kraamaat@gmail.com
+ +92 333-430-6384


اک نظم


احمد نعیم ارشد February 01, 2020


اوہکہندا اے
ایویں ای بُھکھ بُھکھ کر دے پئے او
دسو مینوں
کہڑا بندا اے
جہڑا بُھکھا سوندا اے
کہڑا بال اے جہڑا بُھکھا روندا اے
ایویں بُھکھ بُھکھ کردے پئےاو
شکر کرو کہ لبھدی پئی اے
صبر کرو تے لبھ جاوے گی
اوہ کیہ جانے
رُکھی سُکھی سنگیوں تھلے کِنج لَنگھدی اے
کیویں پِیتا جا سکدا اے کھارا پانی
کیویں کَچی چَھت دے تَھلے
تُپ تُپ کردے مینہ دی رُتے
ٹَھر ٹَھر کنبدے سوندے لوکی
اوہ کیہ جانے
نِکے نِکے بال وچارے
نِکیاں نِکیاں سَدھراں لے کے
نِکے نِکے دِلاں دے اندر
اُچی اُچی کِنج روندے نیں
اوہ کیہ جانے
بِنا دوائیوں تندرستی دی ایکٹنگ کیویں ہو جاندی اے
اوہ کیہ جانے عیداں تے شبراتاں اُتے
لوکاں اگے تَلیاں ڈھا کے کپڑا لَتھا کِنج بَن دا اے
او کیہ جانے راشن دھارا لین دی خاطر
بے شکلے دے کوہجھے ہَتھ نُوں جِسم گوارا کِنج کردے نیں
اوہنوں آکھو!
ساڈیاِک دو روٹی وی نہیں پَچدی تینوں
ساہنوں صابر شاکر رہن دا آکھ رہیا ایں
آپ توکل کیوں نہیں کردا سچے رب تے
کنکاں دے نال بھرے بھڑولے کاہدے لئی نیں
مہنگیاں گڈیاں دے ایہ رولے کاہدے لئی نیں
سِر توں لے کے پیراں تیک برانڈڈ شیواں
ملٹی نیشنل کمپنیاں دے منرل واٹر
چھڈ کے سب کُجھ کچی بستی دے وچ کچا کوٹھا پا
کھارا پانی پی تے رُکھی سُکھی کھا
آ جا توں وی سچے رب دا شکر منا۔۔۔۔۔۔۔۔۔!