ڈاکٹر دلیپ کور ٹوانا نہیں رہے _____ رویل نیوز

امرتسر (اُچیچا نمایندا) نامی پنجابی ناول نگار‘ کہانیکار تے لکھاری‘ پروفیسر ڈاکٹر دلیپ کور ٹوانا اج جمعے والے دیہاڑ دُپہر ویلے پورے ہو گئے۔ اوہ کئی دِناں توں بیماری پاروں ہسپتال داخل سن۔ ڈاکٹر دلیپ کور ٹوانا پنجابی ناول وچ وکھرے انداز دے مالک سن تے اوہناں دے بہت سارے ناول مشہور ہوئے۔ اوہ لمے چر یونیورسٹی وچ پروفیسر تے صدر شعبا وجوں فرائض سرانجام دیندے رہے۔ اوہناں دی نکی بھین من جیت ٹوانا وی پنجابی دے نامی شاعر نیں۔ دلیپ کور ٹوانا دے ایس جہان توں جاون نال پنجابی ناول دا اِک دَور اپنے اَنت نوں پُجیا۔ اوہناں دے ناولاں وچ سورج تے سمندر‘ ایہ ہمارا جیونا‘ موہ مایا‘ پیڑ چال‘ اَیر وَیر ملدیاں‘ بھرے سرور‘ اوہ تاں پری سی‘ لنگھ گئے دریا‘اک چھوٹی جہی خبر‘ تخت ہزارا دُور کڑے‘ جے کدھرے رب ٹکر جَئے‘ موہ مایا‘ تردیاں ٹردیاں‘ واء ورولا‘ کلیڈیوسکوپ‘ آپنی چھاویں‘سمدرشی‘ کتھا کہو اروشی،ققنس تے ہور بہت سارے ناول شامل نیں۔ اوہناں دی ہڈورتی ”ننگے پیراں دا سفر“ وی چھپ چُکی اے۔ اوہناں دے ناولاں دے انگریزی‘ ہندی‘ اردو تے ہور بھارتی زباناں وچ ترجمے وی ہوئے۔ ناولاں وچوں ”ایر ویر ملدیاں“ لہندے پنجاب وچ پنجابی مرکز نے چھاپیا سی۔