kraamaat@gmail.com
+ +92 333-430-6384


مادری زبان توں کیوں نسے؟  کرناٹک دے سکولاں نوں نوٹس جاری ـــــ رویل نیوز 


نمائندا رویل January 06, 2020


بھارتی صوبا کرناٹک دے ڈیڈھ سو سکولاں نوں کنڑ زبان نہ پڑھان پاروں نوٹس جاری‘ سخت ایکشن لواں گے مادری زبان نہ پڑھاونا گھٹیا پن اے‘ اجے پیار نال سمجھا رہے آں‘ نہ سمجھے تاں دُوجا طریقا ورتاں گے: وزیر تعلیم

لاہور (نماٸندا رویل) جتھے پنجابی زبان دے اپنے دیس‘ لہندے پنجاب وچ عدالتی حکم دے باوجود مادری زبان اجے تیکر لاگو نہیں ہو سکی‘ اوتھے بھارتی صوبے کرناٹک دی سرکار نے اوہناں ڈیڈھ سو سکولاں نوں نوٹس جاری کرن دا فیصلا کیتا اے جہناں وچ علاقے دی مادری زبان کنڑ نہیں پڑھائی جا رہی۔ ویروے مطابق 510 سکولاں نوں کنڑ زبان بارے اک ورکشاپ لئی سدیا گیا سی پر اوہناں وچوں 380 سکولاں نے اپنا اِک اِک استاد یاں پرنسپل گھلیا جد کہ باقیاں نے ایس سدے نوں نظر انداز کر دِتا۔ صوبے دی راجدھانی بنگلور دے 159 سکولاں وچ مادری زبان نہیں پڑھائی جا رہی جس پاروں حکومت نے سخت ایکشن لین دا فیصلا کیتا اے۔ صوبے دے تعلیم وزیر سریش کمار مطابق کجھ سکولاں والے سمجھدے نیں کہ کنڑ زبان دی تعلیم کوئی ماڑا کم اے تے ایہناں سکولاں وچ مادری زبان دا کوئی اُستاد موجود نہیں۔ نہ ای سکول دے ٹایم ٹیبل وچ کنڑ زبان دا کوئی پیریڈ رکھیا گیا اے۔ سریش کمار مطابق انج دا سوچنا گھٹیا تے اَن پڑھ ہون دی علامت اے۔ دھرتی دے قانون مطابق ہر سکول وچ مادری زبان دی تعلیم لازمی اے۔ اجے اسیں سکولاں والیاں نوں پیار نال سمجھا رہے آں پر جے اوہ پیار نال نہ منے تاں سانوں دُوجے طریقے نال وی گل منوانی آوندی اے۔