پنجاب یونیورسٹی اورینٹل کالج پنجابی شعبے دے اُستاداں دی گورنر پنجاب نال ملاقات ــــــ رویل نیوز

لاہور(نمائندا رویل)۔پنجاب یونیورسٹی اورینٹل کالج دے شعبا پنجابی دے اُستاداں دی گورنر پنجاب چودھری محمد سرور نال گورنر ہاؤس لاہور وچ ملاقات ہوئی ۔تفصیل دے مطابق منگل دے دیہاڑے پنجاب یونیورسٹی اورینٹل کالج دے شعبا پنجابی دیاں چیئرپرسن ڈاکٹر نبیلہ رحمان دی قیادت وچ شعبا پنجابی دے پروفیسر ڈاکٹر نوید شہزاد، ڈاکٹر ظہیر احمد شفیق، ڈاکٹر سعادت علی ثاقب تے ڈاکٹر عاصمہ قادری ہوراں نے گورنر پنجاب چودھری محمد سرور ہوراں نال گورنر ہاؤس لاہور وچ ملاقات کیتی۔ایس موقعے اُتے رکن پنجاب اسمبلی زینب احمد عمیر وی موجود سن۔ ملاقات دوران وفد ولوں منگ کیتی گئی کہ ہر میل تے فی میل کالج وچ پنجابی مضمون دیاں سیٹاں رکھیاں جان ۔وفد ولوں آکھیا گیا کہ جتھے جتھے پنجابی دیاں سیٹاں نیں اوتھے کسے ہور مضمون وچ اوہناں نوں کنورٹ نہ کیتا جائے۔ایس توں وکھ وفد ولوں منگ کیتی گئی کہ جس طرحاں دوجے صوبیاں وچ مادری زبان وچ تعلیم دِتی جا رہی اے اُنجے ای پنجاب دے بالاں نوں وی اوہناں دا حق دِتا جائے۔جہدے مگروں گورنر پنجاب نے وفد نوں یقین دہانی کروائی کہ چھیتی ای ایس بارے غور کیتا جائے گا۔