پنجابی زبان نوں حق دوان لئی ریلی، ریلی دے رَلتیاں دی پنجاب وچ پنجابی نافذ کرن دی منگ،ریلی دے اخیر تے پریس کانفرنس ــــــ رویل نیوز

لاہور (نمائندا رویل)نیشنل پنجاب موومنٹ دے آگو عمار کاظمی ہوراں دی اگوائی وچ پنجابی زبان دے حقاں واسطے شاہ حسین دے دربار توں پریس کلب لاہور تک ریلی کڈھی گئی جہدے وچ وکھ وکھ شہراں توں لوک آئے ۔ساہیوال توں آتش کیانی تے راولپنڈی توں چراغ دین وانہ پنجابی سیوکاں دا قافلا لے کے ایس ریلی وچ شامل ہوئے۔ایس توں وکھ وی پنجاب دے ہر شہر دی نمائندگی کردیاں ہوئیاں لوک اوتھے آئے سن تے اپنی ماں بولی دے نفاذ لئی پلے کارڈ چُکے نعرے ماردے رہے۔ایہ ریلی شاہ حسین دے دربار توں چلدی ہوئی تِن وجے دے قریب پریس کلب لاہور اپڑی تاں اوتھے پنجابی سنگت پاکستان تے پنجابی ادبی سنگت توں وکھ پنجابی پرچار دے کارکناں نے ریلی دے رلتیاں نوں جی آیاں نوں کہیا۔ایسے تھاں تے پنجابی زبان لئی کم کرن والیاں نے تقریراں راہیں اپنی ماں بولی نوں لوڑیندے حق دوان لئی اواز چُکی تے پنجابی زبان نال ہو رہے دھرو نوں مکاون لئی وی کہیا۔اوہناں نے سرکار کولوں عدالت دے حکم انوسار پنجابی زبان نوں مڈھلی تعلیم لئی نافذ کرن دی منگ کیتی۔اخیر تے پریس کانفرنس راہیں اپنیاں منگاں نوں سرکار ساہویں رکھیا گیا۔