محافظ ای لُٹیرے نکلے

اِک اندازے موجب ایشیا وچ ہر سال 10لکھ توں ودھ بچیاں نوں جنسی تشدد تے قتل دا نشانا بنایا جاندا اے ساڈے ملک وچ ہر روز 11بچے جنسی تشدد دا نشانا بندے نیں۔ ظالم درندے ساڈے آل دوال دندناندے پھِر رہے نیں پر اسیں بے خبرے ہوکے اکھیاں اُتے پردے پا کے اوہناں نوں جیون دے رہے آں سگوں اوہناں ظالماں نوں جیون دے پورے پورے مواقعے فراہم کررہے آں۔ ساڈیاں اکھیاں اُتوں پردا اودوں ہٹدا اے جدوں ساڈے اپنے کسے بال بچے نال ایہ دکھانت پیش آوندا اے۔ پچھلے دِنیں کامونکی تتلے عالی دے نیڑلے پنڈ چاچوکی وچ نرسری جماعت دی چھے ورھیاں دی پڑھیارن نال گلزار نامی رکشا ڈرائیور نے جنسی زیادتی کیتی تے اوہنوں بے ہوشی دی حالت وچ اوہدے گھر وچ سُٹ کے فرار ہوگیا۔ اِنج دے بہت سارے سکینڈل روز دیہاڑے ساہمنے آوندے نیں جہناں دی گنتی اُتے بیان کر چکا آں۔ ایہدے خلاف جہڑا کوئی کلا فرد اواز چُکدا اے اوہدی اواز ہمیشا ہمیشا لئی بند کردِتی جاندی اے جہدی مثال حال ای وچ اقراء کائنات نامی سوانی دا قتل اے جہنے یتیم خانے دِیاں بچیاں نال ہون والیاں زیادتیاں خلاف اواز چُکی سی۔

پاکستان وچ ودھدے ہوئے ریپ کیسز تے قتل دے ان گنت واقعات پاروں حال ای وچ پاکستان دی قومی اسمبلی وچ اِک قرارداد پیش کیتی گئی اے جہدے مطابق بچیاں نال جنسی زیادتی تے اوہناں نوں قتل کرن والے مجرماں نوں سرِ عام پھانسی دین دا حکم دِتا گیا اے۔ پر موجودا حکومت پاکستان تحریک انصاف نے کجھ پارٹی ارکاناں دی ذاتی کوشش قرار دے کے اپنے آپ نوں برائے راست ایس معاملے توں پاسے رکھیا اے۔جمعے دے دن ڈپٹی سپیکر قاسم سوری دی صدارت ہیٹھ ہون والے قومی اسمبلی دے اجلاس وچ وزیر مملکت برائے پارلیمانی امور علی محمد خان نے ایس قرار داد نوں اعوان دے ساہمنے پڑھ کے سنایا تے ایہنوں منظوری لئی پیش کیتا گیا۔

ہتھ نال لکھی گئی ایس قرار داد وچ مطالبا کیتا گیا کہ جنسی زیادتی تے قتل کرن والے درندیاں نوں پھانسی تے دِتی جاوے سگوں سرِ عام پھانسی دِتی جاوے۔ ڈپٹی سپیکر نے کثرتِ رائے شماری کارن ایس قرار داد نوں منظور کرلیا نال ای ایس قرار داد دی مخالفت کرن والیاں سیاسی پارٹیاں دے کجھ ممبراں وی بانگاں دینیاں شروع کردِتیاں تے بغیر کسے ٹھوس دلایل دے ایہدے خلاف بیان دینے شروع کردِتے۔ ایہدے وچ پیپلز پارٹی دے سابق وزیراعظم راجا پرویز اشرف نے ایس قرار داد دی مخالفت کردے ہوئے آکھیا کہ اقوام متحدا دے قوانین تحت کسے نوں سرِ عام پھانسی نہیں دِتی جاسکدی‘ سزاواں یاں اوہناں دی شدت نوں ودھان نال جرایم گَھٹ نہیں ہوئے۔

سابق وزیراعظم راجا پرویز اشرف ہوراں دی گل توں اندازا ہوندا اے کہ اوہناں نوں معاشرے تے ایہدے وچ وقوع پذیر ہون والے معاملات متعلق کوئی جانکاری نہیں۔ کِویں اوہناں وزیراعظم دے عہدے نوں انجام دِتا ہووے گا۔ جے میرا اندازا غلط اے تے اوہناں توں درخاست اے کہ سانوں وی دسن کہ پاکستان اندر سزاواں تے اوہناں دی شدت کدوں تے کِس کِس موقع اُتے ودھائی گئی۔

وفاقی انسانی حقوق دی آگو شریں مزاری نے آکھیا کہ ذکر کیتی گئی قرارداد تحریک انصاف ولوں پیش نہیں کیتی گئی تے ایہ پی ٹی آئی پارٹی دی پالیسی دے خلاف اے تے ایہ قرارداد پیش کرن والے دا اِک ذاتی عمل اے۔ پی ٹی آئی دے بہت سارے ارکان ایس قرار داد دی مخالفت کردے نیں۔

وزیر برائے انسانی حقوق دی آگو شیریں مزاری صاحبا توں وی درخاست اے کہ سانوں دسن کہ ایسا کہڑا اجلاس سی جہڑا اسمبلی اجلاس توں وی زیادا اہم اجلاس سی جہدے وچ اوہ مصروف سن تے قرار داد ویلے اسمبلی اجلاس وچ رلت نہ کرسکے۔

وفاقی وزیر ساینس تے ٹیکنالوجی فواد چودھری ہوراں وی ایہدی مخالفت کردے ہوئے آکھیا کہ بربریت جرایم دا جواب نہیں‘ ایہ انتہا پسندی دا اِک ہور اظہار اے‘ دنیا دی تواریخ وچ ایہ سبھ ہوچکا اے انج دیاں سزاواں قبائلی معاشریاں وچ ہوندیاں نیں جتھے انسان تے جنور اِک برابر ہوندے نیں۔ ایہدا جواب اوہناں دی ای پارٹی آگو علی محمد خان نے دتا تے آکھیا کہ اسلامی سزاواں نوں ظلم تے بربریت آکھن والے آپ ظالم نیں تے قبائلی معاشرا اوہ معاشرا اے جتھے سِر قربان کیتا جاندا اے پر عزت نہیں‘ مینوں اپنے قبائلی ہون اُتے فخر اے۔

وزارتِ قانون دے آگو فروغ نسیم نے وی سرِعام پھانسی نوں غیر آئینی قرار دے دِتا تے آکھیا کہ سرِ عام پھانسی اسلامی تعلیمات تے آئین دے منافی اے‘ وزارتِ قانون آئین تے شریعت خلاف کوئی قانون نہیں بنائے گی۔

فروغ نسیم ہوراں نوں خورے علم نہیں کہ سعودی عرب وچ چور دے چوری کرن اُتے سرِ عام ہتھ وڈھ دِتے جاندے نیں جہدے پاروں عبرت دا نشان بنن والیاں توں سبق لے کے ہُن چوری دی شرح نہ ہون دے برابر اے۔ تے جے ایتھے انسانیت تے انسانیت دی عزت نوں شریعت تے آئین دے خلاف جا کے محفوظ کیتا جاسکدا اے تے فروغ نسیم صاحب شریعت مخالف ایس قرار داد نوں قانون بن جاون دیو۔ خورے اِنج شریعت دی خلاف ورزی رب سوہنے نوں چنگی لگ جاوے تے اگلے جہان ساڈی نجات تے معافی ہوجاوے۔

انسانی حقوق دی بین الاقوامی تنظیم دی ویب سایٹ اُتے جاری بیان وچ جنوبی ایشیا لئی ایمنسٹی انٹرنیشنل دے ڈپٹی ڈائریکٹر عمر چیما نے آکھیا کہ کندھاں پچھے یاں سرِ عام سزاواں دین نال انصاف نہیں مِلدا ایہ انتقام دیاں کارروائیاں نیں‘ ایس گل دا کوئی ثبوت نہیں کہ انج دیاں سزاواں جرم دی روک لئی موثر ثابت ہوئیاں ہون۔ عمر چیمانے آکھیا کہ جے انسانی زندگی سبھ توں ودھ اہمیت رکھدی اے تے فیر ایہنوں کھوہ لینا سبھ توں گھٹیا عمل اے۔

جہڑے لوک وی جنسی زیادتی تے ہوس پرستی کردے نیں اوہ تے انسان ہوندے ای نہیں ایس لئی اوہناں نوں انسان سمجھ کے اوہناں دی زندگی نوں اہمیت دینا ای سبھ توں گھٹیا عمل اے۔ انسان دے روپ وچ ایہناں بھیڑیاں واسطے معاشرے وچ کوئی تھاں نہیں ہونی چاہیدی تے ایہناں نوں پھانسی سگوں سرِ عام پھانسی ضروری دینی چاہیدی اے تاں جے اوہ نشانِ عبرت بنن تے کوئی دوجا ایہدے انجام نوں سوچ کے انج دی گھناونی حرکت نہ کرے۔

ایس توں وکھ چائلڈ پروٹیکشن اینڈ ویلفیئر ایکٹ 2010ء وچ ترمیماں دے حوالے نال تجویزاں نوں حتمی شکل دے دِتی گئی اے تے قوانین دا مسودا تیار کرلیا گیا اے جہدے تحت جنسی زیادتی یاں قتل دے مجرم لوکائی نوں 14سال قید تے 50 لکھ رُپئے جرمانے دی تجویز دِتی گئی اے۔

سیاسی آگواں تے حکومتی عہدیداراں دے خیالات تبصرے تے بیانات سُنے پتا لگا پئی”محافظ ای لُٹیرے نِکلے“۔ سرِ عام پھانسی دی ایہ سزا اوس ویلے وحشیانا لگدی اے جدوں ایہنوں مجرم دی نفسیات نال ویکھیا جاوے معاشرے دے حوالے توں نہیں۔ نال جدوں اپنے مفاد دے قانون بن سکدے نیں تے لوکائی دے مفاد بچیاں دی حفاظت دے اقدامات مجرم لئی سخت سزا دا قانون کیوں نہیں بن سکدا؟

ہن ویلا آگیا اے کہ ماں پیو اپنے بچیاں نوں زیادا ویلا دین اوہناں نال دُوریاں مُکا کے دوستی نوں پروان چڑھان تاں جے تیجا کوئی ایس تعلق وچ دخل نہ دے سکے۔ بچیاں دے ہر عمل اُتے ماں پیو دی نظر ہووے اوہناں نال ملن جُلن والیاں اُتے نظر رکھی جاوے کسے اُتے انھے واہ اعتبار نہ کیتا جاوے کیوں جے اکثر کیسز وچ محلے دار‘ رشتے دار تے جانن والے ای ملوث پائے جاندے نیں۔ ایہ تہاڈا حق تے تہاڈی ذمے داری اے تے کے تُسیں اِنج نہیں کرو گے تے تُسیں وی مجرم ہووو گے۔

حالے صرف قومی اسمبلی وچ جنسی زیادتی خلاف سرِ عام پھانسی دی قرار داد منظور ہوئی اے جد کہ ایہنوں قانون بنان لئی ایہدے مسودے نوں قومی اسمبلی تے سینیٹ توں منظور ہونا ضروری اے فیر ای ایہ قانون بنے گا۔ حکام نوں چاہیدا اے کہ ایس قرارداد نوں قانون دی شکل دین تے ایہنوں نافذ کرن والے اداریاں نال بھرپور تعاون کرن تاں جے معاشرے وچ اندرونی تے بیرونی امن دی فضا قایم ہوسکے۔