پہلی کتاب:کہانی پکھ (چونویں کہانی پراگیاں دی تحقیق تے تنقید)
اَدبی تواریخ گواہ اے کہ جہڑے لکھاریاں نوں وڈے نقاد ملے نیں اوہناں دا اَدبی رُتبہ تے مقام اُچ پدھر دا ہو گیا اے تے جہڑیا ں لکھاریاں نوں ودھیا نقاد نہیں مِلے نیں، اوہناں نوں اُنج گولیا نہیں گیا جویں اوہناں داحق بن دا سی۔ایہ نقاد کسے وی زبان دے اَدب واسطے بہت ضروری ہوندے نیں ایہناں توں بِنا اَدب دا اگانہ نوں سفر نہیں ہو سکدا اے،ایس اَدبی تے علمی لوڑ نوں گھٹ ای محسوس کیتا جاندا رہیا اے۔پنجابی کہانی دے کھیتر وچ ایہ ای المیا ای رہیا اے کہ ایس نوں باقاعدہ نقاد نہیں ملے نیں جس کر کے ایس کھیتر وچ جہڑا سلاہن جوگ کم ہونا چاہیدا سی اوہ نہیں ہویا اے۔اِکا دُکا نقاداں نے پورا جتن تاں کیتا پر اوہ ہلا شیری نہیں مل سکی جس دی لوڑ سی۔ آپ کہانی نال جذباتی سنبندھ رکھدے نیں تے ایہ اوہناں دی لکھت وچوں وی جھلکدا اے۔ ہتھلی کتاب وچ اوہناں نے2008ء دے ورھے وچ چھپن والے کہانی پراگیاں وچلیاں کہانیاں دے تَت نوں بیان کیتا اے تے نال نال اپنے وچار وی سانجھے کیتے نیں۔بطور نقاد تے محقق ایہ اوہناں دا پہلا کم اے کیوں جے ایہ اوہناں دا ایم۔اے دا مقالا اے جس نوں کتابی صورت وچ چھاپے چاڑھیا گیا اے، تھوڑاں بارے گل کرن دی بجائے اسیں اوہناں نوں ایس پِڑ وچ جی آیاں نوں کہنے آں تے آس وند آں کہ اوہ اپنے ایس تنقیدی کم نوں جاری رکھدیاں ہوئیاں، ماں بولی دی سیوا وچ جُٹے رہن گے۔ایس کتاب دے کُل صفحے 224تے مُل 500 روپے اے۔
دوجی کتاب: ”بابو جاوید گرجاکھی دا کہانی کھیتر“
اوہناں دی دوجی کتاب ”بابو جاوید گرجاکھی دا کہانی کھیتر“ چھاپے چڑھی اے ایہ وی تحقیق تے تنقید دی کتاب اے۔کتاب دے دیباچے وچ گل کردیاں ڈاکٹر ارشد اقبال ارشد نے آپ نوں غیر جانبدار نقاد تے محقق مِتھیا اے۔جد کہ پروفیسر ڈاکٹر نبیلہ انج وچار سانجھے کردیاں نیں ”تخلیقی نثر نوں پرکھن تے جاچن وجوں انعام الرحمن نے اپنی اک سیہان بنان دا چارا کیتا اے۔آس اے کہ آؤ ندے سمیاں وچ اوہ اپنی اُگھڑویں رائے بناون وچ کامیاب ہوسی“اسیں وی ایہ ای آس کرنے آں کہ اوہ اپنی رائے بناون وچ کامیاب ہوجاون گے۔کتاب دے کُل صفحے 368تے مُل500روپے اے۔ایس کتاب نوں ادارا لکھاریاں جیا موسیٰ شاہدرہ لاہور ولوں چھاپیا گیا اے۔