قابل / نااہل افسر…… معیار کیہ ہووے گا؟

حکومت نے سول سروسز دِیاں اصلاحواں ترتیب دے لئیاں نیں جو چھیتی ای ساہمنے آ جاون گیاں۔ ایہناں مطابق چوکس تے قابل سول سرونٹس نوں ملازمت اُتے رکھیا جاوے گا جد کہ باقیاں نوں ویلھا کر دتا جاوے گا۔20 سالا ملازمت اُتے بورڈ کمکاری دا جایزا لوے گا۔ترقی دے آس وند امیدواراں نوں اپنے اثاثے وی ظاہر کرنے ہوون گے تے پروموشن بورڈ توں وی چنگے نمبر لینے ہوون گے۔ گریڈ 19واسطے ترقی لئی ضروری اے کہ متعلقا افسراں نے پنج تے تن (مرد تے عورت) سال تیکر کسے دُوجے صوبے وچ سیواواں کیتیاں ہوون۔ گریڈ 20 وچ ترقی لئی ہارڈ ایریا وچ دو سال تک سیوا کرنا وی ضروری متھیا جاوے گا۔
حیرانی والی گل اے کہ دُوجے صوبے‘ یاں ہارڈ ایریا وچ کجھ سال ڈیوٹی کرنا ساڈی سول سروس وچ قابلیت دا معیار بن رہیا اے۔ ایہو جہے معیار صرف پاکستان وچ ای ممکن نیں۔ پاکستان سول سروس‘ بہترین پروفیشنل مہارت رکھن والیاں دی ڈھانی دا ناں ہوندا سی جہنے انگریز دے زمانے دی آئی سی ایس دی تھاں لئی۔ انگریز دا تیار کیتا نظام اینا ودھیا سی کہ اوہنے پورے ہندستان وچ کجھ ہزار دی تعداد وچ ہو کے وی ایسے نظام راہیں اک براعظم جیڈے دیس دا نظام سوہنے انداز نال چلایا۔ انگریز دے زمانے وچ اوس بدامنی‘ ماردھاڑ‘ بے انصافی‘ بدنظمی تے بد انتظامی دا تصور وی نہیں سی کیتا جا سکدا جو اج پاکستان وچ نظر آوندی اے۔ جے پاکستان وچ ایہ چیزاں نظر آوندیاں نیں تاں اوہدے ہور کارن ہون دے باوجوداک وجھا ایہ وی اے کہ سول سروس دے نظام نوں داغدار کر دِتا گیا اے۔
اج وی سول سروس دی بھرتی دا طریقا کافی حد تیکر بے داغ اے تے ایہدے راہیں دیس دے ذہین تے محنتی لوکاں وچوں چھانٹی کیتی جاندی اے پر تعلیمی نظام دا بیڑا غرق ہون پاروں ساڈے ذہین لوک وی ذہنی طور اُتے بنجر تے بانجھ ہوندے جا رہے نیں۔ اِکپاسی تعلیم نے اوہناں دے ذہن وی اِکپاسی کر دتے ہوئے نیں۔ ایہ وی غنیمت سہی پر اگے سیاستدان حکمراناں نے اپنے چہیتے تے من پسند افسراں نوں اپنی من پسند تھاں لا کے اوہناں دی پیشاورانا مہارت دا بیڑا غرق کر دتا اے۔ نکی جہی مثال اے کہ ن لیگ دے لیڈراں دا من پسند گریڈ17 دا اک افسر20 ویں گریڈ دی پوسٹ اُتے سیکرٹری ایجوکیشن لگا رہیا۔ ن لیگ یاں ق لیگ دے حکمراناں نے من مرضی دے افسر لائے تے من مرضی دے کم لئے۔ ایہ پچھلی حکومت دے اعتباری سن ایس لئی انصافی حکومت نے آوندیاں ای ایہناں ساریاں نوں ہٹا کے ہور افسراں دی تعیناتی کر دتی جہدے نال حکومتی نظام نوں فالج ہو گیا۔
اج اصلاحواں دے ناں اُتے دو سال فلانی تھاں تے چار سال فلانی تھاں ڈیوٹی نوں ای قابلیت دا معیار مِتھیا جا رہیا اے۔ ایہو جہی ذہنی سطح تے اپروچ اُتے سلامی دین نوں دل کردا اے۔ ایس قوم دا ذہنی بانجھ پن اپنیاں آخری حداں نوں اپڑ رہیا اے۔

(شکریے نال روز وار ”لوکائی“17.3.2020)