کُلُّ شَئیً یَرجِعُ عَلےٰ اَصلے/حکیم ناصر

اوڑک اپنے اصلے ول آئے گا پنجابی
غیرت کھائے گا پنجابی
ماں بولی نوں سینے نال لائے گا پنجابی
غیرت کھائے گا پنجابی
رب نے ہر اِک جی نوں بخشی اپنی بولی پُوری
دُنیا اُتے کسے دیس دی بولی نہیں ادھوری
رب دی دین تے رب دا شُکر بجائے گا پنجابی
غیرت کھائے گا پنجابی
ہر اک جی دُنیا اُتے آ کے جس ویلے منھ کھولے
اپنے اصلے اُتے ڈٹ کے اپنی بولی بولے
اِنجے اپنی بولی وی اپنائے گا پنجابی
غیرت کھائے گا پنجابی
اپنی بولی بولدا کدھرے،کدی کوئی نہیں جھکیا
اپنے اصلے نوں کوئی وی کدی لُکا نہیں سکیا
اپنے اصلے نوں مڑ کیویں لُکائے گا پنجابی
غیرت کھائے گا پنجابی
اپنی بولی نوں سبھ سمجھن اپنا مرنا جینا
پر پنجابی اپنے آپ نوں کیوں پیا سمجھے ہینا
اپنی بولی تے سر اپنا چائے گا پنجابی
غیرت کھائے گا پنجابی
کوئی دسے کھاں،پنجابی کہڑی گلوں گھٹ اے
جہڑے کمے لاؤ ایہنوں اوتھے ای جاندا ڈٹ اے
اپنا بول وی دُنیاتوں منوائے گا پنجابی
غیرت کھائے گا پنجابی
دُنیا دی ہر بولی نوں پنجابی نے اپنایا
جس بولی نوں ایس اپنایا اوہدا مان ودھایا
اپنی بولی دا وی مان ودھائے گا پنجابی
غیرت کھائے گا پنجابی
دُدھ چھڈ کے پھوکا پانی کوئی وی نہ رِڑکے
اپنی پِیڈھی بولی اُتوں کدی نہ کوئی تھِڑکے
اپنے دُدھ وچ کدی نہ پانی پائے گا پنجابی
غیرت کھائے گا پنجابی
اپنے پیو دے ہوندیاں،کوئی پیو نہیں ہور بناندا
اپنی ماں بولی نوں چھڈ کے،نہیں کوئی ہور اپناندا
اپنے پیو دا پُتر ہی اکھوائے گا پنجابی
غیرت کھائے گا پنجابی
فجر دا بھُلا شامیں،جہڑا اپنے گھر آ جاوے
نہ کوئی اوہنوں بھُلا آکھے،نہ بھُلا اکھوائے
اپنے دِل دا بوہا وی کھڑکائے گا پنجابی
غیرت کھائے گا پنجابی
٭ ٭ ٭ ٭ ٭ ٭٭