نواں سال مبارک

نواں سال مبارک

اج دا سورج نواں سال 2020لے کے آ رہیا اے۔ پوری دنیا وچ نویں سال دا سواگت خُشیاں تے شادمانیاں نال کیتا جاندا اے۔ رات 12 وجے تاریخ بدلدے ای لوکائی خُشیاں مناندی اے۔ نرا خُشیاں ای نہیں‘نویں سال نوں پچھلے سال نالوں بہتر انداز نال منان دے جتن کیتے جاندے نیں تے خیال رکھیا جاندا اے کہ ایس سال پہلاں نالوں ودھ کے ترقی کیتی جاوے۔

ساڈے ایتھے نواں سال شروع ہوندیاں ای پہلاں تے ایہ بحث شروع ہو جاندی اے کہ ساڈا سال ہے کہڑا۔ مذہبی دھراں دے خیال وچ ساڈا اصلی سال قمری سال اے ایس لئی عیسوی سال مطابق کسے نوں مبارک دینا وی گناہ اے۔ اوہ سوشل میڈیا تے موبایل فونز اُتے اپنا واہوا سارا ویلا ایہو جہے سنیہے ٹورن وچ ضائع کردیاں نیں۔

سال‘ عمراں توں لے کے تواریخ تیکر‘ ریکارڈ رکھن دے کم آوندے نیں۔ مشکل ایہ اے کہ قمری مہینیاں وچ دن گھٹ ودھ ہوندے رہندے نیں۔ اُنج تاں ساینس نے لکھاں کروڑاں سال پہلاں دے حساب وی لا لئے نیں تے پتا ہوندا اے کہ کہڑا چن تے مہینا کنے دِناں دا ہووے گا پر ساینس توں الرجک ساڈیاں مذہبی دھراں چن ویکھن لئی اصرار کردیاں نیں کیوں جے ایہدے نال بہت سارے لوکاں دے ٹوہر شوہرتے مفادات جڑے ہوندے نیں۔ حقیقت ایہ اے کہ ساڈے دیس اندر قمری چن ایس ویلے مذہبی تہواراں دیاں تاریخاں متھن دے ای کم آ رہیا اے۔ اوہ وی ایس بے چجے طریقے نال کہ رویت ہلال کمیٹی دے باوجود کوئی نہ کوئی مولوی چن ویکھن دا اعلان کر کے گھٹو گھٹ خیبر پختونخوا وچ اک دن پہلاں عید کروا دیندا اے۔ قمری سال دی وکالت کرن والیاں نوں جے پچھیا جاوے کہ اج ”اسلامی“ مہینا کہڑا اے تے اوہدی تاریخ کیہ اے تاں بغلاں جھانکن لگدے نیں۔

پنجابیاں دا اصلی سال بکرمی سال اے۔ ساڈے پنڈاں وچ فصلاں دی بیجائی تے ہور کم کار ایسے کیلنڈر نال جڑے ہوئے نیں تے پنڈاں وچ اجے وی پرانے لوک ایسے دے مطابق تاریخاں دا حساب رکھدے نیں پر جویں اسیں پنجابی زبان تے ثقافت نوں وگاہ سُٹیا اے‘ پنجابی سال دے چنگے دن آون دا امکان وی اجے بہت دُور اے۔

عیسوی سال جہڑا ترقی یافتا دنیا دا سال اے‘ ساڈے ایتھے وی رایج اے تے ملکی نظام ایہدے مطابق ای چلایا جاندا اے۔ ایس لئی کسے نوں پسند ہووے یاں نہ ہووے‘ ساڈا سرکاری تے بنیادی سال ایہو اے۔ ایہدے مطابق ای چھُٹیاں‘ تنخاہواں تے ہور ملکی نظام چلدا اے۔ دعا اے کہ نواں سال پنجاب‘ پنجابی تے پنجابیت لئی ترقی دا سال ہووے۔

(شکریے نال روزوار " لوکائی " اداریا پہلی جنوری 2020ء)