایہ غلطی ساڈی اے ایس دا خمیازا ساڈیاں کئی نسلاں نوں بھُگتنا پے رہیا اے تے شاید اگلی کسی پِیڑھی نوں ایس ”غلطی“ دا اندازا وی نہ ہووے کیوں جے نہ تے سانوں ساڈی شناخت دا پتا اے تے نہ ای تواریخ دا تے فیر ساڈا اپنا آپ کتھے اے۔دوجیاں دی زبان سکھ سکھ کے اسیں اپنے آپ توں وی دُور ہوندے جا رہے آں۔لارڈ میکالے دا ایہ”کارناما“ سی کہ اوس نے ایتھوں دے وسنیکاں نوں ہر گل لئی شک وچ پا دِتا اے۔اوہ اپنے مشن وچ کامیاب رہیا تے اسیں اج تیکر اوس توں باہر ول جھات نہیں مار سکے آں۔بال دے چہرے تے ڈر ویکھیا جا سکدا اے۔ اوہ ڈر اے اوپری زبان بولن دا اوس نوں سکھن دا ایہ تاں تعلیمی نظام تے بہت وڈا سوالیا نشان اے۔کسے وی تعلیم یافتا انسان نوں ایہ پیاسا کوا کہانی پڑھن والے تے ترس آندا اے۔جو اوہدے نال بِیت رہی اے اوہ اپنی اگلی نسل نوں نہیں انج کرن دیوے گا اوہ اگلی نسل دا مذاق نہیں اڈوانا چاہوے گا اوس نوں اِٹاں ڈھونا قبول ہووے گا ذلیل ہونا نہیں۔پڑھیار دے چہرے تے ڈر تے خوف موجود اے اوہدا لنک تہانوں دینا

https://www.youtube.com/watch?v=R2y-wCB0-XM

ایس اُتے ویکھ کے خُد ای اندازا لایا جا سکدا اےاک ہور ویڈیو بارے سُن لوؤ۔۔۔اک ماڑکُو جہی بالڑی کوئی چھے ست ورھیاں دی جہنے سرکاری سکولاں والا یونیفارم نیلی قمیض تے چِٹی شلوار پائی اوہدے کول پاٹا پرانا بستا پیا سی۔ شکل تے پہناوے توں کسے ماڑے گھر دی لگدی سی جس دا پیو کسے چودھری کول کم کر رہیا ہونا یاں فیر اوہناں دی گھروکی لوڑاں محنت مزدوری دے باوجود بڑی مشکل نال پوریاں ہوندیاں ہونیاں۔اوہدے کولوں استانی سبق سُندی اے تاں اوہ بہت زور تے ہمت لا کے ہجے کردی اے سی اے آر آر او ٹی بنیا کیرٹ معنے گاجر۔۔۔تے مس اگانہ سبق سنان دا کہنا شروع کردی اے تاں بے بس جہی لاچار ہوئی بالڑی اگوں ہجے کردی اے اواین آئی او این بنیا پیاز معنے گنڈھاتے مس دا قہقا ویڈیو بناندیاں بالڑی نوں گنہگار ہوون دا احساس دواندا اے۔ایہ ویڈیو فیر سوشل میڈیا تے وائرل کر دتی جاندی ویکھو سکول دے بال پنجابی بول رہے تے اگوں ہاسیاں دے ہاسے۔۔۔بیوقوفی بھرے اپنے آپ تے ہسن والے ساڈے ای لوک۔پنجابیاں نے انج دیاں ویڈیوز ضرور وائرل کرنیاں ہوندیاں نیں جہدے وچ پنجابی زبان دے خلاف کجھ وی ہوندا ہووے۔کدے ایویں ای کوئی میسج پنجابیاں دی زبان نوں ہینا کرن واسطے چلا دتا جاندا اے یاں جتھے بھیڑے قول نوں بیاننا ہووے تاں اوتھے جان بُجھ کے پنجابی جُملا کس ذہنیت نوں دسدا اے ایس دی ضرور خبر رکھنی چاہیدی اے۔سوشل میڈیا نوں اج کل پراپیگنڈے واسطے بہتا ورتیا جا رہیا اے پر ساڈے خلاف کیہ کیہ ہو رہیا ایس بارے دھیان سانوں دینا چاہید اے۔پی ٹی وی تے ڈرامے جو پیش کیتے جاندے سن اوتھے پنجاب دے ماحول نوں درشاندیاں ہویاں جہڑی زبان کرداراں دے مونہوں مکالمے راہیں بلوائی جاندی سی اوہدے وچ ساڈی زبان نوں پیش نہیں سی کیتا جاندا سگوں اُردو نوں ای وگاڑ وگاڑ کے تے جان بُجھ کے اُگلیا جاندا سی۔”تُم کو ہماری زرا وی فکر نہیں اے اڑیا“ چودھری کے کار ہم کمّی لگے ہوئے ہیں۔۔۔“ ایس طرحاں دے ڈائیلاگ راہیں پنجابیاں نوں ایہ تاں احساس ہو جاندا سی کہ ایہ پنجابیاں دی گل ہو رہی اے پر جہڑی زبان بولی جا رہی اے اوہ کتھوں دی اے ڈائرکٹر تے پروڈیوسر دی اپنی گھڑی ہوئی لگدی سی ایہدے وچ اوہناں دا اپنا احساسء کمتری ضرور شامل ہو جاندا سی۔ان پڑھتا تے جہالت ودھاندے جاؤ۔پنجابیاں اُتے ہسوپنجابیاں نوں کمتر ای سمجھوایہناں دے بال جو اوپری بولی پاروں تعلیم توں وانجھے رہ جاندے نیں ایہ ایہناں دا قصور ای مِتھو۔تعلیم اجہی دیو جہڑی ایہناں نوں اصل توں دُور کرے اپنی شناخت دی بھال وچ ایہ ساری حیاتی لنگھا دین تاں ایہناں نوں کجھ لبھ نہ سکے۔ایس طرحاں کرن نال سنن تے ویکھن والیاں نوں کوئی زبان وی نہیں پلے پیندی سی جے ڈائریکٹر نے پنجاب دا جاگیردار وکھانا اے تاں اوہدے مکالمے اجہے ہوون گے جہدے وچ بناوٹی رنگ وکھالی دیوے گا پر ایہ ای ڈائڑیکٹر جے سندھی یاں بلوچی وڈیرا وکھاندا اے تاں اوس دا رویا تے اوس نوں بیان کرن دا ڈھنگ سگواں بدلیا ہووے گا۔اچھا ایہ پروڈیوسر تے ڈائریکٹر اج وی انجے ای کری جا رہے نیںشاید ایہ ٹرینڈ سیٹ کر دِتا گیا اے کہ پنجابی زبان دو جو کجھ وگڑدا اے وگاڑن دا جتن کرو ایہ ای پروڈیوسر کدے بلوچی،سندھی یاں پشتو دیاں زباناں نوں انج نہیں کرن گے ایہدی وجھا اوہناں دا اوہ ڈر وی ہو سکدا اے جو اوہ زبان بولن والے اپنی زبان نال موہ رکھدے نیں۔تے اوہناں ولوں رد ء عمل بُرا وی ہو سکدا اے۔ایہ لکھن والیاں تے او س نوں ڈاائرکٹ کرن والیاں دی وی ذمے واری ہوندی اے کہ اوہ اصل تصویر دکھان جے پنجاب دے واسیاں دی گل ہووے تے کردار نوں پنجابی زبان بولدیاں ای وکھایا جاوے تاں جو ڈراما وی حقیقت دے نیڑے لگے۔

ساڈے نصاب پڑھاون والے تے نصاب بناون والیاں نوں ایس گل ول بہتا دھیان دینا پوے گا کہ اسیں اپنے آپ نوں کویں پچھاننا اے تے اپنے دُشمن دی کیہ پچھان رکھنی اے تے ساڈے اُتے ہسن والیاں نوں کیہ جواب دینا چاہیدا اے۔