ترقی دی راہ وچ رکاوٹ مافیا نال میرا مقابلا اے:وزیر اعظم پاکستان

اسلام آباد (نمائندا رویل) وزیراعظم عمران خان نے کہیا اے کہ ملک دی ترقی دی راہ وچ رکاوٹ بنن والے مافیا نال میرا مقابلا اے‘ کرپشن دے خاتمے لئی سیاست شروع کیتی‘ موجودا حکومت دیاں کاوشاں نال معاشی اقتصادی اعشاریاں وچ واضح بہتری آئی اے‘ اللہ تعالیٰ نے پاکستان نُوں بے پناہ وسائل نال نوازیا اے‘ بدقسمتی نال معاشرے وچ کرپشن دے ناسور نال ملکی ترقی دا عمل متاثر ہویا‘ ماضی دیاں حکومتاں نے انسانی وسائل دے فروغ نُوں نظر انداز کیتا‘ ساڈے نوجواناں وچ منشیات دا استعمال تے بچیاں نال زیادتی دے واقعات تشویشناک نیں‘ بدقسمتی نال موبائل واقعات دے کھلار دا کارن بن رہے نیں‘ کوئی اِک اداارا منشیات تے زیادتی دے واقعات اُتے قابو نہیں پا سکدا‘ ماپے‘ ٹیچرز تے علماء کرام سنے پوری قوم نُوں ایہدے خلاف جہاد کرنا پوے گا۔ وزیراعظم نے ایہناں خیالاں دا اظہار وزیراعظم ہاؤس وچ امریکی ورجینیا یونیورسٹی دے پڑھیاراں وفد تے ”زندگی ایپ“ دی افتتاحی تقریب نال خطاب کردیاں ہویاں کیتا۔ وزیراعظم نال امریکی ورجینیا یونیورسٹی دے پڑھیاراں دے وفد دی ملاقات دوران حکومت دے اصلاحاتی ایجنڈے تے معیشت نُوں درپیش مسئلیاں اُتے گلبات ہوئی۔ دورے دا مقصد بزنس دے موقعے تے سیاحت بارے پوٹیشنل دے بارے وچ اگاہی حاصل کرنا سی‘ ملاقات وچ پاکستان نُوں درپیش چیلنجز‘ موجودا حکومت دے اصلاحاتی ایجنڈے اُتے گلبات کیتی گئی۔وزیراعظم عمران خان نے پڑھیاراں نال گلبات کردیاں ہویاں کہیا کہ اللہ تعالیٰ نے پاکستان نُوں بے پناہ وسائل نال نوازیا اے‘ انسانی وسائل دے فروغ نُوں نظر انداز کرن نال ملکی ترقی دا عمل جمود دا شکار ہویا‘ 1960دے دہاکے وچ پاکستان جنوبی ایشیا وچ سبھ توں تیز ترقی کرن والا ملک سی‘ 70`80 دے دہاکیاں دے سیاسی فلسفیاں دے کارن صنعتی عمل جمود دا شکار ہویا‘ بدقسمتی نال معاشرے وچ کرپشن دے ناسور نال ملکی ترقی دا عمل وی متاثر ہویا‘ ماضی دیاں حکومتاں نے انسانی وسائل دے فروغ نُوں نظر انداز کیتا۔ ایس موقع اُتے وزیراعظم نے کہیا کہ عام بندے دی حالت زار تے ایواناں وچ کرپشن دے پیش نظر سیاست وچ قدم رکھیا‘میرا مقابلا مافیا نال اے‘ جہڑا ملک دی ترقی دی راہ وچ حائل رہیا اے‘ وڈا چیلنج ملک توں کرپشن دا خاتما تے تعلیمی نظام نُوں بہتر کرنا اے‘ موجودا حکومت اِکو جہے تعلیمی نصاب لئی کوشاں اے‘ حکومت دیاں کاوشاں دی بدولت معیشت وچ استحکام آیا اے‘ اسیں اقتدار وچ آئے تے ملک سنگین معاشی حالات دا شکار سی‘ ہُن معاشی اقتصادی اعشاریاں وچ واضح بہتری آئی اے۔ وزیراعظم نے ہور کہیا کہ پاکستان اقلیتاں دے حقاں دے مکمل تحفظ اُتے یقین رکھدا اے‘ بھارتی حکومت دیاں فسطائی پالیسیاں نال خطے دے امن نُوں شدید خطرات لاحق نیں تے بھارتی لوکائی دی شناخت خطرے وچ پے گئی اے‘ مودی سرکار نے پنج سویلین اقلیتاں دے تشخص تے وجود نُوں خطرے وچ پا دِتا اے۔دوجے پاسے ”زندگی ایپ“ دی افتتاحی تقریب نال خطاب کردیاں ہویاں اوہناں نے کہیا کہ منشیات ساڈی نوجوان نسل نُوں تباہ کر رہی اے‘ پہلے یونیورسٹیاں وچ بچیاں نُوں ڈرگز دِتی جاندی سی ہُن سکولاں تک ایہ کھلر گئی اے تے بچیاں نُوں منشیات راہیں تباہ کیتا جا رہیا اے پر جدوں دی ساڈی حکومت آئی اے اسیں ایہدے خلاف جہاد شروع کر رکھیا اے تے اسیں پور زور نال ایمرجنسی بنیاداں اُتے ایہدا مقابلا کر رہے آں‘ اوہناں نے کہیا کہ میں پوری قوم نُوں دَسنا چاہندا آں کہ کوئی اِک ادارا منشیات فروشاں نُوں شکست نہیں دے سکدا‘ ایس جہاد وچ ساری قوم نُوں شامل ہونا پوے گا جدوں قوم فیصلا کر لیندی اے تے اوہدوں اوہ معاشرا جت سکدا اے‘ایہ جہڑی زندگی ایپ اے ایہدے راہیں اسیں ماپیاں نُوں ا گاہی دواں گے تے سکولاں دے ٹیچر ز تے علماء کرام منشیات دے خلاف ساڈا ساتھ دین۔