kraamaat@gmail.com
+ +92 333-430-6384


حالات نویں جنگ ول نوں جا رہے نیں؟بہت کجھ نواں ہوون والا اے: شاہ محمود قریشی 


نمائندا رویل January 07, 2020


اسلام آباد (نمائندا رویل) وزیر خارجا شاہ محمود قریشی دا کہنا اے کہ مشرق وسطا دی صورتحال بہت نازک تے تشویشناک اے‘ دنیا ایس نویں جنگ لئی تیار رہوے۔ قومی اسمبلی وچ پالیسی بیان دیندیاں ہویاں وزیر خارجا شاہ محمود قریشی دا کہنا سی کہ ساڈا خطا امن و خشحالی توں محروم رہیا‘ حالات نے نویں کشیدگی نُوں جنم دِتا اے‘ 31 دسمبر نُوں بغداد وچ امریکی سفارتخانے دے ساہمنے احتجاج کیتا گیا‘ امریکا ایس واقع دا ذمے دار ایران نُوں ٹھہراندا اے‘ امریکا دی نظر وچ جنرل قاسم سلیمانی ایہدا ماسٹر مائنڈ اے۔ وزیر خارجا شاہ محمود قریشی نے کہیا کہ ماہرین اسامہ بن لادن تے ابو بکر بغدادی دی ہلاکت نالوں ودھ ایس واقعے نُوں سنگین قرار دیندے نیں‘ ایران نے ہنگامی سیکیورٹی کونسل دا اجلاس بلایا جد کہ عراق وچ وی ایس واقع دے خلاف عوامی ردِ عمل ساہمنے آیا‘ عراق وچ قاسم سلیمانی دے جنازے توں ردِ عمل دا اندازا لایا جا سکدا اے جد کہ عراقی پارلیمنٹ نے ساریاں غیر ملکی فوجاں لئی ملک چھڈن دی قرار داد پاس کیتی۔ وزیر خارجا نے کہیا کہ پاکستان نے 3 تاریخ نُوں اپنا نقطا نظر پیش کیتا‘ ایرانی وزیر خارجا نال تفصیلی گلبات ہوئی تے متحدا عرب امارات سنے ترکی تے سعودی عرب دے وزرائے خارجا نال وی تفصیل نال گلبات کیتی جد کہ یورپی تے ہور ملکاں نال وی رابطے کراں گے۔ وزیر خارجا نے پالیسی بیان وچ کہیا کہ مشرق وسطا دی صورتحال بہت نازک تے تشویشناک اے جہڑی کدی وی کروٹ لے سکدی اے‘ ایرانی سپریم لیڈر برملا انتقام دا اظہار کر چکے نیں‘ آیت اللہ خامنہ ای اپنی قوم نال بدلے دا وعدا کر چکے نیں۔ شاہ محمود قریشی دا کہنا سی کہ ایران وچ غم و غصے دی کیفیت فطری اے جد کہ مقتدی الصدر نے اپنیاں فورساں نُوں وی ہائی الرٹ کر دِتا اے‘ سیکرٹری جنرل اقوام متحدا کہندے نیں مشرق وسطا نُوں اِک نویں جنگ ول سُٹیا جا رہیا اے‘ دنیا ایس نویں جنگ لئی تیار رہوے۔اوہناں نے کہیا کہ عراقی وزیراعظم دی نظر وچ ڈرون حملا عراق امریکاا سیکیورٹی معاہدے دی خلاف ورزی اے‘ مقتدر الصدر نے اپنی فورس نُوں ہائی الرٹ کر دِتا اے‘ آیت اللہ سیستانی نے بغداد وچ غیر ملکی فوجاں دی موجودگی نُوں ناقابل برداشت متھیا اے‘ حزب اللہ دے حسن نصر اللہ نے واقع دے ذمے داراں نُوں کڑی سزا دین دا مطالبا کیتا اے۔ شاہ محمود قریشی نے ایہ وی کہیا کہ پنٹا گان نے ڈرون حملے دا اعتراف کیتا کہ صدر دی ہدایت اُتے کیتا‘ امریکی وزیر خارجا نے ہور امریکیاں اُتے حملیاں دیاں اطلاعواں دا ذکر کیتا‘ 3500 وادھو امریکی فوجی کویت گھلے گئے نیں۔ اوہناں دا کہنا سی کہ جنرل سلیمانی دا قتل بہت سنجیدا ٹورا کاری اے‘ جہدے نتیجے وی ساہمنے آ سکدے نیں‘ اسیں کوشش کر رہے آں کہ او آئی سی نُوں اِک مُٹھ کریے‘ طاقت دا استعمال مسئلے دا حل نہیں‘ ایہدے نال معاملات وِگڑ سکدے نیں۔ وزیر خارجا نے کہیا کہ ایران اپنی روایتی سمجھداری دا ثبوت دیندیاں ہویاں جارحیت توں گریز کرے‘ پاکستان کسے وی اِک پاسی کارروائی دی تائید نہیں کرے گا‘ اسیں اگ بھڑکان دی پالیسی دا حصا نہیں بناں گے