شاہد شیدائی ہوراں دی ہڈ بیتی ”چیت اچیت" (3) ۔۔۔۔۔رویل

رسالہ ”منہاج القرآن“ دا مڈھ بنن لئی مینوں بہوں اَوکڑاں چوں لنگھنا پیا۔ میں اوہناں دے جھوٹھے لاریاں مگر لگ کے اپنا دفتر تباہ کر لیا۔ سارے گاہک ایدھر اودھر ہو گئے سن تے دفتر وچ ہن الو بولن لگ پئے سن۔دفتر دا کرایاوی کٹھا نہیں سی ہوندا۔ اُتوں آئی بی ایم دا سال وی پورا ہون والا سی تے اوہناں دا بھاڑا سر تے کھلوتاسی۔ اخیر میں اوہ دفتر چھڈ دتا تے رایل پارک وچ اِک اجہےدفتر نال سانجھ کر لئی جہڑا پہلاں اِی کسے ہور (نثار عباس ہوراں دے) دفتر دا حصاسی۔ نوجوان کم کران لئی ساڈے دفتر آؤندا ہوندا سی تے اوہنے ایس لوبھ وچ سانوں اپنے نال بٹھا لیا کہ اوہدا کم وی پرنٹنگ وغیرہ دا اِی سی تے انگریزی عبارتاں لکھوان لئی اوہنوں اپنے دفتر وچ اِی سہولت مل گئی سی۔ پر اوہدے نال وی نبھ نہ سکی کیوں جے ڈیزائننگ دا تھوڑا بہوں کم میرا پُتّر وی کر لیندا سی۔ ہویا اِنج کہ اِک دن ترکالاں ویلے‘ اوہدا اِک گاہک آ گیا‘ پر اوہ کسے گھریلو کم پاروں اپنے پنڈ گیا ہویا سی تے اوہنے دو دناں مگروں واپس آؤنا سی۔ گاہک نوں کم کراؤن دی چھیتی سی تے اوہنے مِنّت ترلا کرکے تن سو روپے وچ اپنا کم ساڈے کولوں کرا لیا۔ نوجوان واپس آیا تے اوس نوں اوسے گاہک کولوں پتا چل گیا کہ اسیں اوہدا کم کیتا سی۔ اوہنے رَولا پا کے نثار عباس ہوراں نوں دسیا کہ اسیں اوہدا گاہک خراب کر دتّا اے کیوں جے جیہڑا کم اوس نے اِک ہزار روپے وچ کرنا سی‘ اسیں اوہ صرف تِن سو وچ کر دِتّا سی۔ نثار ہوراں نے سانوں اوس دفتر وچ مُڑ ڈیزائننگ دا کم کرن توں منع کر دتّا پر سانوں ایہ گل منظور نہیں سی کیوں جے ساڈے آئی بی ایم کمپوزر دا کم وی ڈیزائننگ نال جُڑیا ہویا سی…… اسیں اوہ دفتر وی خالی کرن دا تہیاکر لیا تے آئی بی ایم کمپوزر ویچن لئی لا دتّا۔

رایل پارک دے اِک ڈیزائنر نے مہر بند لفافے وچ کمپوزر دا مُل تیہ ہزار روپے لا کے بھجوایاتے میرا مستک بھَوں گیا۔ مینوں شک ہویا کہ شاید میں اوہ کمپوزر مہنگا خرید لیا سی۔ اودھر اوس سرکاری افسر نے اپنا پرایویٹ دفتر خالی نہیں سی کیتا تے اوتھے اِک ہور اوہو جیہا آئی بی ایم کمپوزر لیا کے رکھ لیا ہویا سی تے اوہ بہاولپور وی نہیں سی گیا۔ میں اپنے اِک بیلی اکرام بٹ نوں آکھیا کہ اوہ ذرا پتا تے کرے کہ اوس سرکاری افسر نے کمپوزر کتھوں تے کنے دا خریدیا سی۔ اکرام بٹ بڑا سمجھدار آدمی سی؛ اوس نے جھٹ پتا کر لیا کہ دوویں ویلے اوہ کمپوزر سیکریٹریٹ دے دفتروں چالھی چالھی ہزار روپے وچ خریدیا گیا سی۔ میں سمجھ گیا کہ میرے نال دھوکھا ہویا سی تے مینوں فریب دین والا شاعر شعیب بن عزیز سی جیہنے مینوں شیشے چ لاہ کے اپنا بُتّا سا ر یا سی۔

(باقی اگلی وار)