چین دے وچ آیا اک نواں خوفناک وائرس،جنیاتی کوڈ مطابق ایہ وائرس سارس ورگا کیوں؟ ـــــــ رویل فیچر

چین دے صوبے وویان وچ اک خوفناک وائرس پھیل رہیا اے ایہ وائرس بزاراں وچ موجود جنوراں توں پھیل رہیا اے۔ایس وائرس نال مریض نوں ساہ دی بیماری لگ جاندی اے جس دا جے علاج خاص ویلے وچ نہ کیتا جاوے تاں مریض دی جان وی جا سکدی اے

۔پروفیسر فرگوسن نے ایس بارے کھوج پرکھ کیتی اے اوہناں دا کہنا اے کہ اجہیا وائرس انساناں تک گوشت خور جنوراں نال میل ملاپ دی وجھا توں ای آندا اے تے ایہ جنوراں چوں انساناں وچ منتقل ہو جاندا اے جد کہ اِک انسان توں دوجے انسان تک ایہ وائرس نہیں پھیل رہیا اے کیوں جے اجے کوئی اجہیا کیس ساہمنے نہیں آیا اے۔

دسمبر توں وائرس ودھ جاون دی وجھا توں ووہان ناں دے صوبے وچ دو کیس ساہمنے آئے جہناں بارے کھوج کیتی گئی تاں ایہ پتا چلیا کہ ایس وائرس دے کارن انسان نہیں سگوں جنور نیں تے اجہے جنور جہڑے گوشت خور نیں تے انساناں دے کول ای رہندے نیں تے ایہناں توں نکلن والا وائرس انساناں نوں نقصان اپڑاندا اے۔

عالمی ادارا صحت نے ایس وائرس نوں کورونا وائرس دا ناں دِتا اے کیوں جے اج توں اٹھارھاں ورھے پہلاں وی ایسے وائرس نال اٹھ سو دے قریب لوک مارے گئے سن۔ ایس وائرس نوں جنیاتی کوڈ دے انوسار "سارس " نال ملدا جُلدا منیا جا رہیا اے۔ یونیورسٹی آف ٹوٹنگھم دے اک گیانی پروفیسر جوناتھن دا کہنا اے کہ اجے تک ایہناں مریضاں دی تعداد 41 دے لگ بھگ رجسٹرڈ ہوئی جد کہ اصل وچ ایس دی تعداد ایہدے توں ودھ ہو سکدی اے کیوں جے لیبارٹریاں دی انہوند پاروں سارے مریضاں دا ٹیسٹ مکمل نہیں کیتا جا رہیا اے۔

چین دی سرکار ولوں ہوائی پروازاں توں باہروں آون والے مسافراں دی سکریننگ کیتی ج رہی اے اودھر یورپی ملکاں والیاں نے وی چینی مسافراں دی ٹیسٹنگ شروع کر دتی اے تاں جو کسے وی متاثرا مریض توں صحت مند لوکاں نوں بچایا جاوے۔