kraamaat@gmail.com
+ +92 333-430-6384


پنجابی فکشن 2018


ک۔م December 09, 2019


پنجابی زبان و ادب نے پچھلے کجھ ورھیاں توں فکشن دے کھیتر وچ چنگا تے چوکھا وادھا کیتا اے ایہدے کئی کارن نیں جہناں وچوں اپنی زبان نال پیار دا ہنگارا بھردے لکھاری وی نیں تے نال نال اوہ ادبی سنستھاواں جہناں نے پنجابی فکشن نوں پروموٹ کرن لئی جتن کیتے نیں۔سرکاری سطح تے پِلاک ولوں انعاماں دا سلسلا شروع ہون نال وڈی تعداد وچ پنجابی لکھن والے لکھاری ساہمنے آئے نیں تے اوہ وکھ وکھ کھیتراں وچ اپنی پچھان بنا رہے نین۔کوئی لگ بھگ سٹھ لکھ تک دے انعام لکھاریاں نوں ونڈے جا رہے نیں۔ایہدے نال نال مسعود کھدر پوش دا وی اک اہم کردار رہیا اے پچھلے ورھے ایہ انعامی سلسلا بند کر دتا گیا سی جو ایس ورھے توں فیر چالو اے۔کینڈا توں ڈھاہاں ایوارڈ نے پنجابی فکشن دے ودھا لئی ڈھیر کردار ادا کیتا اے۔اوہناں نے پنجھی ہزار ڈالر دا اک انعام تے دس دس ہزارڈالراں دے دو انعام ونڈن دا جو سلسلا شروع کیتا اے اوہدے نال کئی لکھن والیاں نوں ہنگار تے پریرناا ملیا اے۔ہور تے ہور جہڑے پنجابی لکھن نوں خیر باد کہ چُکے سن اوہ فیر میدان وچ نظر آندے نیں۔ ایس دے نال اک ہور کم ویکھن وچ آیا اے کہ ہورناں زباناں دے لکھاریاں نے وی اپنا مہاڑ پنجابی لکھن ول کر لیا اے جس دا کریڈٹ سبھ نوں جاندا اے۔کجھ لکھاریاں نے تاں اپنیاں کہانیاں نوں ترجما کر کے وی کتابی صورت وچ چھپوا لیا اے جہناں وچوں نیلم احمد بشیر تے مخدوم سلیمان ٹیپو دا ناں وی آندا اے۔ پنجابی فکشن نے پچھلے کجھ ورھیاں توں جہڑے معیاری پندھ طے کیتے ہن اوہ جگت پدھر دے نیں۔ایس ورھے وی پنجابی فکشن وچ معیاری وادھے ہوئے نیں جہناں دا کُجھ ویروا انج اے۔1۔”ہر گُچھا زخمایا“ (کہانیاں) نیلم احمد بشیر (پنجاب انسٹی ٹیوٹ آف لینگوئج آرٹ اینڈ لٹریچر،۱قذافی سٹیڈیم فیروز پور روڈ لاہور)2۔ ’’تُوں گھر چلا جا“ (کہانیاں) مقصود ثاقب (سچیت کتاب گھر،11 شرف مینشن،چوک گنگا رام،بُک سٹریٹ لاہور)3۔”جویں کوئی سمجھے“ (کہانیاں) علی انور احمد (پنجابی مرکز،129 عزیز منزل، حمزا ٹاؤن۔19واں کلومیٹر،لاہور)4۔”ہُوکاں“ (کہانیاں) مخدوم ٹیپو سلمان(فکشن ہاؤس،بُک سٹریٹ،68 مزنگ روڈ،لاہور)5۔”بھڑاس“ (کہانیاں) گل زیب عباسی(مکتبہ فجر لاہور)6۔”ہِجر تیرا جے پانی منگے“ (کہانیاں) زاہد حسن(سنگری پبلیکشنز گلی نمبر 2 ماڈل ٹاون کوتوالی روڈ فیصل آباد)7۔”شہر دی کُڑی“ (کہانیاں) عُمر فاروق()8۔”کون؟“ (ناولٹ) مدثر بشیر(سانجھ پبلیکشنز،بُک سٹریٹ لاہور)9۔سائیں ہتھ ڈور (کہانیاں) نسیم اقبال بھٹی 10۔سانجھی کُکھ (ناول) امین ملک بابا فرید بُک فاؤنڈیشن،لاہور11۔ گھُنوں (ناول) احمد شہباز خاور جمال پبلیکشنز،فیصل آباد نیلم احمد بشیر دا ناں ادب دی دُنیا وچ کوئی اوپرا ناں نہیں اے۔آپ دی پنجابی کہانیاں دا پہلا مجموعہ اپریل 2018ء وچ چھاپے چڑھیا اے جس کے وچ کُل اٹھارھاں کہانیاں شامل ہیں (اُنج پنجابی کہانی وچ ایسے عنوان دا مجموعہ نگہت خورشید ہوراں دا وی چھپ چُکیا اے۔ جو پاکستان پنجابی فکری سانجھ لاہور ولوں 2010ء وچ شائع ہوا گیا سی جس دے کُل صفحے 112 تے سولھاں کہانیاں شامل سن۔) نیلم احمد بشیر اِس کتاب نوں اوہناں نے اپنے ابا جی احمد بشیر دے ناں کیتا اے جو پنجابی زبان نال محبت دی وجہ توں وی اک وکھری پچھان رکھدے ہیں۔ اوہ اپنی گلبات وچ لکھدے ہیں کہ پنجابن ہوون دے ناتے یہ اوہناں دا فرض بن جاتا سی کہ اوہ اپنی مادری زبان وچ لکھن۔”جے میں کدے وی پنجابی نہ لکھدی تے میکو ں خورے میرے ابّااحمد بشیر اگے جاکے دھی منن توں ای انکار کر دیندے“ مقصود ثاقب دا کہانی پراگا ”تُوں گھر چلا جا“ وی ایسے برس وچ چھپیا اے جو کہ اک منجھے ہوئے افسانہ نگاری دی اک عمدا مثال نیں۔اوہ زبان و بیان تے بہت زیادہ زور دیندیاں ہویان پڑھنہار نوں وی جذبات وچ ای گوا دیندے نیں۔علی انور احمد دا مجموعہ”جِویں کوئی سمجھے“ پنجابی مرکز لاہور ولوں شائع ہوا گیا جہدے وچ اٹھارھاں کہانیاں نیں۔علی انور احمد ہوریں اجہے کہانیکار نیں جہناں نوں اوہناں دی کتاب ”تند تند میلی چادر“ تے ڈھاہاں ایوارڈ وی مل چُکیا اے۔علی انور احمد ہوراں دا اسلوب وکھرا اے۔ اوہ بہت زیادا گنجھلک گلاں سناون دے عادی نہیں۔ سِدھی ساہویں گل کرنا اوہناں تے مُکدا اے۔ مرد دی فطرت ہووے یاں عورت دی۔ اوہ اوویں ای بیان کردے نیں جویں اوس داحق ہوندا اے ایسے لئی تاں اوہ گھاٹے وادھے دی بناوٹی تاثر قایم کرن واسطے وادھو دی فلاسفی اُتے وی یقین نہیں رکھدے۔ جادوئی حقیقت نگاری نوں کوئی کوئی لِکھاری ای سانبھ سکدا اے ایسے پراگے دیاں کہانیاں پڑھدیاں ہویاں تہانوں احساس ہوندا اے کہ اوہ جادوئی حقیقت نگاری ایوں کردیاں ہویاں پڑھنہار نوں اپنے کرداراں دے نال نال ٹوردا وکھائی دیندا اے۔علی انور احمد نوں اپنے پڑھنہاراں دا پتا اے تے ایہ کسے وی لکھاری واسطے بہت وڈی گل ہوندی اے۔ ایسے لئی اوہ لکھدیاں ہویاں کوئی اجہی گھُنڈی نوں نال نہیں رکھدے جس واسطے لکھاری کولوں پُچھنا پوے کہ ایہ کیہ اے؟ نویکلا پراگا اوہناں دا یارھواں کہانی پراگا اے جہناں وچ اوہناں نے نویں موضوع چھیڑے نیں تے کہانی دے وچ نویں تجربے وی کیتے نیں۔ایہو جہے کہانیکار پنجابی ادب دا اوہ چمکدا تارا ہوندے نیں جو بے لوث اپنی ماں بولی دی خدمت کر دے رہندے نیں۔ٹائٹل کہانی ”جویں کوئی سمجھے“ اجہے انسان دی کہانی اے جو نفساتی طور تے دو چتی دا شکار اے تے اپنی ووہٹی نوں دباون واسطے پستول نوں کول رکھدا اے ایہ پستول ای اوس دے اندر دی نفسیات نو وکھاندیاں ہویاں اوہدی اجہی دشمن بن جاندی اے کہ اوہدی گھر والی اوس توں دُور ہو جاندی اے تے پستول نال اپنا جیون بِتان لگدا اے۔کہانیکار نے نفسیاتی ڈھنگ دا ورتارا بڑے سوہنے انداز نال کیتا اے۔ ایہناں توں وکھ بہاول نگر وسدے گل زیب عباسی ہوراں دا دوجاکہانی پراگا ”بھڑاس“ وی چھپ چُکیا اے۔ ایس توں پہلاں اوہناں دا اک کہانی پراگا ”نِماں دے رُکھ“ وی چھپ چُکیا اے۔ایس نوں پنجابی مرکز لاہور ولوں چھاپیا گیا سی جد کہ ہتھلا کہانی پراگا ناز اوکاڑوی دے اُدم نال ساہمنے آیا اے ۔ گل زیب عباسی دے ایس کہانی پراگے وچ کُل چودھاں کہانیاں نیں جو جیون دے کئی رنگاں نوں بیان کردیاں نیں۔اوہناں نے کہانی نوں مقصدیت وچ لکوون دی تھاں سدھے سادھے انداز نال بیان کرن نوں ترجیح دتی اے۔ایہ کہانی پراگا دسمبر وچ ای چھپیا اےایس دے نال نال مدثر بشیر ہوراں دا ناولٹ ”کون“ وی سانجھ ولوں چھاپے چڑھیا اے۔ مدثر بشیر وی پنجابی فکشن وچ کوئی نواں ناں نہیں اے اوہناں دا کہانی کہن دا فن تے بیانیے تے گرفت بھر پور ہوندی اے۔اوہ غیر محسوس طریقے نال پڑھنہار دے دِل اندر لہ جاندے نیں۔دھیمے بیانیے دے انداز نوں نال نال لے کے ٹرنا تے فیر کہانی دی روانی نوں کدھرے متاثر نہ ہوون دینا آپ دا خاصا اے۔ ایس ناولٹ وچ اوہناں دے اک اک جملے تے جہڑی محنت کیتی اے اوہ پڑھن والیاں نوں شروع توں ای اپنے ول کَیل لیندی اے۔ناولٹ دی کمپوزنگ کردیاں ہویاں کسے منجھے ہوئے فنکار دا فن ویکھیا جاسکدا اے، کدھرے کدھرے ایس دا گمان ہوندا اے کہ ایہ کمپوزنگ دی تھاں کتابت ہوئی اے۔زیراں زبراں لگا کے لفظاں نوں لکھیا گیا اے پر کدھرے ایہ زبراں تے زیراں وادھو دیاں ای لگدیاں نیں جویں لفظ ”دِی“ دے وچ (دِ) دی زیر مثال وجھوں ویکھی جا سکدی اے۔ ایس طرحاں ایس ناولٹ نوں کافی محنت نال الیکیاگیا وی لگدا اے جس کر کے کہانی تے پکڑ کدھرے وی کمزور نہیں پیندی۔ایہ ناولٹ جہڑی تکنیک وچ لکھیا گیا اے اوہ مادھو لال حسین وانگ ای اے جو نین سُکھ دی تخلیق اے۔ناول دا مرکزی کردار سرمد اے جس نال کئی ہور کرداراں دے بارے وی جانکاری ملدی اے سرمد کئی کرداراں وچ جا وڑدا اے کدے اوہ اک مزدور اے کدھرے کلرک کدھرے گویّا تے کدھرے اجہے کردار وچ جا وڑدا اے جس وچوں نکلنا اوس واسطے ممکن نہیں ہوندا۔کئی نقاداں دے نیڑے ایہ ناول کئی تھاواں تے رُک رُک جاندا اے۔ناول وچ کئی تھاواں تے جہڑے حوالے واسطے کردار یاں معلوماتی انداز دین دی کھیچل کیتی اے اوہدے نال پڑھنہار نوں نال نال رکھنا ناول نگار دے ای وَس ہوندا اے۔ایس ورھے دی بدلدی رُت نومبروچ زاہد حسن دا ک کہانی پراگا''ہجر تیرا جے پانی منگے'' چھپ کے ساہمنے آیا اے جہدے و چ بارھاں کہانیاں نیں۔ کہانی دے کھیتر دے نال نال اوہناں دی پچھان ناول نگاری وی اے ''عشق لتاڑے آدمی''۔''غلیچا انن والی''۔''تسی دھرتی''۔''قصہ عاشقاں '' ورگے شاہکار ناول اوہناں نے پنجابی ادب نوں دان کیتے ہن۔''تسی دھرتی'' تے اوہناں نوں جگت پدھر دا فکشن لئی ایوارڈ''ڈھاہاں ایوارڈ'' وی مل چُکیا اے۔چڑھدے تے لہندے پنجاب وچ اوہناں دیاں لکھتاں نوں بڑے شوق نال پڑھیا جاندا اے کیوں جے اوہناں دی لکھت وچ جو نرولتا تے رنگ ہوندے نیں اوہ کدھرے ہور نہیں۔زاہد حسن ہوراں دے ایس پراگے بار ے پر وفیسر ڈاکٹر معین نظامی ہوریں دیباچے وچ گلبات کردیاں لکھدے نیں:''اوہ لوکائی نوں اپنیاں باہرلیاں اکھاں نال ای نہیں ویکھدا،اندر دیاں اکھاں وی ورتدا اے تے کرداراں تے شئیاں دے اندر وی جھاتی ماردا اے۔اوہدے کولوں کُجھ وی لُکیا نہیں رہندا اے۔باہرلے منظر ہوون یاں اندرلے، اوہدی قلم اوہدیاں ہوبہو مُورتاں بناندی اے کہانیاں دے موضوع تے فضا وی ونکو ونکی اے تے اپنا تاثر جمان وچ کامیاب اے''ایس کہانی پراگے نوں بڑے سوہنے ڈھنگ نال سنگری پبلیکشنز گلی نمبر 2 ماڈل ٹاون کوتوالی روڈ فیصل آباد توں چھاپیا گیا اے۔کتاب دا مُل 280 رُپئے اے تے کُل صفحے 104 نیں،مُکھ مُورت آصف رضا ہوراں نے بنایا اے۔امین ملک اپنی کہانی کاری تے ناول نگاری وجوں پچھان رکھدے نیں جو چڑھدے تے لہندے دوواں پاسے اپنیاں لکھتاں راہیں مانتا کھٹ رہے نیں اوہناں دا ایس ورھے ناول ”سانجھی کُکھ“ دے سرناویں ہیٹھ آیا اے اوہ کہانی نوں جذبات راہیں بیان کرنا جاندے نیں تے کدھرے کدھرے جذبات اینے کُو ودھ جا ندے نیں کہ کہانی کدھرے پچھانہْ رہ جاندی اے۔ ایہ ایس کر کے وی اے کہ اوہ گل کردیاں ہویاں اگانہْ ٹُرن دی تھاں اکو تھاں تے ای کھلو کے گل نوں مِدھی ای جاندے نیں جس نال بے سوادی پیدا ہو جاندی اے۔منشا ء یاد نے ایسے لئی تاں ایہناں دے کہانی لکھن بارے فن نوں آکھیا سی کہ ایہ سُوئی دے نال منجی اُنن لگ پیندے نیں۔عمر فاروق دا کہانی پراگا '' شہر دی کُڑی''عمر فاروق پنجابی کہانی دے پِڑ وچ اک نواں وادھا اے اوہناں دا کہانی پراگا '' شہر دی کُڑی '' چھپیا جہدے وچ 14 کہانیاں نیں۔ایس دایباچا رائے محمد خاں ناصر ہوراں نے لکھیا اے۔ کجھ کہانیاں وچ کہانیکار نے ایس گل دا اُکا دھیان نہیں رکھیا کہ عقلی رنگ نال وی تاں گل کیتی جاوے بس کہانی بنان دے چکراں وچ سبھ کجھ انج دا بیان کرنا کہانی نوں وی کمزور کردا اے تے کہانیکار دے وِژن نوں وی دسدا اے جس نوں حالے بہت کجھ سکھن دی لوڑ اے۔پنجابی کہانی نوں اجہے کہانیکاراں دی لوڑ اے جو کہانی نوں کہانی بناندیاں ہویاں سماج دی اوہو ای تصویر دکھان جو ہے نہ کہ اوہ وکھان جو لکھاں کوہاں دُور اے تے جس نوں عقلاں نال وی نہیں پرکھیا جا سکدا اے۔عمر فاروق دیاں کہانیاں وچ محبت دی اک مثلث بن جاندی اے کدھرے کمرشل ڈرامیاں وانگ دو کُڑیاں تے اک مُنڈا اے تے تے کدھرے دو مُنڈے تے اک کُڑی نال پیار کرن دا ٹرائی اینگل اے،جس توں ایس نوجوان کہانیکار نوں باہر نکل دی لوڑ اے نہیں تاں ایس دا ادبی سفر مُک جاوے گا۔''ٹرین دا پیار'' وی رضا تے صفیہ دی محبت دی کہانی دوالے گھمدا اے جو ویاہ توں بعد صفیہ نوں خُدکشی ول لیجاندا اے۔ایہ رضا اوہو ای ہوندا اے جو اپنا کاوروبار چھڈ کے صفیہ دے سکول وچملازم ہوندا ے تے فیر ویاہ توں بعد اوس دا کیہ ہویا کہ اوہ صفیہ توں دور رہن لگ گیا ایہ سارا نفسیاتی اثرات نال بیانن دی لوڑ سی جس نوں کچے پن نال تے کچجے رنگ نال بیان کر کے کہانی وچ پھکڑ پن ودھا دتا گیا اے۔آپ دیاں کہانی وچ محدود وسیب وچ کہانی پھسی ہوئی دکھائی دیندی اے جد کہپنڈ دیاں ریتاں تے روایتاں توں کہانی باہر نکل چُکی اے یاں اوس دا سفر جا ری اے ایس بارے نویں لکھن والیاں نوں ضرور جاننا چاہیدا اے تاں جو کہانی لکھدیاں ہویاں نویں تے نروئے رنگاں نوں ساہمنے لیاندا جاوے۔ آس کرنے آں کہ اگلے کہانیاں دے پراگیاں وچ اوہ اک خاص گھیرے توں باہر نکل جاون گے۔مخدوم ٹیپو سلمان ہوریں پنجابی کہانی وچ اک نواں ناں اے اوہناں دا کہانی پراگا ”ہُوکاں“ چھپیا اے ایس نوں فکشن ہاؤس لاہور ولوں چھاپیا گیا اے۔ایہدے وچ کُل تیرھاں کہانیاں شامل نیں۔ایس کہانیکار کول ایہ فن اے کہ کہانی دا تانا بانا بُن رہیاں ہوندیاں اوہناں دے ساہمنے انسان دی نفسیات نوں کدھرے وی وسرن نہیں دتا اے۔انسان دی گنجھلاں بھری نفسیاتی کیفیت نوں جاننا تے فیر ایہناں نوں لفظاں وچ ڈھالنا کسے وڈے فنکار ہوون دی ای تصدیق کردا اے۔مخدوم ہوراں نے اپنے رچے کرداراں نوں جیوندا جاگدا وکھایا اے ''تھائی کھسرا'' وچ اوہناں نے جس وسیب دی گل کیتی اے اوہ بدیسی وسیب اے تے اوس بدیسی وسیب وچ انسان دی جو کیفیت اے اوہ کئی تھاواں تے نظر آندی اے اوہناں نے اپنی ایس ہشیاری بھری کاریگری نوں لگ بھگ ہر کہانی وچ ورتیا اے جویں کہ '' اُچی سُتھن '' کہانی وچ وی اوہناں نے اپنے وسیب دی گل کردیاں ہویاں باہرلے وسیب وچ وس رہے یاں کجھ دیر وچ گئے ہوئے لوکاں دی ذہنی تے سماجی حالت نوں موضوع بنایا۔ایہ موضوع دے نال کھلھ مان کر کے اوہناں نے جس جس ذاویے نال انسان دے کئی رنگاں نوں بیان کیتا اے۔مخدوم ہوراں نے کہانی وچ جہڑے جہڑے وسائل ورتے نیں اوہناں وچ اجہی گلبات دی وی ورتوں کیتی گئی جو خاص ماحول نوں وی نال لے کے ٹردی اے تے ایس نوں کرداراں راہیں اگلوانا تے کسے باہمت لکھاری دا ای کم ہو سکدا اے۔'' دیہاڑ '' کہانی وچ اپنی اپنی دُنیا وسا کے جیندے لوکاں دی کہانی اے ۔ہر انسان نے آپنے چفیرے جہڑی کندھ اساری اے اوس توں باہر نکلنا اوکھا اے ایہ کندھ معاشی وی اے تے سماجی وی جو ہر آون والے لمحے نال اُچی تے ہو ر اُچی ہو رہی اے۔ مخدوم ٹیپو ہوراں دی کہانی''اُچی سُتھن '' دا انداز سادا اے پر ایس دا موضوع نویکلا اے۔''مِٹی'' وچ اوہناں دے وچار نیں کہ جس مٹی دی کنک کھا کے اوہ وڈا ہوندا اے،اوہ مٹی نرا اوہدا جُسا ای نہیں پکاندی،اوہدی سوچ نوں دَم وی لاندی اے۔'' میں ہاں کنک دا دانہ'' اجہی کہانی اے جو ساڈے وسیب نال جُڑی رِیت نوں دسدی اے۔'' گناہ'' وچ حق دی کھوج کردے اک کردار دی گل بیان کیتی گئی اے جو شراب پیندیپیندے سوچدا اے کہ اوہ نماز پڑھے۔ایہ ہوش تے نشے دی کیفیت وچ اوہدے دماغ اندر جو جنگ چھڑی اے ایس نوں مخدوم ہوراں نے بڑے سنجیدا تے ڈھکویں انداز نال بیانیا اے۔کمپوزنگ کسے انجان پنجابی دے ہتھوں ہون کر کے کئی تھاواں تے کمپوزٹر دا کچج پُنا پڑھنہارا ں دا سواد کِر کرا کردا اے کیو ں جے پنجابی لکھدیاں ہویاں ان گنت غلطیاں نیں، مخدوم ٹیپو ہوراں نوں اگلی کتاب وچ ایہناں ول ضرور دھیان دینا چاہیدا اے کیوں جے کئی تھاواں تے گل ہور دی ہور ہو جاندی اے جس کر کے ایس ول دھیان دی لوڑ اُچیچے طور تے پے جاندی اے۔ایس کتاب دے کُل صفحے 160 تے مُل 300 روپے نیں فکشن ہاؤس لاہور ولوں ایس نوں پکّی جلد نال چھاپیا گیا اے۔لائناں کھلیاں کر کے تے وقفے دے دے کے کتابی صُورت نوں وی وگاڑن وچ پبلشر نے کوئی کسر نہیں چھڈی اے پر ایس دا قصور وار کہانیکار ہوریں بلکل نہیں نیں۔ایس توں وکھ نسیم اقبال بھٹی ہوراں دا کہانی پراگا ”سائیں دے ہَتھ ڈور“ وی چھاپے چڑھیا اے ایہ سرگودھا وسدے کہانیکار کئی چِراں توں وکھ وکھ پنجابی ادبی رسالیاں وچ کہانیاں لکھ کے بطور کہانیکار اپنی اک وکھری پچھان بنا چُکے سن۔اوہناں دے کہانیاں دے پراگے دی لمے چِر توں اُڈیک سی جو ایس ورھے پوری ہو گئی اے۔ایس پراگے وچ کُل یارھا ں کہانیاں شامل نیں تے ہر کہانی پڑھن والے دے احساس نوں چُھوہندی اے۔اوہناں دے کہانی پراگے وچ لوڑیندی تفصیل نگاری تاں موجود ای پر اوہناں نے کدھرے وی اپنیاں کہانیاں نوں بوجھل نہیں ہوون دِتا اے جتھوں اندازا ہوندا اے کہ اوہناں نے کہانیاں نوں اپنے لفظاں وچ ڈھالدیاں ہویاں تخلیقی عمل نوں اگیرے رکھیا اے۔آپ نے کرداراں دے نال تخیل نوں بیانن لئی تخلیقی رنگ نوں ہور ودھا کے بیان کیتا اے۔ایس دی اک عمدا مثال اوہنا ں دی کہانی ”فِکر“ وچ ویکھی جا سکدی اے۔اوہ اپنیاں کہانیاں وچ مکالمیاں دی تھاں بیانن دے انداز نال اگے ودھان نوں ترجیح دیندے نیں تے ایسے ای سوکھت نال اوہ کہانی لکھدے ہوئے پڑھنہار نوں وی نال کہانی دے کرداراں دا احساس کرن والا بنا دیندے نیں۔پنجابی ادب وچ احمد شہباز خاور ہوراں دا ناں کوئی نواں نہیں اے اوہ اپنی کہانی،شاعری راہیں اپنا آپ منوا چُکے نیں۔ اوہناں دا پنجابی فکشن دا پندھ 1994توں مُڈھ بنھ چُکیا اے '' چُپ دی چیک '' اوہناں دا پہلا کہانی پراگا اے ایس توں مگروں 2011 وچ '' کچ دا سچ'' تے 2016 وچ '' چِنتا چِخہ چفیر '' چھپیا اے۔اوہناں دیاں بولیاں دی کتاب وی چھاپے چڑھ چُکی اے ایس توں وکھ اوہ لائلپور وچ ریڈیو تے ڈرامے وی لکھدے رہندے نیں۔سکرپٹ لکھن وچ اوہناں دی اپنی ای پچھان اے جو پڑھن والیاں نوں بہت متاثر کردا اے۔آپ دے کہانی پراگیاں نے پنجابی کہانی دے پڑھیار نوں نویں کہانی دے رنگ دے نال نال وی جانکاری ملدی اے۔آپ دے ایس ناول وچ کرداراں دی بھرمار نہیں اے۔کہانی دے مُڈھ وچ جو کرادار نگاری کیتی گئی اے اوہ پڑھنہار نوں اپنے کلاوے وچ لے لیندی اے۔ایس ناول دا مرکزی کردار شکیلہ اے جس دا لاڈ نال تے پیار نال جو ناں رکھیا گیا اے اوہ ای ایس ناول دا سرناواں وی بن جاندا اے'' گھُنّوں ''۔'' گھُنّوں یاں شکیلہ اجہی کردار اے جو ناول دے مُڈھ توں ای اجہیا کردار بن جاندا اے جو عام کردار نہیں رہندا۔اوس دا ویہار عام نہیں اے اوہ اپنے گوانڈھ دے مُنڈے نوں جو اوس دا بالپن دا ساتھی اے اوہدے نال ایوں گلان کردی اے جویں کوئی مُنڈا گلاں کردا اے۔اوہ گلاں وچ بہت زیادا اجہے اکھر وی بولدی اے جو عام بالڑیاں نہیں بولدیاں نیں جس کر کے اوہدی ماں اوس نوں سمجھاون دا جتن کردی اے پر اوہدا پیو اوس دا بھر پور ساتھ دیندا اے۔ایس ناول وچ نفسیاتی تے ذہنی اُلجھناں دا جو ویروا ملدا اے اوہ اوہناں دے بہت قریبی مشاہدے پاروں ای ہو سکدا اے۔صفحا نمبر 91 توں 94 تک ہجر ووچھوڑے نوں نظم دی صورت وچ بیان کیتا اے ایہ نظم کہانی نوں کدھرے توڑدی نہیں اے تے نہ ای ایہ بھرتی دی نظم لگدی اے۔دوجیاں دی راء دا کویں انسانی جیون تے اثر پیندا اے ایس دی سمجھ ناول دے کرداراں دے جیوندے جاگدے بیاناں نال جانیا جا سکدا اے۔کرداراں دی جتھے ظاہری شکل و صورت وکھائی دیندی اے اوتھے احمد شہباز خاور ہوراں نے کرداراں دی ذہنی تصویر وی بہت انداز نال بیانیا اے۔ایہ ذہنی تصویراں اوہناں کرداراں دے اندر دی کیفیت نوں بیان کردیاں نیں تے ایہناں تصویراں نوں بیان کرن لئی احمد شہباز خاور نے بڑی محنت تے باریکی نال فن دا سہارا لے کے اپنے آپ نوں وڈا فنکار منوا لیا اے۔ ایس طرحاں دے حالات نوں بیان کردیاں ہویاں آل دوال دے حالات نوں وی دلچسپ بنا دِتا اے۔