فرانس دی اِک لوک کہانی

ہمیش سچ نہ بولن والا مُنڈا
(فرانس دی لوک کہانی)
اِک کسان سی جوفرانس دے اِک پنڈ وچ وسدا سی۔ اوس دا اِک پُتر سی جو کدے کدے سچ بولدا تے کدے ایس توں اُلٹ۔
اِک دیہاڑے کسان نے اپنے پُتر نُو بھیڈاں دی دیکھ بھال واسطے گھلیا۔ اوس نُوں پِنڈوں ذرا کُو باہر پہاڑی دے پرلے پار جانا پینا سی جتھے لمّی تے مِٹھی گھاہ اُگی ہوئی ی۔
بڑی مُشکل نال اوس نے تھوڑا پینڈا ای کچھیا ہونا کہ اوہ مُڑ آیا تے اوس دا ساہ پھُلیا ہویا سی۔ اوس نے کہیا ”ابو! ابو! اپنی پستول پھڑ لو۔ میں پہاڑی اُتے اِک گھوڑے جِڈا اُچّا لمّا خرگوش ویکھیا اے۔“
”گھوڑے جِڈا خرگوش۔“ اوس دے ابو نے بولیا۔ ”میراد ِل نہیں من سکدا۔“
چنگا، اوہ گھوڑے جِڈا تاں نہیں ہونا…… مُنڈا بولیا۔ پر اوہ مہینے ڈیڑھ مہینے دے گھوڑے جِڈا تاں ہونا ای اے۔“
ڈیڑھ مہینے دے گھوڑا جِڈا“ اوس دا ابو بولیا۔”میرا دِل حالے وی نہیں من رہیا۔“
ڈیڑھ مہینے دے گھوڑے جِڈا نہ سہی پر وَچھے جِڈا وڈا تاں اوہ ہے ای سی۔“
”وچھے جِڈا خرگوش۔“ میں ایہ وی نہیں من سکدا۔
”شاید ایہ وچھے جِنا وڈا نہ ہووے پر اوہ کسے بھیڈ جِڈّا تاں ہے ای سی۔“
”اِک خرگوش بھیڈ جِڈا وڈّا۔“ میں نہیں یقین کرسکدا۔
”شاید اوہ بھیڈ جِڈّا وڈّا سی۔“ پر اوہ میمنے ورگا تاں وڈا وی نہیں“
”میمنے جِڈا خرگوش۔ میں سوچ وی نہیں سکدا۔“
”بِلی جِڈا وڈّا خرگوش“
”پر اوہ بلی جِنّا وڈا وی نہیں شاید چوہے جِنّاوڈّا سی۔“
”چوہے جِنّاوڈا خرگوش۔ مینوں کُجھ سُجھ کیوں نہیں رہیا۔“
پر شاید اوہ چوہے جِنّا وڈا وی نہیں سی۔ اوہ چوہی جِڈّا لگدا سی۔
”چوہی جِڈا خرگوش مینوں یقین ای نہ آیا۔“
شاید اوہ چوہی جِڈا وی نہیں مکھی کُو جِنّا سی۔
”مکھی جِنّا خرگوش؟ او میرے پُترا مینوں نہیں لگدا تُوں کوئی جنور ویکھیا وی اے۔“
فیر اوس نے نِکّے جہے کہانیاں سناون والے نُوں بھیڈاں دی دیکھ بھال واسطے دُبارا گھل دِتا۔

٭٭٭٭٭