سُورمے جمدی وادی

سورمے جمدی وادی

کرفیو لگے نوں چھے مہینے ہو گئے سن ۔ شہر دیاں گلیاں تے بزاراں وچ قبرستاناں ورگی چپ سی ہر پاسے خوف تے دہشت دا پہرا سی ۔ خاردار تاراں دے جال وچھے ہوئے سن تے فوجی بندوقاں تے سنگیناں سنبھال کے ہر چوک تے موڑ اتے کھلوتے پہرا دے رہے سن ۔ انسان تے انسان جنور وی نظریں نہيں آ رہے سن ۔ پرندے اوس وستی چوں ہجرت کر گئے سن۔ ہر پاسے موت دا پرچھاواں سی ۔ بیمار دوائی نوں ترس رہے سن تے بچے دُدھ دی قلت پاروں رو رہے سی ۔ راشن مک گئے سن تے لوکی رُکھی سکی توں وی محروم سن ۔ ستر لکھ انساناں دی اَبادی نوں اک جیل وچ بدل دتا گیا سی ۔ لوک گھراں وچ بند سن تے اوہناں اتے حیاتی تنگ کر دتی گئی سی ۔

ہانیہ اک نکے جہے گھر وچ رہندی سی ۔ اوہ دو بھراواں دی کلی بھین سی ۔ اوہدی ماں تے بڈھا پیو اک احتجاجی جلسے وچ فوج ولوں گولی لگن نال شہید ہو گئے سن ۔ اوہ ہر ویلے اپنے بھراواں دی خیر منگدی رہندی تے اوہناں نوں کسے صورت وی گھروں باہر نہ نکلن دیندی پر وادی وچ کرفیو تے پکڑ دھکڑ تے روز دی گل سی اوہ کدوں تیک بھراواں نوں ڈک سکدی سی ۔ اوہدا وڈا بھرا فاروق یونیورسٹی وچ پڑھدا سی تے نکا حالے کالج دا پڑھیار سی ۔ اک دن کرفیو دی ذرا نرمی وچ لک چھپ کے یونیورسٹی دے پڑھیاراں فوجی جارجیت تے ریاستی دہشت گردی دے خلاف احتجاجی واک کیتی تے یونیورسٹی کیمپس وچ ای دھرنا دے دتا ۔ ہانیہ دا بھرا وی اپنے دوستاں نال ایس وچ رَلیا اتے فوج تے ریاستی ایجنسیاں خلاف بینر چک کے نعرے بازی کیتی ۔ دھرنے دے رَلتیاں نوں چار چفیرے توں فوجیاں نے گھیر وچ لے لیا تے اچانچک گولی چلا دتی ۔ کئی پڑھیار زخمی ہوئے تے کئیاں نوں گرفتار کر لیا گیا ۔ ہر پاسے بھاجڑ پئی ہوئی سی فاروق نس کے یونیورسٹی ہاسٹل جاون لگیا تے اک فوجی اوہنوں پکڑ لیا ۔ اوہدے ہتھاں وچ احتجاجی بینر موجود سی تے اوہ گرفتار ہو کے وی جبر مخالف نعرے لاون توں نہ رُکیا ۔ اوہ رات اوہنے اپنے کجھ ساتھیاں نال اک ٹارچر سیل وچ گزاری ۔ اوہنوں اک ھنیر کوٹھڑی وچ بند کر دتا گیا تے اوہدے سر اتے ہزار واٹ دا بلب بال کے تے سخت سردی وچ برف ورگے ٹھنڈے پانی وچ کپڑے اتار کے رہن تے مجبور کر دتا گیا ۔ اوہ تھوڑی دیر وچ ای سردی نال آکڑ گیا تے اوہنے پہرے دار نوں کرلاندیاں ہوئیاں نیڑے بلایا تے اپنے کوٹ دی جیب ول اشارا کر کے اوہنوں پیسیاں دا لالچ دتا تاں جے اوہنوں ٹھنڈے ٹھار پانی چوں کڈھیا جاوے تے اوہ اپنے کپڑے پا لوے ۔ پہرے دار فوجی تن مہینے توں اپنے گھر بار توں دور سی تے پچھلے مہینے توں تنخاہ نہ ملن پاروں سگرٹ پانی توں وی ڈاہڈا اوکھا سی ۔ اوہنے ادھی رات پچھوں اوہدے سیل دا بوہا کھولیا ۔ اوہنوں کپڑے پوا دتے تے اوہدے توں ٹھنڈے پانی دا ٹب وی دور کر دتا ۔ بدلے وچ اوہدے کوٹ وچوں نکلے پیسے خش خش گنن لگ پیا ۔ فاروق ایسے پل دی اُڈیک وچ سی اوہ چھیتی نال سیل چوں نکلیا تے باہروں جندرا لا کے بوہا بند کر دتا ۔ ہن اس ہولی جہی فوجی بیرک دا پچھلا چور دروازا کھولیا تے پچھواڑیوں نکل کے نس گیا ۔ اینے وچ ٹارچر سیل وچ پھسے فوجی دی چیک چکاڑ سن کے ہر پاسے ایمر جنسی سائرن وج گئے تے فوجی اوہدی کھوج وچ لگ پئے ۔ اوہنوں پتہ سی پئی اوہ لبھدے لبھاندے اوہدے گھر تیک ضرور اپڑن گئے اس لئی اوہ بچدا بچاندا حضرت پیر دے درباراپڑ گیا تے اک حجرے دا بوہا کھلا ویکھ کے اندر وڑ گیا ۔ اندر اک مجاور تہجد پڑھ رہیا سی' اوہنے اک نکرے وِچھی دری تے پیا کنبل لپیٹیا تے سوں گیا ۔

اودر ساری رات ہانیہ تے اوہدا نکا بھرا اوہنوں اُڈیکدے رہے تے جاگدے رہے ۔ اذان ویلے کجھ فوجیاں لبھدے لبھاندیاں اوہناں دے گھر دا کنڈا کھڑکایا ۔

ہانیہ بوہا کھڑن دے نال ای اپنے بھرا دی بھل تے اُٹھ کھلوتی تے بوہا کھول دتا ۔ فوجیاں اوہنوں گتوں پکڑ کے اگے لا لیا تے گھر دی تلاشی دین دا حکم دتا ۔ اوہ تھر تھر کنبدی اوہناں نوں ہتھ جوڑدی رہی تے اپنی بے گناہی دا یقین دلاندی رہی پر فوجیاں اوہدی اک نہ سنی تے گھر دی تلاشی دوران اوہدے نکے بھرا نوں گرفتار کر لیا تے نال ای دھمکی دتی جے فاروق کل تیک پیش نہ ہویا تے اوہ ہانیہ نوں وی پکڑ لین گے ۔

فاروق درگاہ دے حجرے چوں نکل کے چوری چھپے اپنے گھر ول پھیرا ماریا ۔ ہانیہ اوہنوں رو رو کے اپنے تے ہوئے ظلم بارے دسیا تے نال ای اوہنوں نکے بھرا دے پھڑے جاون دی وی اطلاع دتی ۔ ہن فاروق دے ساہمنے دو ای رستے سن یا تے اپنی گرفتاری دے دیندا یا آزادی دی تحریک دا حصہ بن جاندا پر دوناں صورتاں وچ اوہنوں ہانیہ دی ڈاہڈی پریشانی سی اوہ اپنی جوان جہان بھین نوں کس دے سہارے چھڈدا ۔ اخیر اوہنے ہانیہ توں ای پچھ لیا پئی اوہ ہن کیہ کرے ؟

ہانیہ اوہنوں گرفتاری دے کے اذیت تے ذلت دی موت مرن نالوں آزادی دی شہادت نوں قبول کرن دا مشورا دتا تے آکھیا !

" توں میری پرواہ نہ کر بس کسے طریقے اپنے نکے بھرا نوں چھڈاون دا فکر کر تے اپنے وطن دی آزادی لئی جان قربان کر دے ۔ میرے ورگیاں کئی بھیناں اس وطن توں واریاں ۔ اپنے ماں پئیو دی قربانی دا حساب وی لینا اے اجیں ۔ جا رب دے حوالے کیتا تینوں ۔ "

فاروق اوہنوں کلے گھر وچ رہن دی بجائے اپنی ماسی دے گھر ٹر جاون دی تاکید کیتی تے آپ لہندے ول دے پہاڑ تے اپڑ گیا ۔ آزادی پسند نکیاں نکیاں ٹولیاں وچ ونڈے اپنی اپنی تھاں تے وطن دی آزادی تے محبت دے دیوے بال کے پہرا دے رہے سن ۔ اوہنوں اک پہاڑی غار وچ امیر ساہمنے پیش کیتا گیا تے اپنے نال ہوئی واپری سنان دا آکھیا گیا ۔ فاروق اوہناں نوں اپنے ماں پیو دی شہادت توں لے کے ہن تیک دی ساری کہانی سنائی تے عرضوئی کیتی پئی پہلے اوہدے بھرا نوں فوجیاں دی قید وچوں کڈھن دا چارا کیتا جاوے تے مڑ اوہنوں جتھے تے جیہڑے محاذ تے لڑن لئی گھلیا جائے اوہ تیار اے ۔

اِک دو دناں وچ آزادی پسنداں وچ رہ کے اوہنوں اندازا ہو گیا پئی ایتھے سارے ای اپنے خاندان دی قربانی دے کے آئے نیں ۔ ہولی ہولی اوہنوں اپنا دُکھ دوجیاں دے دُکھ نالوں ہولا جاپن لگ پیا ۔ اِک شام اوہنوں کمانڈر ولوں سنیہیاملیا پئی اج رات اوہدے بھرا نوں کسے ہور جیل وچ گھلیا جا رہیا اے ۔ اس لئی اوہ گوریلا کارروائی لئی تیار رہوے ۔ فاروق تے اگے ای اس ویلے نوں اُڈیک رہیا سی اوہنے اپنے ہتھیاراں نوں ویلے سر ای صاف کر لیا لک دوالے گولیاں دی پیٹی بنھ لئی تے بے قراری نال رات ڈھلن دی دعا کرن لگ پیا ۔ حالے سرگی دا تارا نہیں چڑھیا سی جدوں اوہنوں اپنے ساتھیاں نال اپنے پہلے محاذ تے گھلیا گیا ۔ اوہ پتھریلے پہاڑی راہواں تے بڑی اوکھ نال چل رہیا سی ۔ اک پہاڑ دی اوٹ وچ اوہنوں نشانہ بنھ کے کھلون دا اشارا دتا گیا تے اوہدے دوجے ساتھی وی وکھو وکھو ہو کے اپنے اپنے نشانے تے اپڑ گئے ۔ سویر دا چانن کھلرن توں ذرا پہلاں ای اِک فوجی ٹرک قیدیاں نوں لے کے پہاڑاں وچکار اک نکی جیہی سڑک توں گزرن لگ پیا ۔ فاروق حملے لئی پوری طرحاں تیار سی ۔ اوہنے نشانا بنھیا تے ٹرک دے پچھلے پاسے کیبن وچ بیٹھے فوجیاں تے گولی چلا دتی ۔ فائر دا ہونا سی تے ہر پاسے گولیاں نکلن دی تڑ تڑ دی واج آؤن لگ پئی ۔ ٹرک ڈرائیور ٹرک نسان دی کوشش وچ سی جدوں فاروق دی گولی سدھی اگلیاں ٹائراں وچ لگی تے ٹرک ڈکو ڈولے کھاندا پہاڑ دی وکھی نال جا لگا ۔ ٹرک وچ موجود فوجیاں ولوں انھے وا گولا بارود چلن لگ پیا تے آزادی پسنداں ولوں وی جوابی حملے تیز ہو گئے ۔

تھوڑی دیر بعد گولاباری بند ہوئی تے اوہناں اگے ودھ کے ویکھن دی کوشش کیتی ۔ فر اچانچک پہاڑ دی چوٹی ولوں اِک میزائل فائر ہویا جہڑا سدھا ٹرک وچ آ لگا تے ٹرک نوں اگ لگ گئی ۔ اگ دی لاٹ وچ پہاڑ تے فوجیاں نوں نسدیاں ویکھیا جا سکدا سی ۔ فاروق نے سڑدے ٹرک وچ اپنے بھرا دا چہرا پچھان لیا تے پاگلاں وانگ ٹرک نال سر ٹکراون لگ پیا ۔اگ اینی تیز سی پئی کوئی وی قیدی جیوندا نہ بچیا ۔ فاروق نوں ڈاڈھی اوکھ نال اوہدے ساتھی اس تھاں توں ہٹا کے پچھانہلے گئے ۔ تھوڑی دیر بعد دُنیا دے ہر میڈیا چینل تے کھپ پئی ہوئی س پئی فوجی ٹرک تے گوانڈھی ملک دے تربیت یافتا آتنک وادیاں خد کش حملا کر دتا ہے جس وچ کئی فوجی مارے گئے نیں ۔

چڑھدے ول دا میڈیا چیک چیک کے دنیا نوں آزادی پسنداں تے گوانڈھی ملک دے خلاف اکسا رہیا سی ۔ ایدھر وادی وچ صورتحال ہور وی بھیڑی ہو گئی سی ۔ فوجی خونخوار درندیاں وانگ زنانیاں نوں اپنی ہوس دا نشانا بنا رہے سی تے نوجواناں نوں پھڑ پھڑ کے جیلاں بھر رہے سی ۔ اِک رات فاروق اپنی بھین نوں ملن آیا تے کسے مخبری کر دتی ۔ اوہ حالے بوہے وڑیا ای سی کہ فوجی دستااوہدی جاسوسی کردا کردا اپڑ گیا ۔ اوہنے کھڑکا سندا نال ای ہانیہ نوں گھر دے پچھاوڑے ولوں باہر کڈھ دتا تے جاندی وار اک چٹ اوہدے ہتھ پھڑا دتی ۔ فاروق پھڑیا گیا تے اوہنوں راتوں رات ٹارچر سیل وچ اذیت دے دے کے شہید کر دتا گیا ۔ ہانیہ اپنے بھرا ولوں دتی ہوئی چٹ پڑھی جس اپر لکھیا سی :

" بھینے جنگ حالے ہُن شروع ہوئی اے کیہ ہویا جے وادی دے گھراں دے مرد شہید ہو گئے نیں ۔ ہن آزادی دی ایہ جنگ وادی دیاں عورتاں لڑن گئیاں ۔ "

چِٹ دے دوجے بنے لکھے پتے تے اوسے شام فاروق دی شکل دا اک گھبرو جوان اپڑ کے کمانڈر ساہمنے اپنے نال واپری کہانی سنارہیا سی ۔ ہانیہ دی شکل وچ فاروق دا دوجا جنم ویکھ کے سارے آزادی پسند حیران سن ۔