پنجابی سنگت پاکستان وچ تبدیلی آگئی ـــــــ رویل

پنجابی زبان و ادب دے ودھا لئی بہت ساریاں سیاسی تے ادبی تنظیماں کم کر رہیاں،جہناں وچ پنجابی سنگت پاکستان ذکر جوگ اے۔ سنگت دا باقاعدا تنقیدی تے اُچیچا اجلاس ہر ہفتے اپنے ویلے سِر ہوندا اے۔تنظیم ولوں ہر سال نویں امیدوار اں دا چناؤ کیتا جاندا اے، جہدے وچ سنگت دے ممبر حصا لیندے نیں۔اِنج پنجابی ادبی سنگت پاکستان ولوں 2020دے امیدوار برائے سیکرٹری تے جواینٹ سیکرٹری لئی 29 دسمبر نوں الیکشن دا آہر کیتا گیا۔سیکرٹری دے امیدوار لئی کاغذات نصیر احمد تے ایم۔ وائی شاہد جدوں کہ جواینٹ سیکرٹری دے امیدوار لئی نذیر عباس تے ڈیوڈ پرسی ہوراں نے کاغذات جمع کروائے سن۔

ووٹنگ دا ویلا سویرے 10وجے توں شامیں 5وجے تیکر دا سی۔ سردی ہون کارن لوک اپنی اپنی مرضی دے امیدواراں نوں ووٹ پان لئی دیر نال ہی آنا شروع ہوئے،ایس موقعے اُتے بہت سارے سنگتیاں دی اک دوجے نال ملاقات ہوئی۔ ہر کوئی ووٹ پان دے نال نال اپنیاں اپنیاں گلاں وچ لگا ہویا سی، گلاں وچ لگے وی کیوں نہ ہوندے۔ الیکشن دا دن سے تے کئی سجناں بیلیاں نوں اکٹھے ہون دا ویلھملیا سی، ایس ساری رونق لان دا سارا کریڈٹ امیدواراں نوں جاندا اے جہناں ہمت کر کے لوکاں نوں فون کیتے تے اوہناں نوں ووٹ پان لئی سدیا۔

بہت سارے لوکاں دا آکھنا سی کہ الیکشن نہیں ہونا چاہیدا سی، ادبی تنظیم اے ایہ تھوڑی کوئی سیاسی تنظیم اے جہدے لئی الیکشن ہوئے۔اوہناں دی گل کسے حد تیکر ٹھیک اے پر تُسیں آپ سوچو جے الیکشن نہ ہوندا تے اینی رونق کویں لگنی سی؟کویں اک دوجے نوں کئی کئی مہینیاں بعد ملن والے بیلیاں نوں ملن دا موقع لبھنا سی؟

جتھے شاعر بھرا اکٹھے ہون اوتھے شاعری نہ ہوئے ایہ کویں ہو سکدا اے۔ایس موقعے نوں غنیمت سمجھدے ہوئے بہت سارے یاراں بیلیاں اپنا اپنا کلام سُنایا، کسے نہ کسے ہور دا کلام ترنم نال سُنایا،یعنی کہ جہدا جو دل کر رہیا سی اوہ کری جا رہیا سی، کئی بیلی ووٹ پاؤندے ای نکلدے جا رہے سن۔ سنگتیاں چاء،،بسکٹ،بوتلاں تے مالٹے کھا کے اپنی اپنی بھکھ مٹائی۔اِنج ای رُجھاں پاروں پتا نہ لگا کہ کدوں پنج وج گئے۔ ہُن سارے بیلیاں نوں جِتن والے امیدواراں دے ناواں دی اُڈیک سی۔ چیف الیکشن کمشنرناصر بلوچ ہوراں دے نتیجا بولن توں پہلاں اقبال قیصر ہوراں نے گل بات کردے ہوئے آکھیا کہ ایس الیکشن دا سبھ توں وڈا سہرایم۔وائی شاہد تے نذیر عباس ہوراں دے سِر اے جہناں نے آکھیا کہ اسیں مقابلا کراں گے تے ایہ جِنی وی رونق اے ایہ ساری ایہناں بندیاں دی وجھا توں لگی اے تے میں ایہناں ساریاں دا شکر گزار اں۔ ایہدے مگروں چیف الیکشن کمشنر نے نتیجے دا اعلان کیتا،نتیجا جو آ رہیا سی اوہدا اشارا تے پہلاں ای اقبال قیصر ہوراں کر دِتا سی پر ناصر بلوچ ہوراں نے باقاعدا اعلان کردے ہوئے نصیر احمد تے ڈیوڈ پرسی دی جِت دا اعلان کیتا۔

ایہ اعلان دی اُڈیک سی کہ جِتن والے امیدوار نے ہارن والے امیدوار نذیر عباس تے ایم۔وائی شاہد دے گل وچ ہار پائے۔ہر بندا ایہ منظر ویکھ کے بہت خش ہویا۔

ایس موقعے اُتے سانوں وی اپنا بیتیاالیکشن چیتے آیا جو اسیں خیر نال 2017وچ بطور جواینٹ سیکرٹری لڑیا تے سواد نال ہارے۔پر ہارن دا دُکھ اینا نہیں سی کیوں جے نتیجے دا پہلاں پتا سی اوہدی وجھا ایہ سی کہ جہناں سانوں ہلا شیری دِتی اوہدی ساڈے نال نہیں سن۔ خیر اوہ تجربا میرے لئی تے بہت چنگا رہیا۔وقتی طور اُتے پریشانی دا ساہمنا رہیا پر اوس وقتی پریشانی مگروں ہورکئی بوہے کُھل گئے۔ اک ویلا اوہ وی آیا جدوں بلامقابلا جواینٹ سیکرٹری بنن دی وی آفر ہوئی پر اودوں دیر ہو گئی سی۔ اوہدی وجھا کوئی انا نہیں پڑھائی سی کیوں جے ایم۔ فل دی کلاس لین لئی فیصل آباد جانا پیندا سی فیر نوکری وغیرا وی نال نال چل رہی سی تے ساڈے کول سنگت لئی ٹایم نہیں ہونا سی، ایس لئی دوستاں اگے پہلاں ای معذر ت کرلئی۔کیوں جے پہلے چھہ مہینے سنگت لئی آنرری کم کر چُکے ساں ایس لئی سانوں پتا سی کہ ویلا نہیں ہونا۔

نتیجا آن مگروں سارے بیلی اک دوجے نوں ہسدے ہسدے ملدے رہے۔ اِنج سنگ دا الیکشن تے ہوگیا۔جِتن والے جِت گئے۔ہارن والیاں نے وی اپنی ہار نوں کِھڑے متھے نال قبول کیتا۔ الیکشن مُک گیا پر بیلیاں وچکار محبت ودھ گئی۔الیکشن مگروں پہلا اجلاس حلف برداری دا سی، اسیں نہ اپڑ سکے،پر11جنوری نوں اک وار فیر سنگت جا اپڑے۔اجلاس دے شیڈول مطابق صدارت اقبال قیصر ہوراں دی سی تے سبھ توں پہلاں عظیم پنجابی صوفیشاعر بابا فریدؒ ہوراں دی شخصیت تے اوہناں دے کلام بارے بڑے سوہنی گل بات ہوئی۔جہدے مگروں نوجوان کہانیکار زاہد مصطفی اپنی کہانی تنقید لئی پیش کیتی۔ایہدے مگروں مشہور جانےپچھانے سوجھوان تے پنجابیاں دا مان زاہد حسن ہوراں نال گل بات دا سیشن سی۔ زاہد حسن نے اپنے ادبی سفر دے نال نال پنجابی زبان دی اہمیت بارے چانن پایا۔اِنج ایہ ویلا بہت ای سوہنا لنگھیا۔سنگت وچ بہت تبدیلی محسوس کیتی۔ایس تبدیلی دا سارا سہرا نصیر احمدتے ڈیوڈ پرسی دے نال نال اوہناں د ی باقی ساری ٹیم نوں جاندا اے۔