امن دی تلوار

امن دے حوالے نال اک کہانی بڑی مشہور اے کہ امن دی اک تلوار سی جو کدی وی کسے نہیں ورتی سی۔ایس دا مالک اک بادشاہ اپنے دیس دی حالت توں ہمیش واقف رہندا تے اوہنوں کدے باہر جاون دی لوڑ ای نہ پیندی۔تلوار نوں سبھ بہت قیمتی سمجھدے سن ایس تیکر پہنچ کسے دی وی نہیں سی اوس نوں اک کمرے وچ رکھیا ہویا سی جس تیکرہر کوئی وی نہیں سی اپڑ سکدا بادشاہ نوں کدے ایس دی لوڑ نہیں سی پئی۔بادشاہ ہر ویلے اپنے کماں وچ مصروف رہندا اینا مصروف کہ اوس نوں لڑن دا کجھ یاد وی نہیں رہندا۔اوہ ہر ویلے محل اندر دیاں پارٹیاں وچ ہوندا ڈھیروں ڈھیر پارٹیاں توں وکھ دعوتاں ہوندیاں رہندیاں۔بادشاہ ایہناں پارٹیاں تے دعوتاں وچ ودھ چڑھ کے حصا لیندا تے بھرپور خشی محسوس کردا رہندا۔حیاتی ایوں ای ٹُری جا رہی سی۔امن دی تلوار نوں کدے کسے نے باہر نہیں کڈھیا۔انج ای محل اندروں بادشاہ وی کدے باہر نہ نکلیا۔
اک دیہاڑے کیہ ہویا بادشاہ نوں اطلاع ملی کہ گوانڈھی دیس دے بادشاہ نے حملا کر دِتا اے۔بادشاہ نے تُرت فیصلا کیتا کہ ایس نے امن نوں مُکانا چاہیا آؤ ایس نال لڑئیے۔بادشاہ لڑائی واسطے جاون لگا تاں اوس نوں یاد آیا کہ اوہدے کول اجہی تلوار اے جہڑی صدیاں توں بیکار پئی اے تے ساڈے وڈکیاں ولوں آرہی اے تے اجے تیکر کسے نے وی اوس نوں لڑائی وچ نہیں ورتیا اے۔ایس لئی لوکائی وچ اوہ امن دی تلوار نال مشہور ہو گئی اے۔بادشاہ نے اوہ قیمتی تلوار کڈھی۔ایس تلوار نوں جس کمرے وچ رکھیا گیا سی اوہ وی بہت شاندار بنایا گیا سی بادشاہ نوں ایس نال جُڑی ماورائی کہانیاں یاد آون لگیاں۔اوہ اوس نوں باہر لے آیا باہر میدان ء جنگ لگ چُکیا سی تلوار،امن دی تلوار نے حالء نیام وچ ای سوچیا کہ اوس دی طاقت سبھ توں وڈی اے ایس لئی تاں اوس نوں الگ تھلک رکھیا گیا سی۔اپنے خیالاں وچ اوہ بادشاہ نوں فاتح کر چُکی سی اوس نے اپنے بادشاہ نوں تلوار لہراندیاں ویکھیا جِت دی خُشی ویکھی حالے اوہ ایہناں گلاں وچ ای سی کہ تلوار نوں نیام وچوں کڈھیا گیا۔تلوار نے ویکھیا ہر پاسے لہو ای لہو سی۔لاشاں دے ڈھیر سن بادشاہ میدان ء جنگ تے اپڑیا سی تاں شام دا ویلا ہو چُکیاجس کر کے جنگ پورے جوبن تے نہیں سی رہی بادشاہ دے عین میدان ء جنگ تے اپڑدیاں اپڑدیاں جنگ مُک چُکی سی۔
شاموں شام تلواراں نوں اک تھاں تے رکھ دِتا گیا قیمتی تلوار نوں ایہ سبھ کجھ پہلی وار ویکھن نوں مِل رہیا سی اوس نے ایس توں پہلاں کدی ایہناں لاشاں لہو قتل و غارت نہیں سی ویکھی ہوئی ایس لئی اوس نے باقی تلواراں نوں وی ایہ دسیا ساریاں تلوارں نے آپسی کھیہ کے شور جہیا پایا تے سبھ توں ودھ شور پان والی تلوار نوں اک زخمی نے چُک کے سُٹیا تے اوہ دوجیاں فوجیاں دیاں تلواراں وچ جا پئی اوتھے وی ایہو ای شور ہونا شروع ہویا تے دوواں پاسے دے فوجی نہ سو ں سکے۔ سِٹے دے طور تے سویر نیندر پُوری نہ ہوون پاروں کوئی وی نہ لڑسکیا تے قیمتی تلوار دی حکمت نوں دوویں بادشاہ سمجھے تے اِک دوجے دے گوانڈھی تے رہے پر اوہ دوست بن گئے۔
اج ساڈے تے وی ایہ ای ویلا آ گیا اے کہ اپنی قیمتی تلوار کڈھن دی لوڑ پے گئی اے جس نال لہو نہ وگے جس نال لاشاں نہ چُکیاں جاون۔اک دے ہتھ کبوتر ہووے تے دوجے دے ہتھ خنجر نہیں ہونا چاہیدا اے۔لاشاں جنیاں وی ہوون اوہ دہشت گردیاں پھیلان والیاں دیاں ہوونا چاہیدیا ں نیں جو لوکاں نوں مذہب،رنگ تے نسل دی وجھا توں مار کے انسانیت دُشمنی دا ثبوت دے رہے نیں۔اج ساڈی لڑائی امن تے فساد دے درمیان اے علم تے جہالت دے وچکار اے۔جے اسیں امن قائم کرنا اے تے اک دِن نال نہیں آنا اے ایس واسطے لگا تار لڑائی دی لوڑ پے سکدی اے ایہ لڑائی مکالمے۔تعلیم تے انسانی رویے نال ای آنی اے لاشاں وچھان نال کُجھ نہیں ہونا اے ایس نال تاں اجہی نفرت پیدا ہونی اے جو اگلیاں کئی نسلاں تیکر جاری رہوے گی۔قیمتی تلوار اپنے کول ضروری اے ہووے پر اوس نوں انساناں دے گاٹے لاون واسطے نہ ورتیا جاوے سگوں اوس کولوں عبرت لینی چاہیدی اے تے اگلی نسل نوں انسانیت دے قتل دی تواریخ نہ سکھائی جاوے۔
امن،تعلیم،تحفظ تے انسانیت نوں اگانہ ودھاون نال انسانی بقااے۔کیوں کہ ایس توں اوہ خشبو نکلدی اے جو ساری دُنیا نوں معطر کر دیندی اے۔ایہ پینڈا اوکھا ضرور اے پر نا ممکن نہیں اے۔جے ایتھے دُنیا دے واسیاں نے لڑائی پیدا کیتی اے تے امن وی ایہناں نے ای ہُن پیدا کرنا اے کیوں جے آکھیا جاندا اے ہر شے وچ اوس دی ضد موجود ہوندی اے جو اوس دی نفی کردی اے۔ساڈے کول تے ایہ دعا ہمیش رہندی اے:
پَوناں کیوں گُم سُم نیں،پتے کیوں چِیک رہے نیں
آ رل کے دعا کرئیے،ایہ موسم ٹھیک رہے
اج دا نسان اپنی دُنیا نوں رہن دے قبل بنائے تاں حالات ٹھیک ہو سکدے نیں۔ایس واسطے سبھ نوں اپنی اپنی سطح تے کجھ اجہیا کرنا چاہیدا ے جو اوہ ہن سبھ توں ودھ ودھیا کر سکدا اہووے۔امن دا سفر علم نال شروع ہونا اے کیوں جے ایہ دوویں لازم تے ملزوم نیں ایس واسطے مُڈھلے کماں ول دھیان دین دی لوڑ اے۔ودھ توں ودھ سکولاں تے کالجاں داقیام ات ضروری اے کیوں جے علم دے حصول نال ای چنگے نتیجے ساہمنے آسکن گے نہیں تاں دُشمن عناصر لوکائی نوں بے وقف بناون وچ کامیاب ہو جاون گے۔
امن دی تلوار دی لوڑ اج وی اے ایس طرحاں دی وچ نال امن،سُکھ تے شانتی آوے گی تے ہر پاسے لاشاں نہیں وچھیاں ہوون گئیاں تے آون والیاں لئی اک چنگی ودھیا دُنیا رہوے گی۔اقوام متحدا دا کردار ایس لحاظ نال اجیہا اے جس نوں ہر دیس وچ امن دی فکر رہندی اے پچھلے دیہاڑ ایچین وچ سلامتی کونسل دی قرارداد مظور کیتی گئی اے جہدے وچ افغانستان اندر امن قائم کرن لئی منصوبے مِتھے گئے نیں۔افغانیاں نوں آل دوآلے گوانڈھیاں دیساں نال وی چنگے ورتارے دی سُوچنی دینی چاہیدی اے نہیں تاں امن کویں ممکن رہوے گا۔کدھرے ایوں نہ ہووے:
اندر اوہو زہر کٹوری مونہوں منکے کِردے نیں
کیہ سپاّں دے متھے تارا کیہ سپّاں دی ذات