فلم " زندگی تماشا " حالے تیکر ریلیز کیوں نہ ہو سکی۔فلماں بارے رائے دینا ساڈا کم نہیں:اسلامی نظریاتی کونسل۔نمائش تے پابندی بارے درخاست واپس ـــــ رویل نیوز

لاہور (نمائندا رویل)پاکستانی فلم "زندگی تماشا " 24 جنوری نوں ملک بھر دے سینیمیاں وچ ریلیز ہونی سی۔ جس بارے ایہ پراپیگنڈا کیتا جا رہیا اے کہ ایہدا موضوع بہت نازک اے تے ایہدے وچ ملک واسیاں دے مذہبی خیالاں دا ٹھٹھا اُڑایا گیا اے ایس بارے سوشل میڈیا تے خاص پراپیگنڈا جاری ہون کر کے سنسر بورڈ نے ایس نوں ریلیز کرن توں ڈک دتا اے جد کہ دوجے پاسے جسٹس عامر فاروق دی عدالت وچ ایس اُتے پابندی لاون دی درخاست نوں خارج کر دتا گیا اے کیوں جے جدوں وکیل کولوں پُچھیا گیا کہ ایہ فلم کدوں تے کتھے ریلیز ہوئی تے اوہناں نے کتھے ویکھی تاں وکیل نے جواب دتا کہ ایس فلم نوں اوس نے نہیں ویکھیا اے بس سوشل میڈیا توں ای پتا چلیا کہ اوتھے اک پرومو چلایا گیا سی جس وچ مذہبی خیالاں نوں تنقید دا نشانا بنایا گیا ۔جسٹس عامر فاروق ہوراں نے کہیا جے اوہناں نے ایس فلم نوں نہیں ویکھیا اے تاں ایس دی تشہیر نہ کرن کیوں جے ایہ فلم اجے ریلیز نہیں ہوئی اے تے پنجاب حکومت نے تاں پہلاں ای ایس نوں چلاون توں ڈکیا ہویا اے۔جسٹس ہوراں نے ہور آکھیا کہ فلماں بارے رائے دینا ساڈا کم نہیں اے ایس اُپر وکیل نے درخاست واپس لین دی استدعا کیتی جس نوں منظور کر لیا گیا۔چیتے رہوے کہ اسلامی نظریاتی کونسل دے ڈاکٹر قبلہ ایاز دا وی ایہ کہنا اے کہ فلماں بارے رائے دینا کونسل دا کم نہیں اے۔