نویں سیاسی مُکھڑے

اک لکھ چُراسی ہزار پاکستانی حج لئی ٹُر گئے نیں تے عمران خان نواں وزیر اعظم بن گیا اے ایہ ۲۲واں وزیر اعظم اے جہناں نے کُل بائی ورھے ای ان تھک سیاسی جتن کیتے نیں تے بہت سارے جواناں دے رول ماڈل وی نیں۔ایہناں نے نویں پیڑھی نوں سیاست وچ لیاندا تے اوہناں نوں نویا ں منزلاں دا راہ دسیا۔نویں پِیڑھی نوں نواں وزیر اعظم نواں پاکستان بناون والا لگدا اے ایس لئی اوہناں تے ایہ اعتبار کیتا گیا اے کہ اوہ کرپشن نوں مکاون دا جتن کرن گے۔ایہ کرپشن دا خاتما نویاں سوچاں پیدا کرن نال ای ہووے گا۔نوجوان قیادت نے نویاں راہاں تے لوکائی دی اگوائی کرنی اے جِنا کُو اعتماد ایس حکومت تے پاکستانیاں نے کیتا اے ایس توں توقعات وی ودھ گئیاں نیں۔ساڈی لوکائی دا ایہ وتیرا اے کہ جِنیاں توقعات زیادا ہوندیاں نیں اوہدا ردء عمل وی ودھ ہوندا اے ایہ ای حالات پہلاں و ی ہوندا رہیا۔نواز لیگ تے جہڑا اعتماد چوتھائی صدی توں ودھ کیتا جاندا رہیا اوہ لوکائی واسطے بلکل مایوس کن سی جس دا ردء عمل اج ویکھن وچ آندا اے۔ صحت تے تعلیم دے شعبیاں دے حالات ای ویکھو ہر نویں دن نال ایہ وگڑدے ای گئے سن۔لوکائی نے اپنا روسا تاں وکھانا سی جس کر پنجاب جہڑا نواز لیگ دا گڑھ ہوندا سی کدے اوہ اوہناں دے ہتھوں نکل گیا۔سکولاں تے کالجاں تے جہنا ں پیسا لایا گیا اوہ اک سڑک دے بجٹ توں وی کدھرے گھٹ سی جس کر کے لوکائی نوں تعلیم دے کھیتر وچ وی پرانی حکومت ولوں کجھ نہ ملیا۔ گلیاں تے نالیاں پکیاں ہو گئیاں۔محلے دی روڈ پکی ہوون نوں اک الیکشن لگ جاندا اے تے انج جا کے پورا محلہ جیوں اپ گریڈ ہو جاندا اے۔سیاستداناں نوں جہڑا مسئلا اپ گریڈ تے ہائی لائٹ کیتا جا ندا اے اوہ بس نالیاں پکیاں کروانا تے گٹراں دی صفائی ای کروانا ہوندا اے بہت گھٹ علاقیاں وچ صاف پانی دی منگ کیتی گئی۔ایتھوں تک تے سیاسی سُوجھ بُوجھ اے ساڈے عام واسی دی اوہ بھاویں شہر دا ہووے یاں پِنڈاں دا۔عام تاثر ای ایہ پیدا کر دتا جاندا اے کہ ساڈے سبھ دے مسئلے محلیاں دی صفائی ای رہ گئے نیں جس نال الیکشن دے دوران تاں میونسپل دے ملازم اپنی ملازمت ”حلال“ کر جاندے نیں تے ایس حلال اُتے سیاستدان اپنی کجھ ”حلال“ کمائی اوہناں دی جیب وچ پا دیندے نیں۔ نویں اسمبلی بن گئی عمران خان دی ویہ وزیراں دی کابینا وچ ادھے توں ودھ پرانے سیاستدان نظر آندے نیں پر نال نال ایہدے وچ اوہ لوک وی نیں جہناں نے اپنی سیاسی اکھ ای تحریک انصاف وچ شامل ہو کے کھولی اے ایہناں کولوں جہڑیاں اُمیداں نے اللہ کرے اوہ لوکائی نوں مایوس نہ کرن تے ہر کھیتر وچ خشحالی آوے۔گل پرفارمنس تے مُکنی اے دعویاں دی لوڑ تے نعریاں دی سیاست نوں جڑھوں مکا کے ای کجھ نواں کیتا جانا چاہیدا اے۔ سبھ توں وڈا مسئلا تاں ایہ ای نظر آندا سی نواں نظام کتھوں آوے گا تے نویں انتظام کرن والیاں دا کویں چناؤ کیتا جاوے گا ۔ ہر یو سی چئر مین تک نوں اختیارات دیون دی لوڑ اے تاں جو نِکی توں نِکی سطح تک بہتری لیائی جاوے تے جدوں اختیارات نوں نِکے سطح اُپر رکھیا جاوے گا تاں معاملات حل ہوون ول پاسے جاون گے۔ اسمبلی دا ماحول جو بن گیا اے اوہ کویں ویکھیا جا رہیا اے۔پنج سال پورے ہونے چاہیدے نیں،ویکھو اگوں کیہ ردء عمل ہوندا ہمت،حوصلا تے برداشت کتھوں تک لیجاندی اے۔ اعتماد دے نال ٹرن دی لوڑ اے ایہ اعتماد پارٹی دے اندروں وی لوڑیندا اے تے اپوزیشن ولوں۔جویں کہ اک روایت بن گئی اے کہ پارٹی دا مقصد کم نہ کرن دین ہونا اے۔ن لیگ نے سیاسی بصیرت توں کم لیندیاں دسیا اے کہ اسیں ہٹ دھرمی تے دھرنیاں والی سیاست نوں نہیں ودھا واں گے سگوں جمہوری نظام نوں ودھان واسطے حکومت نوں کم کرن دا موقع دتا جاوے گا۔جے عملی طور تے انج ہوندا اے تاں نویں جماعت نوں وی ویلا ملے گا کہ اوہ لوکائی واسطے کجھ نہ کجھ چنگا کر سکن،بنیادی لوڑاں تھوڑاں ول دھیان دیندیاں ہویاں وڈی سطح تیکر کم نوں اپڑان دی لوڑ اے تاں جو لوکائی دا اعتماد لیا جا سکے۔ مقابلیاں دی گل کرن والیاں نوں ایہ وی چیتے رکھنا چاہیدا اے کہ ن لیگ نے ووٹاں وچ اک وڈی گنتی حاصل کیتی اے پر ایس دے نال ایہ وی اک حقیقیت اے کہ ہن پنجاب دا وی قلعا نویں لوکاں کول اے۔ووٹ بنک بدل گئے نیں۔الیکشن کمیشن نے اپنے کم دے تسلسل نال تے نویں سیاسی مُکھڑیاں نوں ساہویں رکھدیاں چودھاں اکتوبر نوں ضمنی الیکشن دی ڈیٹ وی دے دتی اے۔ہُن سبھ توں پہلاں تاں دہشت گردی تے لوڈ شیڈنگ مکانی پینی اے نہیں تاں سر منواندیاں ای گڑے پے جانے نیں۔دیس وچ ڈیمو کریٹک پراسیس شروع ہو چُکیا اے اے اللہ کرے ایہ پورا ہوندا رہوے۔ایس پراسیس نال نویں جمہوری حالات پیدا ہوندے نیں تے لوکائی واسطے ترجیحات وی بدل جاندیاں نیں۔نہیں تاں اک لکھ چوی ہزار حاجی جو پاکستان ولوں حج تے گئے نیں اوہ کلے ای روڑھے نہیں ورسان گے۔ Powered by Froala Editor