"میں سُنیا اے"

*میں سُنیا اے! *
میں سُنیا اے پنجابی جاگ جاون گے
تے اپنے دیس دی بولی دا جھنڈا آپ چُکن گے
سکولاں وچ اسمبلی وچ پنجابی بول بولن گے
میں سنیا اے میرے پنجاب دے اندر پنجابی راج ہووے گا
پنجابی سیوکاں دی آپسی جنگ مُک جاوے گی
تے سارے کٹھیاں ہو کے
اکو ہی چھت دے تھلے
پنجابی پگ نوں اُچا رکھن دا حلف چُکن گے
میں سُنیا اے میرے پنجاب دے واسی
پنجابی بولنا پڑھنا تے لکھنا سکھ جاون گے
تے ہر اک بال دے نال ماں پنجابی بول بولے گی
پنجابی لوریاں دا مُڑ گھراں وچ شور ہووے گا
میں سُنیا اے کہ پِنڈ دے بوہڑ دے تھلے تھڑے آباد ہوون گے
تے سسی ہیر تے سیف الملوکی گونج گونجے گی
ودھے گا پیار لوکاں وچ
تے نفرت مُک جاوے گی
میں سُنیا اے کہ دریاواں چ پانی فیر آوے گا
تے پنجاں پانیاں دے گیت خلقت فیر گاوے گی
کِتے بجلی بناوے گی
کِتے فصلاں اُگاوے گی
میں سُنیا اے، میں سُنیا اے، میں سُنیا اے!
میرے سجنو میرے مترو!
میں سبھ کُجھ جھوٹھ لِکھیا اے
میں لکھیا جھوٹھ اے پر ہاں
اودوں ممکن ایہ ہووے گا
جدوں پنجاب دے واسی
وچاری ماں دی بولی نوں وی
درجہ ماں دا دیون گے
تے بن کے ایس دے راکھے ایہدا جھنڈا سنبھالن گے
ایہدے ول اُٹھ رئی میلی نظر نوں چیر دیون گے
اود وں پنجاب ہسے گا
تے وَیری دُشمناں دی اکھ
صدیاں تیک رووے گی
ہاں ایہو خواب پورن لئی
میں ایہ نُقطے لکیرے نیں
اجے جو بے تعبیرے نیں
اجے جو بے تعبیرے نیں