دراوڑی کتھا

دراوڑی کتھا

اسیں سائر, چھیڑو, آجڑی،
اسیں نیچ، ہماتڑ، ہیٹھ
اسیں خالی کھیسے والڑے،
اسیں جگوں باہرے سیٹھ
سانوں وڈھن ٹکن دھاڑوی،
سانوں مارن مدھن کال
ساڈے ہڈیں سچ اے رچیا،
ساڈے ہتھاں وچ کمال

اسیں کالے کوجھے راکھشس,
ساڈی ناگاں نال صلاح
اسیں ردے ہوئے لوک ہاں!
ساڈی اڈدی پھرے سواہ
سانوں نندے بھنڈے ویلڑا،
اسیں دھروں لکھائی ہار
اسیں نہتھے وچ میدان دے،
اسیں لڑن دے لئی تیار

اسیں گگڑے, چوہڑے, جوتشی،
ساڈی گھٹی وچ گیان
ساڈی نال انھیرے ویرتا،
ساڈی مٹھی وچ طوفان
ساڈی کنڈ تے پنجے پیر نیں،
ساڈے پیراں ہیٹھ بھچال
ساڈی اکھ گناں دی پوٹلی،
ساڈے لوں لوں وچ دھمال

سانوں رووے روز ای ہاکڑا،
ساڈی سندھو منگے خیر
اسیں ازلوں پکھی واس ہاں،
ساڈی بکل دے وچ شہر
سانوں بانہواں اڈ بلاوندی،
ساڈی سکھی ساوی جوہ
اسیں آپ جھلاراں کھٹیاں،
اسیں آپے کھٹے کھوہ

اسیں عشقے نوں رب منیا،
ساڈے اندروں اٹھی ہوک
اسیں اڈی ماری دھرت تے،
اسیں ونجھلی دتی پھوک
ساڈے سینے پھٹ ڈونگھیرڑے،
ساڈے پھٹاں اتے لون
تیرے متھے تلک جو حاکما,
ساڈے سجے پَیردا خون