اِک تبدیلی دوجا لفظ کرپشن

اک دو لفظ اجہے ہوندے نیں جہناں نال دوجیاں دی ہستی دا اندازا ہو جاندا اے۔ایہ لفظ ساہمنے آندیاں ای اک چہرا وی بن جاندا اے دو چہرے اجوکے زمانے وچ ساڈے مُلک وچ لوکائی دے ساہمنے بن جاندے نیں۔ایہ دو لفظاں نال جہڑیاں ہستیاں جُڑیاں نیں اوہناں بارے بہت ساری تفصیل وچ وی جان دی لوڑ نہیں اے بس لفظ تہانوں دسے جان تے معاملا واضح ہو جائے گا۔اوہ دو لفظ نیں کرپشن،تبدیلی۔ویکھو تہاڈیاں اکھاں ساہمنے دو ہستیاں بن گئیاں ہاں ہاں ایہ ای دو ہستیاں نیں جہناں بارے بہت سارا چرچا اے۔ایہ چرچا اودوں ہو رہیا اے جدوں ملک اٹھائی ہزار ارب رُپے دا مقروض اے ہر آون والے دن نال ایہ قرضا ودھ رہیا اے۔قوم سُتی ہوئی اُٹھدی اے تے قرضا لکھاں وچ ودھیا ہوندا اے۔ہور تے ہور پچھلی حکومت نے اپنی شاہانا حکومت واسطے ہر مہینے دو ارب ڈالر دا جہڑا قرضا لیا ہن اوس دی ادائیگی دا ویلا آیا تے خزانا خالی۔ترقی کتھے ہونی سی تے کدوں ہونی سی ایس بارے سوچے گا کہڑا مقروض۔نویں حکومت کول جے معاشی پالیسی اینی تگڑی نہ ہوئی کہ اوہ اک مالی سال وچ اپنے حالات تے قابو پا لین نہیں تاں حکومت دے ساہ لینا اوکھا ہو جاوے گا۔خبراں وچ اک ہور وڈی خبر ایہ وی اے کہ پنجاب وچ وی ن لیگ دا راج مُک گیا اے۔ایس دے رد ء عمل وچ ن لیگ ولوں حمزہ شہباز نے جو تقریر کیتی اوہدے وچ آر ٹی ایس سسٹم نوں الیکشن وچ ہارے جان دا اک اکرن دسیا گیا تے الیکشن کمیشن تے ایہ الزام لایا گیا کہ ایس سسٹم نوں بند کر کے شفاف الیکشن تے اک سوال اُٹھان لئی مجبور کر دتا اگیا۔ن لیگ ولوں حمزہ شہباز نے دھاندلی داالزام لا کے اپنی گل مُکا دتی تے پنجاب دی وازارت عثمان بزدار دے حوالے کر دتی جو عمران خان دا وِژن لے کے اگے ٹُرنا چاہندا اے ویکھو ایہدے وچ کِنا کُو سچ ہوندا اے یاں فیر ایہ صرف گلیں باتی ای سی۔ پاکستان اٹھائی ہزار ارب دا مقروض اے جے ایس طرحاں دے حالات دا مقابلا کسے ہور حکمران نوں کرنا ہوندا جو حکمرانی دا تیہ کُو ورھیاں دا تجربا وی رکھدا ہوندا تاں اوس حکمران نے سبھ توں پہلاں سرکاری اداریاں نوں ویچن دا سوچنا سی تے اپنا ذاتی مال سمجھ کے ”وکاؤ“ کر کے اپنے کھیسے نوں وی بھر لینا سی تے جدوں مَنی ٹریل دی گل ہونی سی تے جویں سپ سُنگھ گیا ہونا۔ ہُن تاں ایہ فیصلا کیتا گیا اے کہ سرکاری ملازمین نوں جویں تھاپی دتی گئی اے ریاست نے اوس نوں اپنے ولوں پورا تحفظ کرن دی ہامی بھری اے نال ایہ وی آکھیا اے کہ سرکاری دفتراں وچ آون والے ہر بندے نوں کھِڑے متھے جی آیاں نوں آکھ اوس دے کم نوں یقینی بنایا جاوے۔ نویں وزیر اعظم ہوراں نے ایہ فیصلا کیتا اے کہ وادھو دے خرچے مُکا دتے جاون گے۔ایس دا مُڈھ اوہناں نے اپنے ملازماں نوں گھٹا کے کیتا تے پنج سو بائی ملازماں نوں فارغ کروا دتا ایہ گل سلاہن جوگ اے۔کیوں جے ایس قسم دیاں ”عیاشیاں“ اوہناں نوں راس آندیاں نیں جہناں نے اپنے ہدف توں کوئی سو کُو گنا ودھ ترقی کر لئی ہووے گی تے جے ترقی لئی پہلا قدم ای پُٹنا ہووے تاں سادگی دی لوڑ ہوندی اے۔ہُن ایہ وی ویکھنا پوے گا کہ ایہ سادگی اصل معنیاں وچ نظر وی آنی چاہیدی اے نِری نعریاں نال ترقی تے سادگی نظر نہیں آنی۔کیوں جے اج دی لوکائی سیانی اے اوہ اپنا بھلا بُرا سمجھدی اے تے فوری ردء عمل دین لئی وی تیار ہوندی جے کے جِنے دعوے کیتے گئے نیںاوہ پورے نہ ہوئے تاں مسئلے ہور گھنبیر ہوندے جاون گے نالے لوکائی دا آون والے ویلے تے کسے اُپر وی یقین نہیں رہوے گا۔ تبدیلی دی لوڑ نوں لوکائی کئی ورھیاں توں اُڈیک رہی سی پر ایہ تبدیلی لوکائی نوں بہت چوکھے چراں دی تانگھ پچھوں ملی اے جس کر کے ایس توں توقعات وی ودھ نیں۔ تبدیلی دا نواں پروگرام آ گیا اے جہدے راہیں فاٹا وچ نویں معاملات تے اصلاحات آون گئیاں تے گوانڈھی دیساں نال سنبدھ سدھے رکھے جاون گے۔انج فلاحی ریاست بناون دی سر توڑکوشش کیتی جاوے گی تاں جو لوکائی واسطے سہولتاں پیدا کیتیاں جاون۔تعلیم تے صحت دے کھیتراں وچ نویاں اصطلاحات لیاون کر کے بہتری دے منصوبے بنائے جاون دا پروگرام اصل وچ تبدیلی دا پروگرام اے۔صحت دیاں سہولتاں واسطے ہیلتھ کارڈ ایشو کیتے جاون گے تاں جو صحت واسطے علاج معالجے دی سہولت ہر ملک واسی تیکر اپڑے۔ہسپتالاں نوں بہتر بناون واسطے ٹاسک فورس بنائی جاوے گی جو چیک اینڈ بیلنس رکھے گی۔ایہ صحت تے تعلیم دی لوڑ ہر جیندے بندے دی بنیادی لوڑ اے جو پچھلے اکہتر ورھیاں توں نہیں پوری ہو رہی اے۔سرکاری ہسپتال وچ علاج کروان دا مطلب سی اپنی زندگی نوں اپنے ہتھاں نال ای مُکا دینا،جے اگے وی ایہ ای حالات رہے تاں اُمید دی کرن انھے کھوہ وچ جا کے گواچ جانی اے۔ارب پتی تے مزدور دے بالاں واسطے تعلیم دا نظام تے اکو ہونا چاہیدا اے تاں جو اصل معنیاں وچ تبدیلی آوے۔ایہ تبدیلی اُنج دی آزادی نہ ہووے جو پنجرے وچ بند پکھو نوں انج ہوندی اے کہ اوسدا پنجرا کمرے وچوں کڈھ کے برآمدے وچ رکھ دتا جاوے۔ اج دی لوکائی خاص کر ساڈے دیس دی لوکائی نوں اک متھی ہوئی منزل واسطے راہواں دی لوڑ رہندی ا ے ایہدی اگوائی کسے ہور نے نہیں کرنی اے سگوں ایہدی اگوائی اوہ ای کر سکدے نیں جہناں دا وِژن صیحح اے تے اوہ اپنی قوم نال مخلص نیں۔اج دے لیڈر وچ اخلاص دی لوڑ نوں وی کسے طرحاں نظر انداز نہیں کیتا جا سکدا اے پنجاب دے نویں وزیر اعلا ہوریں اک پچھڑے ہوئے وسیب تے علاقے نال سنبدھ رکھدے نیں۔اوہناں دے کہن موجب اوس علاقے وچ بنیادی لوڑاں دی شدت نال کمی اے۔اوہ اپنے مسئلیاں توں چنگی طرحاں واقف نیں ایہناں مسئلیاں دی جانکاری ات ضروری ہوندی اے۔اجہیا بندا جس نوں سر وچ درد ہووے تاں اوہ کروڑاں خرچ کے باہر ٹُر جاندا اے تے فیر اک اک ورھے دا پینٹھ پینٹھ کرور خرچا کر کے ماڑی قوم دا تگڑا وزیر بن کے ساہمنے آندا اے۔تے جے ماڑی لوکائی جس دے ووٹاں توں اوہ ایم۔این۔اے تے فیر وزیر بنیا اے اوس نوں شدید بیماری وی لگ جائے تاںاوس نوں اک ڈسپرین تک وی نہیں دتی جاندی اے۔اوہدا علاج اوہدی موت نوں ہور کول کر دیندا اے کیوں جے جہڑی کوفت اوس نوں سرکاری ہسپتالاں وچ ملدی اے اوہدے نال جیندی ساہ لیندی حیاتی وی موت دی راہ تے ٹر جاندی اے۔ایس سارے حالات نوں ویکھدیاں ہویاں اک وڈے پیمانے تے نویں انتظامات کرن دی ضرورت اے۔انج کرن نال ای لوکائی نوں اپنے قابو وچ لیا جا سکدا اے۔اوہناں نے تاںہار وی جِت کے ویکھ لئی اے،جِت وی ہر کے ویکھ لواں گے ایہ وی کر کے ویکھ لیا اے اوہ وی کر کے ویکھ لواں گےPowered by Froala Editor