ایم وائی شاہد ہوراں دیاں دو غزلاں

آل دوالے ہندا کیہ اے
وچ وچالے ہندا کیہ اے

اوہنوں وی سمجھاؤ لوکو
مکھ وکھالے ہندا کیہ اے

اوہد ی من کے ٹر چلیا اے
چُک چکالے ہوندا کیہ اے

سجناں کول جے جانا ہووے
بنے کھالے ہوندا کیہ اے

اوہدی آس تے جینے آں
ککر پالے ہوندا کیہ اے

دل دی نگری سوہنی ہووے
چِٹے کالے ہوندا کیہ اے

شاہد کول بلاوے اوہنوں
اوہ جے ٹالے ہوندا کیہ اے

غزل

اوہدے تیر نشانے تے
میں آں ویر نشانے تے

رانجھا جوگی بنیا اے
اوہدے ہیر نشانے تے

ظالم فِر وی مڑیا نئیں
اج کشمیر نشانے تے

صاحباں بن گئی ویراں دی
رکھ کے تیر نشانے تے

اوہو پُگیا ہوندا اے
جو اخیر نشانے تے

حاکم لٹی جاندے نیں
فیر جاگیر نشانے تے

شاہد ہاسے ونڈے نیں
رکھ کے نیر نشانے تے