(آسٹریلیا دے جنگل وچ لگی اگ دے حوالے نال اک نظم " بن دیوتا۔۔۔۔۔۔۔")

بِن دیوتا۔۔۔۔۔۔۔

چار چفیرے ظلم ہویا تے جنگل اندر بھانبھڑ مچیا۔۔۔۔۔

دوزخ ورگا نقشابنیا۔۔۔۔

تھاں تھاں لانبو رج رج نچیا۔۔۔۔۔

بے سمجھے بے دوشے پشّو۔۔۔۔

چھاں ونڈدے، رُکّھاں سنگ سڑ گئے۔۔۔

اوہ وی شاید کوئلاہوئے۔۔۔

جیہڑے نس کے گھر وچ وڑگئے۔۔۔

ویلے دے وگدے دریا وچ۔۔۔۔

ترس وغیرا خام خیالی۔۔۔

مٹی ہیرا، ہیرا مٹی۔۔۔۔

سمجھ نہ آوے چال نرالی۔۔۔۔

لکھاں بھُجّن والیوں پشوو۔۔۔

تہاڈی تے کوئی جڑ وی ہے نہیں۔۔۔۔

نہ کوئی تہاڈا پنڈت، جوگی۔۔۔۔

جیہڑا تہانوں ہور طرحاں دی دھِڑتا دیوے۔۔۔

تہاڈی اگے آس وی ہے نہیں۔۔۔۔

جس دے آسرے، زندا سڑن دی پیڑ نوں بھُلّو۔۔۔۔

تہاڈے لئی میں کیہ کر سکدا۔۔۔۔

میرے اپنے دُکھ لکھاں نیں۔۔۔۔

ایٹمی بھانبھڑ بلن والے نیں۔۔۔۔

اساں وی سڑ سواہ ہونا اے۔۔۔۔۔۔

لیکن اسیں تے پشّو نہیں ناں۔۔۔۔

ساڈے لئی تے اجر ودھیرے۔۔۔۔

موجاں، میوے چار چوفیرے۔۔۔۔۔

مینوں خورے کیوں لگدا اے۔۔۔۔۔

ساڈا سانجھا دیوتا سبھ کُجھ ویکھ رہیا اے۔۔۔۔

تسیں کوئی بن دیوتا تے نہیں۔۔۔۔