موسمیاتی تبدیلی دی وزیر دِیاں گھڑوساں
جمیل احمد پال
January 05, 2020
موسمیاتی تبدیلی دی وزیر مملکت زرتاج گل نے میڈیا نال گل بات کردیاں آکھیا اے کہ تحریک انصاف دی حکومت جنوبی پنجاب صوبے دے قیام لئی سنجیدگی نال کوششاں کر رہی اے جد کہ ایس مقصد وچ مسلم لیگ ن رکاوٹاں پیدا کر رہی اے۔ اوہناں نے محرومیاں دے حوالے نال وی کجھ سیانپ ارشاد فرمائی تے آکھیا کہ جے پیپلز پارٹی تے ن لیگ مخلص نیں تاں ساڈا ساتھ دین۔
انصافی حکومت وچ سبھ توں کمال دی گل ایہ اے کہ ہر کوئی اپنی اپنی چُنجھ ورتن وچ آزاد اے۔ ایہدا نتیجا ایہ اے کہ وزیر ہر اوس معاملے بارے بولدے نیں جہناں نال اوہناں دا دُور دا تعلق وی نہیں ہوندا۔ بعد وچ ہاسا بن دا اے‘ کدی یو ٹرن لینا پیندا اے پر مجال اے‘ کوئی سبق سکھن دا جتن کرے۔
زرتاج گل وی ایہو جہیا ای اک نمونا نیں۔ اوہناں دا تعلق پشاور تے خیبر پختونخوا نال اے‘ پنجاب نال اوہناں دا دُور دا تعلق وی نہیں۔ اوہناں دا پورٹ فولیو وی ایہ نہیں۔ اوہ موسمیاتی تبدیلی دے وی کاٹھے وزیر نیں۔ پورے وزیر نہیں۔ اوہناں نوں ایہ درجا وی شاید سوانی ہون پاروں حاصل ہویا اے۔ پاکستان وچ بہت سارے معاملیاں لئی سیانا ہوندی بجائے سوانی ہونا ای کافی ہوندااے۔ بہت سارے لوک جے قدرت دی کسے بے نیازی پاروں کسے درجے اُتے اپڑ جاون تاں ایس خُش فہمی وچ پے جاندے نیں کہ شاید اوہ واقعی بہت سیانے نیں۔
کجھ وزیراں دا مسئلا ایہ وی ہوندا اے کہ اوہناں نوں روز اخبار وچ تے میڈیا اُتے اپنی فوٹو ویکھن دا شوق بچپن توں ای پے جاندا اے۔ ایہ فوٹو ویکھن دے چاء وچ اوہ روز کوئی نہ کوئی گھڑوس ماردے نیں تاں جے پبلک نوں پتا لگدا رہوے کہ اوہ وی موجود نیں۔
ایہو کجھ زرتاج گل ہوراں دا وی مسئلا لگدا اے۔ نہ اوہناں دا تعلق پنجاب نال اے‘ نہ اوہناں دے محکمے دا پنجاب دی ونڈ نال کوئی تعلق اے پر بولنا ضرور اے۔ فوٹو وکھان لئی تاں ہور وی بہت سارے موضوع موجود نیں۔اج کل سردیاں نیں‘ ایس حوالے نال اوہ کوئی گل کردے تاں لوکاں نوں وی پتا لگدا کہ اوہ کاہدے وزیر نیں تے واقعی اپنے پورٹ فولیو بارے کجھ جاندے نیں۔
پنجاب دی ونڈ دے ڈرامے بارے اسیں کئی وار گل کر چُکے آں۔ اج کل ایہ موضوع مویا پیا اے۔ کل نوں جدوں خاص حلقیاں نوں لوڑ پئی تاں اک واری فیر کاواں رؤلی پائی جاوے گی۔ بہرحال ایہ مسئلا پنجابیاں دا اے‘ کسے پٹھان یاں پٹھانی دا نہیں۔ وزیر ہوری اپنے خیبرپختونخوا وچ ہزاراناں دے پنجابی صوبے دی گل کرن جہدے اُتے اوہناں دی قوم دے لوکاں نے مَل ماریا ہویا اے۔ یاں فیر اپنے موضوع تیکر محدود رہن۔ ضروری نہیں کہ ہر موضوع اُتے گل کرن والا بندا سیانا وی ہووے۔ ایہ وی ضروری نہیں کہ شکل چنگی ہووے تے بندا گل وی چنگی کر رہیا ہووے۔
( شکریے نال روز وار "لوکائی "اداریا 4 جنوری 2020)
