جٹکے وسیب دی پنجاب وچ پچھان دا مسئلا / عاقب ستیانوی
رویل فیچر سیوا
January 27, 2020
اسیں واسی گُنگے دیس دے ڈھیرنا سالاں دی گل اے ملکہ ترنم نور جہاں دا عروج ہا۔ چاہ آلے کھوکھے توں لے کے محلاں ماڑیاں تائیں ہکا آواز چار چفیر سُنی جاندی ہا۔
پنجاب وچ ماجھے لہجے دا راج ہا کیوں جوں میڈم ماجھے دے لکھاریاں دے گیت ڈھیر گاندی ہا۔
فنکار ہر رہتل دا ساجھا ہوندائے جتھوں تک اوہنوں سُنیایاں سمجھیا جاندا ہووے تے اوپری زبان اوہ ہوندی اے جہنوں سمجھن واسطے ترجمان دی لوڑ ہووے۔
ساڈی زبان دا ہر لہجہااپنی جاہ تے بہوں مِٹھا اے۔ میڈیم نور جہاں خواجہ غلام فرید ؒ اوراں دیاں کافیاں وی ڈاڈھیاں ٹھہا کے آکھیاں تے باراں دیاں شاعراں دے گیت وی گائے ایہوکھری گل اے جوں بار دیاں شاعراں اپنا نویکلا رنگ گھٹ تے چلدا رنگ ڈھیر لکھیا۔
فن اللّٰہ سوہنے دا د ین اے اُس دَور وچ جھنگ دے ہک ملنگ جہےفنکار دا گیت آیا۔ ہک پھُل موتیے دا مار کے جگا سوہنیے۔
ٹریکٹر توں لائے کے ٹرک تائیں تے ٹرک توں کار تائیں ہوٹل توں پلازے تائیں پکھی توں محل تائیں ہکو ناں چھا گیا حاجی منصور علی ملنگی جیا جی منصور ملنگی جھنگ دے علاقے گڑھ مہارجے دا واسی ہا۔
پنجاب دے جگ مشہور صوفی شاعر حضرت سلطان باہوؒ دی نگری دا واسی۔ پر افسوس مشہور ہوند یا ں لا اوس پھُل دی ذاتی سنجاپ کھس کے اوس دی خشبو نوں ہک وکھری سنجاپ دے دِتی گئی۔ جھنگ واسیاں نوں لاپرواہ آکھاں یا ں بے قدرے سمجھ نہیں امدی جھنگ واسیاں اپنی دھرتی دے ہک انمول ہیرے دی اصل سنجاپ بارے کوئی سچ نروچا نہ کیتا۔ فنکار دھرتی دا ورثہ ہوندائے اس دی قدر بہوں ضروری اے۔ گل ہوندی پئی ہاہ حاجی منصور ملنگی دی منصور ملنگی اپنی من بھاونیسر نال پورے پاکستان وچ راج کیتا تے اج تائیں کر رہیائے۔
فنکار نوں آدر دی لوڑ ہوندی اے حاجی ملنگ بندہ ہااُس نوں جہڑی پہچان نال پیار ملیا اوس گل لا لیا۔
اوس لاہندے پنجاب دے شاعراں نوں وی رج کے گایاپر جھنگ رنگ اس دی روح وچ رچیا ہویا ہامہر ریاض تے ملک یاسین دے دوہڑے تے شفقت دے گیت ملنگی دی گائیکی دا ہک انگ بن گئے ہائن۔
حاجی منصور ملنگی دی اپنی سنجاپ جٹکی رہتل تے جٹکی بولی اے ایہہک حقیقت اے جہنوں کوئی وی کوڑ ثابت نہیں کر سکدا۔
جٹکی رہتل تے بولی دی اصل سنجاپ کیہ اے ایہایتھوں دے واسیاں نوں آپ نوں وی نہیں پتاکسے تے کیہ ارمان اے؟
مُکدی کرئیے منصور ملنگی توں اوہدی اصل سنجاپ کھسن آلیاں دا انج جھاکا لتھا جٹکے وسیب دے ہر فنکارتے قلمکار دی سنجاب کھسیون لگ پئی پر جٹکے وسیب چوں کسے الفوں ب نہ آکھی۔
سائیں سُتے رہے تے لوٹی لُٹیندی رہی ہر کسے جٹکے وسیب دے سُہنپ نوں اپنا "مونو" لا کے جگ تے رجواں ناں وی کمایا تے دھن وی۔ ایتھوں تائیں جوں باہو سرکار (رح) دے ناں نال وی وکھری سنجاپ لکھ کے اصل سنجاپ کھس لئی گئی تے ایس دھروہ تے نہ صرف وسیب چپ رہیاسگوں باہو سرکار (رح) دے وارثاں وی اَکھ نوٹ لئی۔
اج دھمی نال فیس بک تے ظہور حسین لوہار دا ٹی وی چینل تے انٹرویو سُنیاجس وچ اوہدے ناں نال وی ہک وکھری سنجاپ جوڑ کے اصل سنجاپ لکا لئی گئی کیوں جو اوہدے گیت نوں 19 ملین ویورز ملے۔ وسیب اَج وی اگے وانگوں کناں سنھاں وچ مار گیائے۔
میں اپنے گُنگے وسیب توں ہک گل پُچھنا؟
کیہ ساڈی اپنی کوئی سنجاپ نہیں؟ جٹکی رہتل پنجاب دے سولاں ضلعیاں دی رہتل اے باقی گل رہی بولی دی سولاں ضلعیاں دی بولی اٹھ ضلعیاں دی بولی دا لہجاکدی وی نہیں ہوئی۔ ساڈی ہک اپنی وکھری سنجاپ اے جہنوں ستر سالاں توں قتل کیتا جاندا پیائے پر غرضاں دے زنجیراں نال جکڑی وسوں گُنگی بنیہوئی اے۔
اسیں پنجاں باراں دے واسی حال حاضر پنجاب دے وچکار ہائیں اساں اُتوں آون آلیاں بولیاں نوں پوری آدر دِتی اے۔ میں جٹکی وسوں دے واسیاں نوں ہتھ جوڑ کے منت کریناں دھرتی دے ورثے دے آپ سائیں بنوتے اپنی سنجاپ بناؤ۔ اواڈھیاں گواڈھیاں نوں منت کریناں ساتھوں ساڈی سنجاپ نہ کھسو۔
چڑھدے پنجاب آلے بھرا پنجاب دے ہر لہجے نوں برابر دی آدر دیونتے لاہندے پنجاب آلے بھرا صرف ماجھے نوں پنجابی سمجھ کے باقی لہجیاں نوں اپنی بولی دا لہجادس کے کسے دی سنجاپ نہ کھسن۔ سانوں خواجہ غلام فرید ؒ،باہو سرکارؒ تے شاہ حسینؒ ہکو جتنے پیارن تے جٹکی وسوں دی اصل سنجاپ پنجابی اے اسیں پنجاب دی رہتل تے زبان دے وارث ہائیں ساڈی بولی خالص پنجابی اے۔
